ສານຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໃນໂອກາດວັນຄົບຮອບ 52 ປີ ແຫ່ງການສ້າງຕັ້ງອາຊຽນ ແລະ ຄົບຮອບ 22 ປີ ສປປ ລາວ ເຂົ້າເປັນສະມາຊິກອາຊຽນ


...

08.08.2019 10:43     

   - ຮຽນບັນດາທ່ານ ຜູ້ນຳ ພັກ-ລັດ ທີ່ເຄົາລົບນັບຖື,
   - ບັນດາເພື່ອນມິດສະຫາຍ ພະນັກງານ, ທະຫານ, ຕໍາຫຼວດ ແລະ ພໍ່ແມ່ພີ່ນ້ອງຊາວລາວ ທີ່ຮັກແພງ ທັງຫຼາຍ
    ເນື່ອງໃນໂອກາດວັນສ້າງຕັ້ງສະມາຄົມບັນດາປະຊາຊາດອາຊີຕາເວັນອອກສ່ຽງໃຕ້ ຫຼື ອາຊຽນ ຄົບຮອບ 52 ປີ (8 ສິງຫາ 1967 - 8 ສິງຫາ 2019) ແລະ ຄົບຮອບ 22 ປີ ຂອງການເຂົ້າເປັນສະມາຊິກອາຊຽນ ຂອງສາທາລະນະລັດ ປະຊາທິປະໄຕ ປະຊາຊົນລາວ (23 ກໍລະກົດ 1997- 23 ກໍລະກົດ 2019), ຂ້າພະເຈົ້າ ຂໍຕາງໜ້າລັດຖະບານ ສົ່ງພອນອັນປະເສີດ ມາຍັງ ບັນດາທ່ານ ການນຳພັກ-ລັດ, ພະນັກງານ, ທະຫານ, ຕຳຫຼວດ ແລະ ຕະຫຼອດຮອດພີ່ນ້ອງຊາວລາວທຸກຖ້ວນໜ້າທັງຢູ່ພາຍໃນ ແລະ ຕ່າງປະເທດ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເວົ້າລວມ ແລະ ເວົ້າສະເພາະ ປະກອບສ່ວນເຂົ້າໃນການເຄື່ອນ ໄຫວວຽກງານອາຊຽນ ຕະຫຼອດໄລຍະ 22 ປີ ຜ່ານມາ.
    ອາຊຽນ ປະກອບດ້ວຍ 10 ປະເທດ ທີ່ຕັ້ງຢູ່ໃນພາກພື້ນອາຊີອາຄະເນ, ເປັນອົງການຈັດຕັ້ງພາກພື້ນລະຫວ່າງລັດຖະບານ ທີ່ຖືກສ້າງຕັ້ງຂຶ້ນ ໃນວັນທີ 8 ສິງຫາ 1967, ໂດຍມີຈຸດປະສົງ ເພື່ອປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມື ເພື່ອຄວາມສົມບູນພູນສຸກຂອງບັນດາປະຊາຊາດອາຊີຕາເວັນອອກສ່ຽງໃຕ້. ຕະຫຼອດໄລຍະ 52 ປີ ແຫ່ງວິວັດທະນາການຂອງອາຊຽນ, ອາຊຽນໄດ້ປະເຊີນໜ້າກັບສິ່ງທ້າທາຍ ແລະ ກາລະໂອກາດຕ່າງໆ, ແລະ ສາມາດບັນລຸຈຸດປະສົງຂອງຕົນເປັນກ້າວໆມາ ເປັນຕົ້ນແມ່ນການປະກາດການສ້າງຕັ້ງປະຊາຄົມເສດຖະກິດອາຊຽນ ໃນທ້າຍປີ 2015.
