ການພົວພັນ ຣັດເຊຍ - ລາວ


...

12.06.2019 10:27     

   ມື້ນີ້ (12/6/2019) ພວກເຮົາສະເຫຼີມສະຫຼອງວັນຊາດ ຣັດເຊຍ ຊຶ່ງໝາຍເຖິງການປະກາດ ລັດອະທິປະໄຕ ແຫ່ງ ລັດ ສະຫະພັນຣັດເຊຍ ໃນປີ 1990 ແລະ ຍຸກໃໝ່ ຂອງປະ ຫວັດສາດ ຣັດເຊຍ ສະໄໝໃໝ່. ການຫັນປ່ຽນໄປສູ່ ປະຊາທິປະໄຕ ເຫຼົ່ານີ້ ມີຜົນສະທ້ອນ ຢ່າງເລິກເຊິ່ງ ຕໍ່ນະໂຍບາຍການຕ່າງປະເທດ ຂອງຣັດເຊຍ, ການປຶກສາຫາລື ແລະ ການຮ່ວມມືຫຼາຍໆດ້ານ ກັບທຸກໆປະເທດ.
ເນື່ອງໃນໂອກາດວັນຊາດ ຣັດເຊຍ, ຂ້າພະເຈົ້າ ຂໍຢໍ້າເຖິງ ສາຍພົວພັນ ຂອງ ພວກເຮົາ ກັບ ລາວ ເປັນຄູ່ຮ່ວມມືທີ່ມີມູນເຊື້ອ ແລະ ເປັນມິດ ທີ່ໜ້າເຊື່ອຖືທີ່ສຸດຢູ່ໃນຂົງເຂດອາຊີຕາເວັນອອກສ່ຽງໃຕ້. ຜ່ານປະຫວັດສາດຂອງ ການພົວພັນຢ່າງເປັນທາງການຂອງພວກເຮົາ ແຕ່ ປີ 1960, ພວກເຮົາ ໄດ້ສ້າງພື້ນຖານອັນໜັກແໜ້ນຂອງຄວາມໄວ້ວາງໃຈ, ຄວາມນັບຖື ແລະ ຄວາມສາມັກຄີຊຶ່ງກັນ ແລະ ກັນ. ດ້ວຍການຊ່ວຍເຫຼືອຢ່າງຫຼວງຫຼາຍຂອງສະຫະພາບໂຊວຽດ ມີຫຼາຍໂຄງການທີ່ໄດ້ດຳເນີນການຢູ່ລາວທາງດ້ານສັງຄົມ, ເສດຖະກິດ ແລະ ການທະຫານ, ພື້ນຖານໂຄງລ່າງຂອງລະບົບຄົມມະນາຄົມຂົນສົ່ງ, ການປິ່ນປົວສຸຂະພາບ ແລະ ການສຶກສາ ເປັນຕົ້ນ.
ປະຊາຊົນຊາວລາວຈຳນວນຫຼາຍພັນຄົນ ໄດ້ຮັບການສຶກສາໃນປະເທດຂອງພວກເຮົາ. ພວກເຮົາມີຄວາມພູມໃຈ ໂດຍສະເພາະທີ່ເຫັນວ່າຫຼາຍຄົນໃນຈຳນວນດັ່ງກ່າວ ມີຖານະຕໍາແໜ່ງສໍາຄັນຢູ່ໃນຫຼາຍຂົງເຂດຕ່າງໆ ທີ່ພວກເຂົາເຈົ້າສາມາດເຮັດວຽກຢ່າງມີປະສິດທິຜົນ ເພື່ອຜົນປະໂຫຍດຂອງປະເທດຊາດຂອງຕົນ.
ເປັນເວລາ 59 ປີ ນັບຕັ້ງແຕ່ໄດ້ມີການສ້າງຕັ້ງ ສາຍພົວພັນ ທາງການທູດນຳກັນ, ການຮ່ວມມືລະຫວ່າງປະຊາຊົນ ຂອງພວກເຮົາ ໄດ້ເພີ່ມຄວາມເຂັ້ມແຂງຂຶ້ນ. ເຖິງແມ່ນວ່າໃນໄລຍະຢູ່ພາຍໃຕ້ສະຖານະການທີ່ຂັດສົນ ພາຍຫຼັງທີ່ສະຫະພາບໂຊວຽດ ພັງທະລາຍ ແລະ ມີການເລີ່ມຕົ້ນ ການປ່ຽນແປງໃໝ່ ຢູ່ທັງຣັດເຊຍ ແລະ ລາວ, ບັນດາຜູ້ນໍາ ແລະ ປະຊາຊົນຂອງປະເທດເຮົາ ບໍ່ໄດ້ປ່ອຍປະໃຫ້ການພົວພັນສອງຝ່າຍເຢັນຊາລົງ, ແຕ່ຍັງໄດ້ສະແດງໃຫ້ເຫັນເຖິງຄວາມມຸ້ງໝັ້ນ ເພື່ອເຮັດໃຫ້ຄວາມສໍາພັນຂອງ ພວກເຮົາ ກ້າວສູ່ມິຕິໃໝ່.
