Chania

ປີໜ້າລັດຕັ້ງເປົ້າເກັບລາຍຮັບໃຫ້ໄດ້ 23 ພັນກວ່າຕື້ກີບ

   ເພື່ອຈັດຕັ້ງປະຕິບັດແຜນພັດທະນາເສດຖະກິດສັງຄົມ 2017 ໃຫ້ບັນລຸປະສິດທິຜົນສູງລັດຈັດວາງແຜນການເກັບລາຍຮັບເຂົ້າ ງົບປະມານໝົດປີໃຫ້ໄດ້ 23 ພັນຕື້ກວ່າກີບ ສະນັ້ນຈິ່ງຈຳເປັນຕ້ອງເພີ່ມທະວີຄວາມເອົາໃຈໃສ່ຕໍ່ການນຳໃຊ້ກົດໝາຍ, ນິຕິກຳລຸ່ມກົດ ໝາຍພ້ອມທັງຂຶ້ນບັນຊີເກັບກຳຈຳນວນຫົວໜ່ວຍທຸລະກິດຖືລະບົບບັນຊີ, ຊຸກຍູ້ຫົວໜ່ວຍທຸລະກິດທີ່ ມີເງື່ອນໄຂເຂົ້າສູ່ລະບົບອາກອນມູນຄ່າເພີ່ມ, ຫັນການເກັບລາຍຮັບງົບປະມານດ້ວຍການນຳໃຊ້ເຄື່ອງມືທີ່ທັນສະໄໝເພື່ອເຮັດໃຫ້ການຈັດຕັ້ງປະຕິບັດການເກັບລາຍຮັບບັນລຸໄດ້ຕາມແຜນການທີ່ວາງໄວ້.
   ອີງຕາມຂໍ້ມູນລາຍງານໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ VIII ໃຫ້ຮູ້ວ່າ: ແຜນການຈັດຕັ້ງປະຕິ ບັດການເກັບລາຍຮັບເຂົ້າງົບປະມານໃນປີ 2017 ຂອງລັດຖະບານແມ່ນ ໃຫ້ໄດ້ທັງໝົດ 23.941 ຕື້ກີບ ໃນນັ້ນລາຍຮັບພາຍໃນ 21.463 ຕື້ກີບ ຊຶ່ງປະກອບມີລາຍຮັບຈາກສ່ວຍສາອາກອນ 11.015 ຕື້ກີບ, ພາສີ 6.650 ຕື້ກີບ, ການຄຸ້ມຄອງການເງິນລັດ ວິສາຫະກິດ 1.350 ຕື້ກີບ, ຊັບສິນຂອງລັດ 2.441 ຕື້ກີບ ແລະລາຍຮັບອື່ນໆ 7 ຕື້ກີບ ນອກນັ້ນ ຍັງມີລາຍຮັບຈາກການຊ່ວຍເຫຼືອ ລ້າ 2.478 ຕື້ກີບ.
   ສ່ວນທາງດ້ານລາຍຈ່າຍງົບປະມານທັງໝົດ 32.402 ຕື້ກີບ ໃນນັ້ນເງິນເດືອນ, ເງິນອຸດໜູນ 10.500 ຕື້ກີບ, ເງິນນະໂຍບາຍ, ເງິນຊ່ວຍໜູນຕ່າງໆ 1.700 ຕື້ກີບ, ເງິນບໍລິຫານ 2.800 ຕື້ກີບ, ດັດສົມສົ່ງເສີມ 1.580 ຕື້ກີບ, ເງິນແຮລັດຖະບານ 100 ຕື້ກີບ, ຄັງສະສົມແຫ່ງລັດ 300 ຕື້ກີບ, ຊຳລະໜີ້ສິນ 1.881 ຕື້ກີບ ແລະຈ່າຍລົງທຶນ 13.541 ຕື້ກີບ (ຕ່າງປະເທດ 8.078 ຕື້ກີບ, ພາຍໃນ 5.463 ຕື້ກີບ ໃນນີ້ ລົງທຶນປົກກະຕິ 3.300 ຕື້ກີບ ໃນນັ້ນເລື່ອນຈ່າຍຈາກສົກປີ 2015-2016 ຈຳນວນ 500 ຕື້ກີບຈັດແບ່ງຕົວຈິງສຳລັບ 2017 ຈຳນວນ 2.800 ຕື້ກີບ, ສ່ວນວ່າການ ຂາດດຸນງົບປະມານບໍ່ໃຫ້ເກີນ 6 .52% ຂອງຈີດີພີ.
   ແນວໃດກໍດີ ເພື່ອເຮັດໃຫ້ການຈັດຕັ້ງປະຕິບັດການເກັບລາຍຮັບ ໄດ້ຕາມແຜນການດັ່ງກ່າວຕ້ອງໄດ້ເອົາໃຈໃສ່ສ້າງ ແລະປັບປຸງ ບັນດານິຕິກຳລຸ່ມກົດໝາຍໃນຂະແໜງການເງິນ, ເພີ່ມເຄື່ອງມືໃນການຄຸ້ມຄອງການຈັດເກັບລາຍຮັບ ແລະຄຸ້ມຄອງລາຍຈ່າຍໃນຂອບເຂດທົ່ວປະເທດ, ສືບຕໍ່ປັບປຸງກົງຈັກ ແລະພັດທະນາບຸກ ຄະລາກອນໃນຂົງເຂດການເງິນໃນທຸກຂັ້ນໃຫ້ມີຄວາມຮູ້, ຄວາມສາມາດມີຄວາມຮັບຜິດຊອບໃນການປະຕິບັດໜ້າທີ່, ແກ້ໄຂປາກົດການຫຍໍ້ທໍ້ໃນຖັນແຖວພະນັກງານການເງິນຢ່າງເຂັ້ມງວດ, ເພີ່ມທະວີການຕິດຕາມ ກວດກາການຈັດຕັ້ງປະຕິບັດກົດໝາຍ ແລະ ລະບຽບການຂອງຂະແໜງການເງິນທຸກຂັ້ນໃຫ້ປົກກະຕິ ແລະເຂັ້ມງວດ.


ຂໍຂອບໃຈ




ຈາກແຫຼ່ງຂ່າວ: ໜັງສືພິມເສດຖະກິດ-ສັງຄົມ