    ຜົນສໍາເລັດທີ່ກ່າວມານັ້ນ ແມ່ນຍ້ອນການຮ່ວມມືລະຫວ່າງ ບັນດາປະເທດສະມາຊິກອາຊຽນດ້ວຍກັນ ກໍຄືການຮ່ວມມືລະຫວ່າງອາຊຽນກັບຄູ່ຮ່ວມພາຍນອກ ທີ່ໄດ້ດຳເນີນໄປບົນພື້ນ ຖານຫຼັກການແຫ່ງການຢູ່ຮ່ວມກັນໂດຍສັນຕິ, ເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ບໍ່ແຊກແຊງເຂົ້າໃນວຽກງານພາຍໃນຂອງກັນ ແລະ ກັນ, ແກ້ໄຂບັນຫາໂດຍສັນຕິວິທີ, ບົນຫຼັກການຄວາມເປັນເອກະສັນ ແລະ ຕ່າງຝ່າຍຕ່າງມີຜົນ ອີງໃສ່ຄວາມຫຼາກຫຼາຍຂອງປະເທດສະມາຊິກ ທີ່ເອີ້ນວ່າ ວິຖີທາງຂອງອາຊຽນ (ASEAN Way).
ໃນອາທິດທີ່ຜ່ານມາອາຊຽນໄດ້ສຳເລັດການຈັດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 52 ແລະ ກອງປະຊຸມອື່ນໆທີ່ກ່ຽວຂ້ອງທີ່ບາງກອກ ປະເທດໄທ, ພາຍໃຕ້ຄຳຂວັນ: "ຮ່ວມແຮງຮ່ວມໃຈ ກ້າວໄກຍືນຍົງ". ໃນນີ້, ກອງປະຊຸມໄດ້ຕີລາຄາສູງ ຕໍ່ຜົນການຈັດຕັ້ງປະຕິບັດບັນດາຂໍ້ລິເລີ່ມ, ມາດຕະການ ແລະ ກິດຈະກໍາຮ່ວມມືໃນໄລຍະໜຶ່ງປີຜ່ານມາ ຊຶ່ງກວມເອົາ 3 ເສົາຄ້ຳປະຊາຄົມອາຊຽນຄື:
    ດ້ານການເມືອງ-ຄວາມໝັ້ນຄົງ: ອາຊຽນ ໄດ້ຮັບຜົນສຳເລັດ ສຳຄັນຫຼາຍດ້ານເປັນຕົ້ນ ການສ້າງຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ ບົນພື້ນຖານຫຼັກການທີ່ອາຊຽນເປັນຜູ້ສ້າງຂຶ້ນ ແລະ ໄດ້ກຳນົດໄວ້ໃນກົດບັດອາຊຽນ ກໍຄື ສົນທິສັນຍາໄມຕີຈິດ ແລະ ການຮ່ວມມື ຊຶ່ງໄດ້ເອື້ອອຳນວຍໃຫ້ແກ່ການຮ່ວມມືດ້ານເສດຖະກິດ ແລະ ວັດທະນະທຳ-ສັງຄົມ ລະຫວ່າງປະເທດສະມາຊິກອາຊຽນດ້ວຍກັນ ກໍຄືກັບພາຍນອກ ອັນໄດ້ປະກອບສ່ວນສຳຄັນໃນການສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ.
ດ້ານເສດຖະກິດ: ໂດຍລວມ ອາຊຽນ ຍັງເປັນພາກພື້ນໜຶ່ງທີ່ມີເສດຖະກິດຂະຫຍາຍຕົວຢ່າງຕໍ່ເນື່ອງໃນທ່າມກາງທີ່ເສດຖະກິດໂລກທົດຖອຍ. ຕໍ່ໜ້າສະພາບການດັ່ງກ່າວ, ອາຊຽນ ຈະເພີ່ມທະວີການຄ້າ ແລະ ການລົງທຶນພາຍໃນອາຊຽນຫຼາຍຂຶ້ນ ລວມທັງສ້າງພື້ນຖານໂຄງລ່າງ ແລະ ຊັບພະຍາກອນມະນຸດ ເພື່ອຮອງຮັບສິ່ງທ້າທາຍ ກໍຄືກາລະໂອກາດຈາກການປ່ຽນແປງ ແລະ ຄວາມທັນສະໄໝ ທາງດ້ານເຕັກໂນໂລຊີໃນຍຸກແຫ່ງການປະຕິວັດອຸດສາຫະກຳ 4.0. ພ້ອມນີ້, ອາຊຽນ ຈະສຸມໃສ່ການຈັດຕັ້ງປະຕິບັດ ສັນຍາເຂດການຄ້າເສລີ ແລະ ສັນຍາການລົງທຶນ ແລະ ຂຸ້ນຂ້ຽວສຳເລັດການເຈລະຈາສັນຍາການເປັນຄູ່ຮ່ວມເສດຖະກິດຮອບດ້ານລະດັບພາກພື້ນ ໃນທ້າຍປີນີ້. ນອກຈາກນີ້, ພາຍໃນອາຊຽນເອງ ຍັງຈະໄດ້ສືບຕໍ່ເອົາໃຈໃສ່ການຮັດແຄບຄວາມແຕກໂຕນດ້ານການພັດທະນາ ດ້ວຍການຈັດຕັ້ງປະຕິບັດ ຂໍ້ລິເລີ່ມວ່າດ້ວຍ ການເຊື່ອມໂຍງອາຊຽນ, ການຮ່ວມມືດ້ານດີຈີຕອນ ແລະ ການເຊື່ອມຈອດອາຊຽນ.