ຂໍ້ຕົກລົງກ່ຽວກັບການພົວພັນມິດຕະພາບ ທີ່ໄດ້ເຊັນກັນ ເມື່ອປີ 1994 ໄດ້ກາຍເປັນພື້ນຖານໃໝ່ ທາງດ້ານກົດໝາຍ ສໍາລັບການພົວພັນສອງຝ່າຍລະຫວ່າງ ຣັດເຊຍ ແລະ ລາວ. ນັບແຕ່ນັ້ນເປັນຕົ້ນມາ, ສາຍພົວພັນລະຫວ່າງປະເທດຂອງພວກເຮົາ ຍັງສືບຕໍ່ຢຶດໝັ້ນການປຶກສາຫາລືທາງການເມືອງ ທີ່ມີປະສິດທິພາບ ແລະ ມີປະສິດທິຜົນ ໃນເວທີສາກົນ, ການພັດທະນາການຮ່ວມມືທາງດ້ານການຄ້າ, ເສດຖະກິດ, ວິທະຍາສາດ, ການສຶກສາ, ວັດທະນະທໍາ, ມະນຸດສະທໍາ ແລະ ອື່ນໆ.
ຂ້າພະເຈົ້າ ເຊື່ອວ່າ ໃນມື້ນີ້ ພວກເຮົາຮ່ວມກັນເປັນພິຍານ ໃຫ້ແກ່ ຄວາມຫວັງໃໝ່ຂອງບາດກ້າວໃໝ່ ໃນປະຫວັດສາດ ການພົວພັນລະຫວ່າງ ຣັດເຊຍ ແລະ ລາວ. ໃນໄລຍະທີ່ຜ່ານມາ ຣັດເຊຍ ແລະ ສປປ ລາວ ໄດ້ຍົກລະດັບການພົວພັນສອງຝ່າຍ ເປັນ ຄູ່ຮ່ວມມືຍຸດທະສາດ ໃນພາກພື້ນອາຊີ-ປາຊີຟິກ ດັ່ງທີ່ໄດ້ບົ່ງໄວ້ ໃນຖະແຫຼງການຮ່ວມ ທີ່ໄດ້ຖືກຮັບຮອງເອົາໃນໄລຍະການຢ້ຽມຢາມຄັ້ງປະຫວັດສາດຂອງ ພະນະທ່ານ ຈູມມາລີ ໄຊຍະສອນ ອະດີດປະທານປະເທດ ແຫ່ງ ສປປ ລາວ ໃນປີ 2011. ຫຼັງຈາກນັ້ນ, ກໍມີບັນດາການປະຊຸມພົບປະຂັ້ນສູງ ແລະ ສູງສຸດໄດ້ຖືກຈັດຂຶ້ນ, ລວມທັງການພົບປະໂອ້ລົມ ຂອງປະທານາທິບໍດີ ວາລາດີເມຍ ປູຕິນ (Vladimir Putin), ຫົວໜ້າລັດຖະບານ ແຫ່ງ ສະຫະພັນ ຣັດເຊຍ ເດີມີຕຣີ ເມດເວເດບ ກັບບັນດາຜູ້ນໍາລາວ.
ການພົວພັນສອງຝ່າຍທີ່ມີຄວາມເຂັ້ມແຂງ ໄດ້ບົ່ງບອກວ່າ: ພວກເຮົາ ມີຫຼາຍບັນຫາທີ່ຈະປຶກສາຫາລື ແລະ ເຮັດວຽກຮ່ວມກັນ. ມັນມີຄວາມສຳຄັນທີ່ສອງຊາດ ພວກເຮົາແມ່ນນອນຢູ່ໃນທຸກໆບັນຫາສໍາຄັນຂອງໂລກ ແລະ ຂົງເຂດອາຊີ-ປາຊີຟິກ ແມ່ນໃກ້ຄຽງກັນ ຫຼື ຄືກັນ, ໂດຍສະເພາະຢ່າງຍິ່ງໃນການສ້າງຕັ້ງ ລະບຽບຂອງໂລກຫຼາຍຂົ້ວ ໂດຍອີງໃສ່ອຳນາດສູງສຸດຂອງກົດໝາຍ ແລະ ຫຼັກການຄວາມປອດໄພເທົ່າທຽມກັນ ສໍາລັບທຸກ ປະເທດ, ການບໍ່ແຜ່ຂະຫຍາຍອາວຸດສັງຫານໝູ່ ແລະ ຕໍ່ຕ້ານການກໍ່ການຮ້າຍ, ລັດທິຫົວຮຸນແຮງ, ການຄ້າຂາຍຢາເສບຕິດ ແລະ ສິ່ງທ້າທາຍອື່ນໆ.
