ສານ​ສະ­ແດງ​ຄວາມ​ເຫັນ­ໃຈ​ຈາກລັດ­ຖະ­ບານ​ໄທ

 

23.09.2019 10:26     

   ທ່ານພົນ​ເອກ ປ​ຣະ​ຍຸດ ຈັນ​ໂອ​ຊາ ນາ​ຍົກ​ລັດ​ຖະ​ມົນ​ຕີ ແຫ່ງ ຣາ​ຊະ​ອາ​ນາ​ຈັກ​ໄທ ໄດ້​ສົ່ງ​ສານ​ສະ​ແດງ​ຄວາມ​ເຫັນ​ໃຈ​ເຖິງ ທ່ານ ທອງ​ລຸນ ສີ​ສຸ​ລິດ ນາ​ຍົກ​ລັດ​ຖະ​ມົນ​ຕີ ແຫ່ງ ສ​ປ​ປ ລາວ ເມື່ອບໍ່​ດົນ​ມານີ້, ເນື້ອ​ໃນ​ສານ​ລະ​ບຸ​ວ່າ:
ຂ້າ​ພະ​ເຈົ້າ​ໄດ້​ຮັບ​ຊາບ​ດ້ວຍ​ຄວາມ​ເສຍ​ໃຈ​ຢ່າງ​ຍິ່ງ ກ່ຽວ​ກັບ​ເຫດ​ອຸ​ທົກ​ກະ​ໄພ​ຈາກ​ພາ​ຍຸ​ເຂດ​ຮ້ອນ​ໂພ​ດູນ ແລະ ພາ​ຍຸ​ເຂດ​ຮ້ອນ​ຄາ​ຈິ​ກິ ທີ່​ພັດ​ເຂົ້າ​ພື້ນ​ທີ່​ທາງ​ພາກ​ໃຕ້​ຂອງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ໃນ​ໄລ​ຍ​​ະ​ທ້າຍ​ເດືອນ​ສິງ​ຫາ​ເຖິງ​ຕົ້ນ​ເດືອນ​ກັນ​ຍາ​ທີ່​ຜ່ານ​ມາ ເຮັດ​ໃຫ້​ເກີດ​ຄວາມ​ເສຍ​ຫາຍ​ແກ່​ຊີ​ວິດ ແລະ ຊັບ​ສິນ​ຂອງ​ປະ​ຊາ​ຊົນ​ລາວ ທີ່​ອາ​ໄສ​ຢູ່​ໃນ​ພື້ນ​ທີ່​ດັ່ງ​ກ່າວ​ຢ່າງ​ຫຼວງ​ຫຼາຍ.
   ໃນ​ນາມ​ລັດ​ຖະ​ບານ​ໄທ ແລະ ປະ​ຊາ​ຊົນ​ໄທ ແລະ ໃນ​ນາມ​ສ່ວນ​ຕົວ ຂ້າ​ພະ​ເຈົ້າ​ຂໍ​ສະ​ແດງ​ຄວາມ​ເສຍ​ໃຈ​ຢ່າ​ງ​ສຸດຊຶ້ງມາ​ຍັງ​ທ່ານ​ນາ​ຍົກ​ລັດ​ຖະ​ມົນ​ຕີ, ລັດ​ຖະ​ບານ ແລະ ປະ​ຊາ​ຊົນ​ລາວ ໂດຍ​ສະ​ເພາະ​ຢ່າງ​ຍິ່ງ ຜູ້​ທີ່​ປະ​ສົບ​ໄພ ແລະ ຄອບ​ຄົວ​ທີ່​ສູນ​ເສຍ​ຈາກ​ເຫດ​ການ​ຄັ້ງ​ນີ້.
ຂ້າ​ພະ​ເຈົ້າ​ເຊື່ອ​ໝັ້ນ​ວ່າ ​ພາຍ​ໃຕ້​ການ​ນຳ​ຂອງ​ທ່ານ ແລະ ການ​ເບິ່ງ​ແຍງ​ເອົາ​ໃຈ​ໃສ່​ຢ່າງ​ໃກ້​ຊິດ​ຂອງ​ລັດ​ຖະ​ບານ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ສະ​ຖາ​ນະ​ການ​ດັ່ງ​ກ່າວ ຈະ​ບັນ​ເທົາ​ລົງ​ໂດຍ​ໄວ ແລະ ຫາກ​ມີ​ສິ່ງ​ໃດ ທີ່​ລັດ​ຖ​ະ​ບານ​ໄທ​ຈະ​ສາ​ມາດ​ຊ່ວຍ​ເຫຼືອ​ໄດ້ ຂໍ​ໃຫ້​ແຈ້ງ​ຝ່າຍ​ໄທ​ຊາບ ໄທ​ພ້ອມ ແລະ ມຸ່ງ​ໝັ້ນ​ທີ່​ຈະ​ສະ​ໜັບ​ສະ​ໜູນ ແລະ ຊ່ວຍ​ເຫຼືອ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ຢ່າງ​ເຕັມ​ທີ່ ໃຫ້​ກ້າວ​ພົ້ນ​ວິ​ກິດ​ການ​ໃນ​ຄັ້ງ​ນີ້​ໂດຍ​ໄວ.
   ໃນ​ໂອ​ກາດ​ດຽວ​ກັນ​ນີ້ ທ່ານ ດອນ ປະ​ຣະ​ມັດ​ວິ​ໄນ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແຫ່ງ ຣາ​ຊະ​ອາ​ນາ​ຈັກ​ໄທ ກໍ​ໄດ້​ສົ່ງ​ສານ​ສະ​ແດງ​ຄວາມ​ເຫັນ​ໃຈ​ເຖິງ ທ່ານ ສະ​ເຫຼີມ​ໄຊ ກົມ​ມະ​ສິດ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແຫ່ງ ສ​ປ​ປ ລາວ ເຊັ່ນ​ດຽວ​ກັນ.