ດ້ານວັດທະນະທຳ-ສັງຄົມ: ໂດຍລວມແລ້ວ, ປະເທດສະມາຊິກອາຊຽນ ແມ່ນຢູ່ຮ່ວມກັນຢ່າງສັນຕິ ແລະ ກົມກຽວ ໃນທ່າມກາງຄວາມຫຼາກຫຼາຍດ້ານວັດທະນະທຳ, ພາສາ ແລະ ສາສະໜາ ດ້ວຍການເພີ່ມທະວີການໄປມາຫາສູ່ລະຫວ່າງປະຊາຊົນກັບປະຊາຊົນ ຊຶ່ງທັງໝົດນີ້ ໄດ້ປະກອບ ສ່ວນອັນສໍາຄັນເຂົ້າໃນການສ້າງປະຊາຄົມອາຊຽນໃຫ້ເປັນປະຊາຄົມທີ່ໂອບເອື້ອອາລີ, ມີຊັບພະຍາ ກອນມະນຸດ ທີ່ມີຄວາມຮູ້ຄວາມສາມາດ ແລະ ມີສຸຂະພາບແຂງແຮງ.
    ການພົວພັນຮ່ວມມືກັບພາຍນອກ: ອາຊຽນ ໄດ້ສືບຕໍ່ປະຕິບັດນະໂຍບາຍເປີດກວ້າງສູ່ພາຍນອກ ຢ່າງສະເໝີຕົ້ນສະເໝີປາຍ ແລະ ໄດ້ຮັບຜົນສໍາເລັດເປັນກ້າວໆມາ. ໃນນີ້, ອາຊຽນໄດ້ເພີ່ມທະວີການພົວພັນຮ່ວມມືກັບບັນດາປະເທດຄູ່ເຈລະຈາ ແລະ ຄູ່ຮ່ວມພາຍນອກ ລວມທັງປະເທດມະຫາອຳນາດ, ຄູ່ຮ່ວມຂະແໜງການ ແລະ ຄູ່ຮ່ວມພັດທະນາບົນພື້ນຖານຫຼັກການ ແລະ ກົນໄກທີ່ອາຊຽນເປັນຜູ້ສ້າງຂຶ້ນ ອັນໄດ້ປະກອບສ່ວນສໍາຄັນເຂົ້າໃນການສ້າງປະຊາຄົມອາຊຽນໃຫ້ເຂັ້ມແຂງ ແລະ ວັດທະນາຖາວອນ ກໍຄືການປົກປັກຮັກສາ ແລະ ສ້າງສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ. ມາເຖິງປັດຈຸບັນມີ 92 ປະເທດນອກພາກພື້ນອາຊຽນ ໄດ້ແຕ່ງຕັ້ງທູດຂອງຕົນປະຈໍາອາຊຽນ. ພິເສດ, ໃນກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 52 ໃນອາທິດຜ່ານມາ ທີ່ ບາງກອກ ປະເທດໄທ, ອາຊຽນໄດ້ເຫັນດີຮັບເອົາປະເທດ ຊີເລ ເປັນຄູ່ຮ່ວມພັດທະນາອາຊຽນ ແລະ ຮັບເອົາປະເທດ ເປຣູ ເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມື.