ຄວາມເຂົ້າໃຈ ຊຶ່ງກັນ ແລະ ກັນ ຂອງພວກເຮົາ ໃນດ້ານການການພົວພັນສາກົນ ເປັນພື້ນຖານອັນໜັກແໜ້ນ ໃຫ້ແກ່ການປະສານງານ ທີ່ມີປະສິດທິຜົນຂອງຄວາມພະຍາຍາມຂອງ ຣັດເຊຍ ແລະ ລາວ ໃນກອບຂອງໂຄງການການຮ່ວມມືຫຼາຍຝ່າຍເຊັ່ນ: ສະຫະປະຊາຊາດ ແລະ ເຄືອຂ່າຍ, ຣັດເຊຍ - ຄູ່ຮ່ວມມືອາຊຽນ, ກອງປະຊຸມພາກພື້ນອາຊຽນ ກ່ຽວກັບຄວາມປອດໄພ ແລະ ອື່ນໆ.
ການເສີມຂະຫຍາຍການຮ່ວມມື ຊຶ່ງກັນ ແລະ ກັນ ລະຫວ່າງ ລັດຖະສະພາຂອງພວກເຮົາ, ການຮ່ວມມືທາງດ້ານຄວາມປອດໄພ ແລະ ປ້ອງກັນຊາດ, ເສດຖະກິດ ແລະ ການຄ້າ ໄດ້ຮັບການ ພັດທະນາຢ່າງຕັ້ງໜ້າ. ສັງເກດເຫັນວ່າ ປີນີ້ ມີຫຼາຍເຫດການ ທີ່ສໍາຄັນທີ່ເກີດຂຶ້ນ ໃນການພົວພັນສອງຝ່າຍຂອງພວກເຮົາ. ໃນເດືອນເມສາ, ເລຂາທິການຂອງສະພາຄວາມປອດໄພ ສະຫະພັນ ຣັດເຊຍ ທ່ານ ນີໂກລາຍ ເປຕຣູເຊັບ ໄດ້ເດີນທາງມາຢ້ຽມຢາມລາວ ໄດ້ປະສົບຜົນສຳເລັດພາຍໃນກອບທີ່່ຜູ້ກ່ຽວ ໄດ້ປຶກສາຫາລືກັບເຈົ້າໜ້າທີ່ ສປປ ລາວ. ພວກເຮົາ ສືບຕໍ່ເພີ່ມທະວີການຮ່ວມມື ລະຫວ່າງ ຣັດເຊຍ ແລະ ລາວ ກ່ຽວກັບການປ້ອງກັນຊາດເຊັ່ນ: ໃນເດືອນເມສາ ລັດຖະມົນຕີປ້ອງກັນປະເທດຂອງ ສປປ ລາວ ທ່ານ ຈັນສະໝອນ ຈັນຍາລາດ ໄດ້ໄປເຄື່ອນໄຫວຢ້ຽມຢາມຣັດເຊຍ ແລະ ໄດ້ປຶກສາຫາລືກັບຄູ່ຮ່ວມງານຣັດເຊຍ. ໃນປີນີ້ ກະຊວງປ້ອງກັນປະເທດຂອງສະຫະພັນ ຣັດເຊຍ ໄດ້ເປີດຫ້ອງການຖາວອນຂອງຕົນ ຢູ່ນະຄອນຫຼວງວຽງຈັນ, ນັກສຶກສາລາວ ຫຼາຍສິບຄົນ ໄດ້ຖືກສົ່ງໄປສຶກສາຢູ່ຕາມສະຖາບັນຊັ້ນສູງຂອງກອງທັບຣັດເຊຍ. ພວກເຮົາ ມີຄວາມພູມໃຈທີ່ອຸປະກອນການທະຫານຂອງຣັດເຊຍ ໄດ້ຮ່ວມສະແດງໃນພິທີສວນສະໜາມ ເນື່ອງໃນໂອກາດສະເຫຼີມສະຫຼອງ ວັນຄົບຮອບ 70 ປີ ຂອງວັນສ້າງຕັ້ງກອງທັບປະຊາຊົນລາວ. ຂ້າພະເຈົ້າ ຂໍຢໍ້າເຖິງຄວາມດີໃຈກ່ຽວກັບຜົນສໍາເລັດ ຂອງຄະນະວິສະວະກອນ ຂອງກອງທັບຣັດເຊຍ ໃນການເກັບກູ້ລະເບີດບໍ່ທັນແຕກ ຢູ່ແຂວງບໍລິຄໍາໄຊ ໃນໄລຍະເວລາແຕ່ເດືອນຕຸລາ ປີ 2018 ຫາ ເດືອນມີນາ ປີ 2019. ການປະຕິບັດໜ້າທີ່ຂອງພວກເຂົາເຈົ້າ ແມ່ນໄດ້ຮັບການຊື່ນຊົມຈາກທ່ານລັດຖະມົນຕີປ້ອງກັນປະເທດ ແຫ່ງ ສປປ ລາວ ແລະ ພວກເຮົາຕັດສິນໃຈທີ່ຈະສືບຕໍ່ການຊ່ວຍເຫຼືອ ຂອງພວກເຮົາ ໃນຂົງເຂດວຽກງານເກັບກູ້ລະເບີດ.
