ນາຍົກລາວ ສົ່ງສານສະແດງຄວາມເສົ້າສະຫຼົດໃຈເຖິງນາຍົກໄທ


29.05.2019 10:42     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງສານສະແດງຄວາມເສົ້າສະຫຼົດໃຈ ເຖິງ ທ່ານ ພົນເອກ ປຣະຢຸດ ຈັນໂອຊາ ນາຍົກລັດຖະມົນຕີ ແຫ່ງ ຣາຊະອານາຈັກໄທ ທີ່ ນະຄອນຫຼວງບາງກອກ ເມື່ອວັນທີ 27 ພຶດສະພາຜ່ານມາ, ເນື້ອໃນສານລະບຸວ່າ: ຂ້າພະເຈົ້າ ຮູ້ສຶກເສົ້າສະຫຼົດໃຈຢ່າງສຸດຊຶ້ງ ທີ່ໄດ້ຊາບຂ່າວກ່ຽວກັບ ການຈາກໄປຂອງ ທ່ານ ພົນເອກ ເປຣມ ຕິນສຸລານົນ, ປະທານອົງຄະມົນຕີ ແລະ ລັດຖະບູລຸດ ແຫ່ງ ຣາຊະອານາຈັກໄທ ທັງເປັນອະດີດນາຍົກລັດຖະມົນຕີ ແຫ່ງ ຣາຊະອານາຈັກໄທ ໃນວັນທີ 26 ພຶດສະພາ 2019 ທີ່ຜ່ານມາ, ຊຶ່ງເປັນການສູນເສຍບຸກຄົນທີ່ສໍາຄັນ ກໍຄື ລັດຖະບູລຸດ ທີ່ເຄົາລົບຮັກຂອງປະຊາຊົນໄທ ທັງເປັນຜູ້ທີ່ມີຄຸນງາມຄວາມດີຢ່າງຫຼວງຫຼາຍ ໃນການຮັບໃຊ້ປະເທດຊາດບ້ານເມືອງ ແລະ ມີບົດບາດສູງໃນການພັດທະນາດ້ານການເມືອງ, ເສດຖະກິດ-ສັງຄົມຂອງໄທ ກໍຄືເປັນບຸກຄົນທີ່ມີບົດບາດສໍາຄັນໃນການພົວພັນຮ່ວມມືອັນເປັນມູນເຊື້ອ ລະຫວ່າງ ສອງປະເທດ ລາວ ແລະ ໄທ ໃນໄລຍະຜ່ານມາ. ໃນນາມ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄວາມໄວ້ອາໄລອັນສຸດຊຶ້ງ ແລະ ແບ່ງເບົາຄວາມທຸກໂສກມາຍັງ ທ່ານນາຍົກລັດຖະມົນຕີ, ຄະນະລັດຖະບານ ແຫ່ງ ຣາຊະອານາຈັກໄທ ແລະ ປະຊາຊົນໄທທັງປວງ ມານະໂອກາດນີ້ດ້ວຍ.