ບັນດາທ່ານ, ພໍ່ແມ່ພີ່ນ້ອງ ທີ່ ຮັກແພງທັງຫຼາຍ
    ຕະຫຼອດໄລຍະ 22 ປີ ທີ່ ສປປ ລາວເຮົາ ເຂົ້າເປັນສະມາຊິກອາຊຽນ, ພວກເຮົາໄດ້ເຂົ້າຮ່ວມຢ່າງຕັ້ງໜ້າ ໃນຂະບວນການລວມຂອງອາຊຽນ ກໍຄື ການຈັດຕັ້ງປະຕິບັດບັນດາແຜນງານ ແລະ ໂຄງການຂອງອາຊຽນຢ່າງເຕັມສ່ວນ ດ້ວຍຄວາມຮັບຜິດຊອບສູງ. ທັງໝົດນີ້, ໄດ້ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ຊື່ງຖືໄດ້ວ່າ ເປັນໝາກຜົນແຫ່ງການດຳເນີນນະໂຍບາຍການຕ່າງປະເທດແຫ່ງ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ ກໍຄືແນວທາງການປ່ຽນແປງໃໝ່ຂອງພັກ-ລັດເຮົາ ເພື່ອເປັນການສົມທົບທ່າແຮງພາຍໃນ ບວກກັບກຳລັງແຮງສັງລວມຂອງພາກພື້ນ ແລະ ທ່າອ່ຽງລວມຂອງຍຸກສະໄໝ; ພິເສດ, ເປັນການປະກອບສ່ວນເຂົ້າໃນການສ້າງປະຖົມປັດໄຈທີ່ໜັກແໜ້ນໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ນອກຈາກນີ້, ພວກເຮົາ ຍັງໄດ້ຮ່ວມມືກັບປະເທດສະມາຊິກອາຊຽນ ດໍາເນີນນະໂຍບາຍການພັດທະນາເສດຖະກິດ-ສັງຄົມ ແບບຍືນຍົງ ດ້ວຍການໝູນໃຊ້ທ່າແຮງພາຍໃນ ບວກກັບການຮ່ວມມືກັບພາກເອກະຊົນ ແລະ ການຊ່ວຍເຫຼືອຈາກປະເທດເພື່ອນມິດອາຊຽນ, ຄູ່ເຈລະຈາ ແລະ ຄູ່ຮ່ວມມືພາຍນອກອາຊຽນ ກໍຄື ຈາກບັນດາອົງການຈັດຕັ້ງສາກົນ ແລະ ສະຖາບັນການເງິນ. ໃນນີ້, ໄດ້ສຸມໃສ່ປັບປຸງສະພາບແວດລ້ອມ ທີ່ເອື້ອອໍານວຍໃຫ້ແກ່ການຄ້າ ແລະ ການລົງທຶນ ໃຫ້ມີຄວາມສະດວກວ່ອງໄວ ແລະ ຫັນໄປສູ່ການເປັນທັນສະໄໝເທື່ອລະກ້າວ ແລະ ຫັນພື້ນຖານເສດຖະກິດ ຈາກອຸດສາຫະກໍາ ທີ່ອີງໃສ່ແຕ່ຊັບພະຍາກອນທຳມະຊາດ, ບໍ່ແຮ່, ໄຟຟ້າ, ການສົ່ງອອກວັດຖຸດິບ (Commodity) ໄປສູ່ອຸດສາຫະກຳປຸງແຕ່ງ, ການບໍລິການ ເພື່ອສ້າງວຽກເຮັດງານທຳ ແລະ ເພີ່ມລາຍຮັບ ໃຫ້ແກ່ປະຊາຊົນ.