ການຮ່ວມມືທາງດ້ານ ເສດຖະກິດ ແລະ ການຄ້າ ກໍໄດ້ພັດທະນາຢ່າງຕັ້ງໜ້າເຊັ່ນກັນ. ພວກເຮົາກໍາລັງລໍຄອຍກອງປະຊຸມຄະນະກໍາມາທິການຮ່ວມມື ດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ຣັດເຊຍ-ລາວ ທີ່ຈະຈັດຂຶ້ນຢູ່ມົສກູ ໃນເດືອນກໍລະກົດ ປີ 2019 ນີ້. ພວກເຮົາ ຍິນດີຕ້ອນຮັບທຸລະກິດຂອງພວກເຮົາ ທີ່ຈະມາລາວ ແລະ ສະແດງຄວາມສົນໃຈ ກ່ຽວກັບເສດຖະກິດຂອງລາວ. ມາເຖິງປັດຈຸບັນ, ການໄຟຟ້າພະລັງນໍ້າ, ການຂຸດຄົ້ນບໍ່ແຮ່, ການສື່ສານໂທລະຄົມມະນາຄົມ ແລະ ການບິນ ແມ່ນມີຄວາມສໍາຄັນຫຼາຍແກ່ພາກລັດ ແລະ ບໍລິສັດເອກະຊົນຂອງຣັດເຊຍ.
ຣັດເຊຍ ສະໜັບສະໜູນລາວ ຢ່າງຫ້າວຫັນຕໍ່ຂະແໜງການສຶກສາ ແລະ ຊັບພະຍາກອນມະນຸດ. ຫຼັງຈາກການສ້າງຕັ້ງສູນວິທະຍາສາດ ແລະ ວັດທະນະທໍາ ຣັດເຊຍ ໃນປີ 2013, ຈໍານວນທຶນສຶກສາທີ່ລັດຖະບານຣັດເຊຍ ຈັດສັນໃຫ້ນັກຮຽນລາວ ມີຈຳນວນເພີ່ມຂຶ້ນ. ໃນປີນີ້, ຄົນລາວ ໄດ້ຮັບທຶນໄປສຶກສາຢູ່ ປະເທດຂອງພວກເຮົາ ມີຈຳນວນ 92 ຄົນ. ໃນອະນາຄົດອັນໃກ້ນີ້, ພວກເຂົາເຈົ້າ ກໍຈະກັບມາຮັບໃຊ້ປະເທດຊາດຂອງຕົນ ຕາມສັດທາ ແລະ ຄວາມເປັນຈິງ.
ການສົ່ງເສີມການພັດທະນາທັງໝົດເຫຼົ່ານີ້ ພຽງແຕ່ໄດ້ເນັ້ນໜັກເຖິງການຮັດແໜ້ນສາຍພົວພັນ ທີ່ມີຢູ່ໃນປັດຈຸບັນ ລະຫວ່າງປະເທດຂອງພວກເຮົາ. ພວກເຮົາ ກໍາລັງຊອກຫາ ວິທີທາງໃໝ່ ເພື່ອຂະຫຍາຍການຮ່ວມມືຫຼາຍດ້ານ, ເພື່ອສ້າງຄວາມເຂັ້ມແຂງ ໃຫ້ແກ່ການພົວພັນແບບຕ່າງຝ່າຍຕ່າງມີຜົນປະໂຫຍດ ໃນຂອບເຂດບັນຫາອັນກວ້າງຂວາງ .
ຂ້າພະເຈົ້າເຊື່ອໝັ້ນວ່າ ການພົວພັນມິດຕະພາບ ລະຫວ່າງ ສະຫະພັນ ຣັດເຊຍ ແລະ ສປປ ລາວ ຈະມີຄວາມຄືບໜ້າ ເພື່ອຜົນປະໂຫຍດຂອງປະຊາຊົນ, ເພື່ອຜົນປະໂຫຍດຂອງສັນຕິພາບ ແລະ ຄວາມປອດໄພໃນພາກພື້ນ ແລະ ໃນໂລກ.