ສານຊົມເຊີຍ


02.09.2019 12:16     

    ພະນະທ່ານ ບຸນຍັງ ວໍລະຈິດ ໄດ້ສົ່ງສານຊົມເຊີຍ ເຖິງ ສົມເດັດ ອັນຊຸນຕານ ອັບດູນລາ ຣີ ອາຢາຕູດິນ ອັນມູສຕາຟາບິນລາຊາອິບນີອັນມາຣູມ ຊູນຕານຮາຈິອາມັດຊາ ອັນມູສຕາອິນບິນລາ ເຈົ້າຊີວິດ ແຫ່ງ ມາເລເຊຍ ທີ່ ກົວລາລຳເປີ ຊຶ່ງມີເນື້ອໃນວ່າ:
ສົມເດັດ ຣາຊາທິບໍດີ, ເນື່ອງໃນໂອກາດວັນປະກາດເອກະລາດ ແຫ່ງ ມາເລເຊຍ ຄົບຮອບ 62 ປີ ໃນນາມປະຊາຊົນລາວທັງຊາດ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄໍາຊົມເຊີຍອັນອົບອຸ່ນ ແລະ ພອນໄຊອັນປະເສີດ ມາຍັງ ສົມເດັດ ຣາຊາທິບໍດີ ແລະ ປະຊາຊົນມາເລເຊຍ ເພື່ອນມິດທຸກຖ້ວນໜ້າ.
    ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງທີ່ເຫັນວ່າ ຕະຫຼອດໄລຍະເວລາຫຼາຍກວ່າ 5 ທົດສະວັດທີ່ຜ່ານມາ, ການພົວພັນ ແລະ ຮ່ວມມືສອງຝ່າຍ ລະຫວ່າງ ສປປ ລາວ ແລະ ມາເລເຊຍ, ໄດ້ຮັບການຮັດແໜ້ນ ແລະ ຂະຫຍາຍຕົວຢ່າງເລິກເຊິ່ງ ໃນຫຼາຍຂົງເຂດ ທັງໃນຂອບສອງຝ່າຍ ແລະ ຫຼາຍຝ່າຍ ອັນໄດ້ນຳຜົນປະໂຫຍດຕົວຈິງ ມາສູ່ປະຊາຊົນສອງຊາດ ກໍຄືເພື່ອສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ໃນພາກພື້ນ ແລະ ໃນໂລກ.
    ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໄຊອັນປະເສີດແດ່ສົມເດັດ ຣາຊາທິບໍດີຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສຳເລັດໜ້າທີ່ອັນສູງສົ່ງ ຂອງພະອົງ ແລະ ຂໍໃຫ້ປະຊາຊົນມາເລເຊຍ ຈົ່ງສືບຕໍ່ມີຄວາມຈະເລີນກ້າວໜ້າ ແລະ ວັດທະນາຖາວອນຍິ່ງໆຂຶ້ນ. ດ້ວຍຄວາມເຄົາລົບ ແລະ ນັບຖືເປັນຢ່າງສູງ.
    ໃນໂອກາດດຽວກັນ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ພະນະທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ກໍໄດ້ສົ່ງສານຊົມເຊີຍເຖິງຄູ່ຮ່ວມຕຳແໜ່ງແຫ່ງ ມາເລເຊຍ ເຊັ່ນດຽວກັນ.