    ຕະຫຼອດໄລຍະ 22 ປີ ຂອງການເປັນສະມາຊິກອາຊຽນ, ສປປ ລາວ ໄດ້ຮັບຜົນປະໂຫຍດຫຼາຍດ້ານ ບໍ່ວ່າດ້ານການເມືອງ-ຄວາມໝັ້ນຄົງ, ເສດຖະກິດ-ການຄ້າ ແລະ ການພັດທະນາແບບຍືນຍົງ. ພ້ອມດຽວກັນນີ້ ກໍຍັງໄດ້ຍົກສູງຖານະບົດບາດຂອງ ສປປ ລາວ ໃຫ້ສູງເດັ່ນຂື້ນໃນເວທີພາກພື້ນ ແລະ ສາກົນ; ສປປ ລາວ ສືບຕໍ່ໄດ້ຮັບຄວາມໄວ້ເນື້ອເຊື່ອໃຈ ແລະ ການສະໜັບສະໜູນຊ່ວຍເຫຼືອຈາກປະເທດອາຊຽນ ແລະ ຄູ່ເຈລະຈາ ໃນຂອບສອງຝ່າຍ ແລະ ຫຼາຍຝ່າຍ; ຮີດຄອງປະເພນີອັນດີງາມຂອງ ສປປ ລາວ ໄດ້ຮັບການສົ່ງເສີ່ມ ແລະ ຮັບຮູ້ຢ່າງກວ້າງຂວາງ, ຊັບພະຍາກອນມະນຸດຂອງພວກເຮົາ ນັບມື້ນັບໄດ້ຮັບການພັດທະນາທາງດ້ານເຕັກນິກວິຊາການຢ່າງຮອບດ້ານເທື່ອລະກ້າວ.
    ນອກຈາກນີ້, ການພົວພັນຮ່ວມມືກັບພາຍນອກຂອງອາຊຽນ ໂດຍຜ່ານກົນໄກຕ່າງໆ ຂອງອາຊຽນ ໄດ້ເຮັດໃຫ້ການພົວພັນຂອງ ສປປ ລາວ ກັບບັນດາປະເທດມະຫາອຳນາດ ໂດຍສະເພາະກັບ ສປ ຈີນ, ຣັດເຊຍ, ອະເມຣິກາ, ອິນເດຍ, ຍີ່ປຸ່ນ, ສ ເກົາຫຼີ ແລະ ອື່ນໆ ມີຄວາມຮັດແໜ້ນຍິ່ງຂຶ້ນ ໂດຍສະເພາະໃນເວລາທີ່ ສປປ ລາວ ເປັນປະເທດປະສານງານອາຊຽນກັບຄູ່ເຈລະຈາໃຫຍ່ເຊັ່ນ: ເປັນປະເທດປະສານງານອາຊຽນ-ອາເມຣິກາ 2018-2021; ເປັນປະທານຮ່ວມກັບ ສປ. ຈີນ ແລະ ການາດາ ໃນຂອບເວທີປຶກສາຫາລືພາກພື້ນອາຊຽນດ້ານບັນເທົາທຸກໄພພິບັດ 2018-2021; ແລະ ກະຊວງປ້ອງກັນປະເທດ ແຫ່ງ ສປປ ລາວ ເປັນປະທານຮ່ວມກັບ ກະຊວງປ້ອງກັນປະເທດ ຣັດເຊຍ ໃນວຽກງານເກັບກູ້ລະເບີດເພື່ອມະນຸດສະທຳ 2017-2020.
ບັນດາທ່ານ, ບັນດາສະຫາຍ ແລະ ພໍ່ແມ່ພີ່ນ້ອງທັງຫຼາຍ
    ປີນີ້ ພວກເຮົາຮ່ວມກັນສະເຫຼີມສະຫຼອງອາຊຽນຄົບຮອບ 52 ປີ ແລະ ສປປ ລາວ ເຂົ້າເປັນສະມາຊິກອາຊຽນ ຄົບຮອບ 22 ປີ ໃນທ່າມກາງທີ່ອາຊຽນສືບຕໍ່ຮັກສາ ແລະ ເສີມຂະຫຍາຍຜົນສຳເລັດທີ່ຕົນຍາດມາໄດ້ ດ້ວຍການດໍາເນີນການພົວພັນຮ່ວມມືອາຊຽນ ບົນພື້ນຖານຫຼັກການທີ່ໄດ້ກໍານົດໄວ້ໃນກົດບັດອາຊຽນ, ຊຶ່ງທັງໝົດນີ້ ຈະເຮັດໃຫ້ອາຊຽນສືບຕໍ່ມີສັນຕິພາບ, ສະຖຽນລະພາບ, ວັດທະນາຖາວອນ, ມີຄວາມສາມັກຄີ ແລະ ມີຄວາມເປັນເອກະພາບພາຍໃນ.
