ສານສະແດງຄວາມເສົ້າສະຫຼົດໃຈ


19.03.2019 8:04     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງສານສະແດງຄວາມເສົ້າສະຫຼົດໃຈ ເຖິງ ທ່ານ ຈາຊິນດາ ອາເດີນ ນາຍົກລັດຖະມົນຕີ ແຫ່ງ ນິວຊີແລນ ເມື່ອວັນທີ 18 ມີນານີ້ ທີ່ ແວວລິງຕັນ ເນື້ອໃນສານລະບຸວ່າ:
   ພວກຂ້າພະເຈົ້າ ໄດ້ຮັບຂ່າວດ້ວຍຄວາມສະເທືອນໃຈ ຕໍ່ ເຫດການຍິງສັງຫານປະຊາຊົນ ຢູ່ທີ່ ວັດມັດສະຍິກ Masjid Al Noor ແລະ Linwood, ໃນວັນທີ 15 ມີນາ 2019 ທີ່ ເມືອງ ໄຄຣເຊີດ, ອັນໄດ້ເຮັດໃຫ້ປະຊາຊົນຜູ້ບໍລິສຸດເສຍຊີວິດ ແລະ ໄດ້ຮັບບາດເຈັບ ເປັນຈຳນວນຫຼວງຫຼາຍ.
   ໃນນາມລັດຖະບານ ແລະ ປະຊາຊົນລາວ, ຂ້າພະເຈົ້າ ຂໍສະແດງຄວາມເສົ້າສະຫຼົດໃຈ ແລະ ເຫັນອົກເຫັນໃຈອັນເລິກເຊິ່ງມາຍັງທ່ານ, ລັດຖະບານ ແລະ ປະຊາຊົນ ນິວຊີແລນ ໂດຍສະເພາະ ຕໍ່ຄອບຄົວຜູ້ທີ່ໄດ້ຮັບເຄາະຮ້າຍຈາກເຫດການທີ່ເສົ້າສະຫຼົດໃຈໃນຄັ້ງນີ້.
    ສປປ ລາວ ກ່າວປະນາມຕໍ່ກັບເຫດການດັ່ງກ່າວ ກໍຄືການກໍ່ການຮ້າຍໃນທຸກຮູບແບບ ແລະ ພ້ອມຈະສືບຕໍ່ຮ່ວມມືກັບວົງຄະນາຍາດສາກົນ ໃນການຕໍ່ສູ້ລັດທິກໍ່ການຮ້າຍສາກົນ ແນໃສ່ປະກອບສ່ວນປົກປັກຮັກສາສັນຕິພາບ ແລະ ສະຖຽນລະພາບ ໃນພາກພື້ນ ແລະ ໃນໂລກ. ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນຳພາຂອງ ທ່ານ ກໍຄື ລັດຖະບານ, ປະຊາຊົນ ນິວຊີແລນ ຈະສາມາດຜ່ານຜ່າຄວາມໂສກເສົ້າ ແລະ ຄວາມຫຍຸ້ງຍາກຕ່າງໆ ເຮັດໃຫ້ສະພາບການກັບຄືນສູ່ຄວາມເປັນປົກກະຕິໂດຍໄວ.