ປະທານປະເທດລາວ ສົ່ງສານສະແດງຄວາມເສົ້າສະຫຼົດໃຈເຖິງສົມເດັດຣາຊາທິບໍດີ ມາເລເຊຍ


29.05.2019 10:41     

   ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ສົ່ງສານສະແດງຄວາມເສົ້າສະຫຼົດໃຈ ເຖິງ ສົມເດັດ ຣາຊາທິບໍດີ ຍັງດີ-ເປີຕວນ ອາກົງ ທີ ສິບຫົກ ອັນ-ຊຸນຕານ ອັບດູນລາ ຣີ ອາຢາຕູດິນ ອັນ-ມູສຕາຟາ ບິນລາ ຊາ ອິບນີ ຊຸນຕານ ຮາຈິ ອາມັດ ຊາ ອັນ-ມູສຕາອິນ ບິນລາ ສົມຣາຊາທິບໍດີ ແຫ່ງ ມາເລເຊຍ ທີ່ ກົວລາລຳເປີ ເມື່ອບໍ່ດົນມານີ້ ເນື້ອໃນສານລະບຸວ່າ:
ຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງ ທີ່ໄດ້ຮັບຂ່າວການຈາກໄປຂອງ ສົມເດັດ ຊຸນຕານ ອາມັດ ຊາ ອັນ-ມູສຕາອິນ ບິນລາ ອິບນີ ອັນມາຮາມ ຊຸນຕານ ອາບູ ບາກາ, ຣາຊາທິບໍດີ ອົງທີ 7 ແຫ່ງ ມາເລເຊຍ ແລະ ອະດີດເຈົ້າຜູ້ປົກຄອງລັດປາຮັງ ໃນວັນທີ 22 ພຶດສະພາ 2019.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄືໃນນາມສ່ວນຕົວ, ຂ້າພະເຈົ້າ ຂໍສົ່ງຄວາມໄວ້ອາໄລຢ່າງສຸດຊຶ້ງ ແລະ ແບ່ງປັນຄວາມໂສກເສົ້າມາຍັງ ສົມເດັດພະບໍຣົມວົງສານຸວົງທຸກພະອົງ, ລັດຖະບານ ແລະ ປະຊາຊົນ ມາເລເຊຍ ມານະໂອກາດນີ້ດ້ວຍ.
ຂໍໃຫ້ດວງວິນຍານຂອງ ສົມເດັດ ຊຸນຕານ ອາມັດ ຊາ ຈົ່ງໄປສູ່ສຸກຂະຕິ.