    ອາຊຽນ ຈະສືບຕໍ່ເພີ່ມທະວີການຊ່ວຍເຫຼືອ ຊຶ່ງກັນ ແລະ ກັນ ເພື່ອຮັບປະກັນຄວາມຍືນຍົງ, ການຈະເລີນເຕີບໂຕດ້ານເສດຖະກິດ, ການຮັດແຄບຄວາມແຕກໂຕນດ້ານການພັດທະນາ ແລະ ການເຊື່ອມຈອດຂອງອາຊຽນ ໃຫ້ທະລຸໂລ່ງຮອບດ້ານ.
ຕະຫຼອດໄລຍະ 22 ປີ ທີ່ ສປປ ລາວເຮົາເປັນສະມາຊິກອາຊຽນ, ການທີ່ພວກເຮົາສາມາດຍາດໄດ້ຜົນສຳເລັດເປັນກ້າວໆມານັ້ນ ກໍຍ້ອນໄດ້ຮັບການຊີ້ນຳ-ນຳພາຢ່າງແທດເຖິງ ຂອງການນໍາພັກ-ລັດ ແລະ ຍ້ອນຄວາມເປັນເຈົ້າການຂອງພະນັກງານ, ລັດຖະກອນທຸກພາກສ່ວນ ນັບແຕ່ສູນກາງລົງຮອດທ້ອງຖິ່ນ ທີ່ໄດ້ປະກອບສ່ວນເຂົ້າໃນວຽກງານອາຊຽນຢ່າງຫ້າວຫັນ, ເຕັມສ່ວນ ແລະ ມີປະສິດທິພາບສູງ. ນະໂອກາດນີ້, ຂ້າພະເຈົ້າຂໍຕາງໜ້າໃຫ້ ລັດຖະບານ ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນຢ່າງເລິກເຊິ່ງ ຕໍ່ການຊ່ວຍເຫຼືອສະໜັບສະໜູນ ແລະ ການປະກອບສ່ວນຂອງທຸກພາກສ່ວນ ຢ່າງສຸດໃຈ.
    ພ້ອມກັນນີ້, ຂ້າພະເຈົ້າ ຂໍຮຽກຮ້ອງມາຍັງພະນັກງານ, ທະຫານ, ຕຳຫຼວດ, ນັກສຶກສາປັນຍາຊົນ ຕະຫຼອດຮອດປະຊາຊົນລາວບັນດາເຜົ່າ ຈົ່ງພ້ອມກັນເພີ່ມທະວີຄວາມເປັນເຈົ້າການໃນການຜັນຂະຫຍາຍແນວທາງນະໂຍບາຍການຕ່າງປະເທດຂອງພັກ ແລະ ລັດຖະບານເຮົາ, ລວມທັງວຽກງານອາຊຽນ ເພື່ອຍາດເອົາຜົນປະໂຫຍດອັນສູງສຸດ ມາສູ່ປະເທດຊາດ ແລະ ປະຊາຊົນ ກໍ່ຄືເພື່ອປະກອບສ່ວນເຂົ້າໃນພາລະກິດລວມແຫ່ງການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ, ຄວາມວັດທະນາຖາວອນ ແລະ ຄວາມສົມບູນພູນສຸກຂອງພາກພື້ນ ແລະ ສາກົນ.
    ສຸດທ້າຍນີ້, ຂ້າພະເຈົ້າ ຂໍອວຍພອນໄຊອັນປະເສີດ ມາຍັງບັນດາການນໍາພັກ-ລັດ, ພະນັກງານ, ທະຫານ, ຕໍາຫຼວດ, ນັກທຸລະກິດ, ພໍ່ຄ້າຊາວຂາຍ ແລະ ປວງຊົນລາວ ທຸກຖ້ວນໜ້າ ທັງຢູ່ພາຍໃນ ແລະ ຕ່າງປະເທດ ຈົ່ງມີສຸຂະພາບເຂັ້ມແຂງ, ມີຄວາມສຸກກາຍສະບາຍໃຈ, ປະສົບຜົນສໍາເລັດໃນໜ້າທີ່ວຽກງານ ແລະ ຮ່ວມກັນ ສະເຫຼີມສະຫຼອງ ວັນສ້າງຕັ້ງອາຊຽນຄົບຮອບ 52 ປີ ແລະ ວັນເຂົ້າອາຊຽນ ຂອງ ສປປ ລາວ ຄົບຮອບ 22 ປີ ຢ່າງມີເນື້ອໃນ ແລະ ເໝາະສົມ.