Chania

ຮອງນາຍົກຊີ້ ນຳການເງິນ ຈຸດສ່ຽງພະນັກງານ ເຮັດຜິດພາດຕ້ອງແກ້ ທັນຄວັນຫຼີກບັນຫາ ສັງຄົມວິຈານ

   ຮອງນາຍົກລັດຖະມົນຕີ, ລັດຖະມົນຕີກະຊວງການເງິນຊີ້ນຳໃຫ້ຄະນະພັກຄະນະນຳຂັ້ນຕ່າງໆໃນຂະແໜງການເງິນທົ່ວປະເທດຈົ່ງເພີ່ມທະວີເອົາໃຈໃສ່ບາງບັນຫາສຳຄັນຢູ່ພາຍໃນຄວາມຮັບຜິດຊອບຂອງຕົນໂດຍສະເພາະແມ່ນວຽກຄຸ້ມຄອງກວດກາບ່ອນໃດທີ່ມີຄວາມຫຼໍ່ແຫຼມ ແລະສ່ຽງຕໍ່ພະນັກງານຈະເຮັດຜິດພາດຕ້ອງແກ້ໄຂໃຫ້ທັນການບໍ່ປ່ອຍໃຫ້ແກ່ຍາວ ຫຼື ບໍ່ ມີການແກ້ໄຂທັງນີ້ກໍເພື່ອຫຼີກເວັ້ນຫາງສຽງວິພາກວິຈານຈາກສັງຄົມ ລວມທັງເປັນການກະຕຸກຊຸກຍູ້ການຈັດເກັບລາຍຮັບເຂົ້າງົບປະມານໃຫ້ໄດ້ຕາມແຜນ ຫຼື ລື່ນເປົ້າໝາຍທີ່ວາງໄວ້.
   ໃນໂອກາດທີ່ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງີນເຂົ້າຮ່ວມເປັນປະທານກອງປະຊຸມວຽກງານຈັດຕັ້ງກໍ່ສ້າງພະນັກງານ ແລະກວດກາການເງິນທົ່ວປະເທດປະຈຳປີ 2015-2016 ທີ່ຈັດຂຶ້ນໃນລະຫວ່າງວັນ ທີ 12-13 ພຶດສະພາ 2016 ຢູ່ສູນການຮ່ວມມືສາກົນ ແລະຝຶກອົບຮົມຫຼັກ 5 ນະຄອນຫຼວງວຽງຈັນນອກຈາກໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານພົ້ນເດັ່ນຂອງການຈັດຕັ້ງປະຕິບັດວຽກງານຕະຫຼອດໄລຍະຜ່ານມາແລ້ວທ່ານຍັງໄດ້ແນະນຳຫຼາຍບັນຫາໃຫ້ຂະແຫນງການເງິນເພີ່ມທະວີສຸມເອົາໃຈໃສ່ຈັດ ຕັ້ງປະຕິບັດໃຫ້ເກີດຜົນໃນຕໍ່ໜ້າ.
   ສະເພາະວຽກງານກວດກາທ່ານຮອງນາຍົກແນະນຳໃຫ້ຄະນະພັກຄະນະນຳຂັ້ນຕ່າງໆຂອງຂະແໜງການເງິນເອົາໃຈໃສ່ຕໍ່ການຄຸ້ມຄອງ, ເພີ່ມທະວີວຽກງານກວດກາຕິດຕາມການປະຕິບັດໜ້າທີ່ວຽກງານຂອງພະນັກງານຢູ່ພາຍໃນຄວາມຮັບຜິດຊອບຂອງຕົນໃຫ້ໜັກແໜ້ນເປັນຕົ້ນແມ່ນຢູ່ຂັ້ນແຂວງ, ເມືອງ, ບັນດາດ່ານ, ປ້ອມຕ່າງໆ, ບ່ອນທີ່ມີຄວາມຫຼໍ່ແຫຼມ, ບ່ອນທີ່ມີຄວາມສ່ຽງຕໍ່ພະນັກງານທີ່ຈະເຮັດຜິດພາດ,ຖ້າມີບັນຫາກໍຕ້ອງໄດ້ເອົາໃຈໃສ່ແກ້ໄຂໃຫ້ທັນການ, ບໍ່ປ່ອຍປະໃຫ້ສັງຄົມວິພາກວິຈານຕໍ່ຂະແໜງການເຮົາ, ໃຫ້ສືບຕໍ່ຕິດຕາມການກວດກາ, ປັບປຸງຄຸນນະພາບຂອງການຈັດຕັ້ງພັກ, ສະມາຊິກພັກໃຫ້ສູງຂຶ້ນຕື່ມ, ການຈັດຕັ້ງປະຕິບັດວຽກງານວິຊາສະເພາະ, ຄະນະພັກຄະນະນຳກະຊວງ ແລະກົມກອງຕ່າງໆໃຫ້ສືບຕໍ່ລົງທ້ອງຖິ່ນຮາກຖານເພື່ອຊຸກຍູ້ການປະຕິບັດໜ້າທີ່ວຽກງານຂອງພະນັກງານໃດ ໂດຍສະເພາະແມ່ນການຈັດເກັບລາຍຮັບໃຫ້ໄດ້ຕາມແຜນ ແລະລື່ນແຜນການທີ່ວາງໄວ້.
   ຄຽງຄູ່ກັນນັ້ນກໍຕ້ອງເປັນເຈົ້າການຊີ້ນຳວຽກງານກວດກາການເງິນໃນຂອບເຂດຄວາມຮັບຜິດຊອບຂອງຕົນ ແລະເຄື່ອນໄຫວເປັນປົກກະຕິໂດຍສະເພາະການກວດກາພາຍໃນ ແລະການປະຕິບັດພັນທະຂອງຜູ້ປະກອບການໃຫ້ປະຕິບັດຕາມກົດໝາຍທີ່ລັດປະກາດໃຊ້ນອກນີ້ທ່ານລັດຖະມົນຕີກະຊວງການເງິນຍັງເນັ້ນໃຫ້ເອົາໃຈໃສ່ປະຕິບັດຢ່າງຕັ້ງໜ້າຕໍ່ກັບວຽກງານສະກັດກັ້ນ ແລະຕ້ານການສໍ້ລາດບັງຫຼວງເພາະບັນຫາດັ່ງກ່າວນີ້ເປັນໄພຂົ່ມຂູ່ໃນລະບົບການຈັດຕັ້ງພັກພະນັກງານ, ເປັນບັນຫາທີ່ຫຼາຍປະເທດ ແລະອົງການຈັດຕັ້ງໃຫ້ຄວາມສົນໃຈ ແລະເອົາໃຈໃສ່ຕິດຕາມໃນການຈັດຕັ້ງປະຕິບັດຕົວຈິງຂອງປະເທດເຮົາ. ໄປພ້ອມໆກັນນັ້ນກໍຕ້ອງສືບຕໍ່ປັບປຸງແບບແຜນການນຳພາ ແລະແບບແຜນວິທີການເຮັດວຽກຂອງຄະນະພັກໃຫ້ຖືກຕ້ອງເປັນຕົ້ນແມ່ນການປະຕິບັດຫຼັກການລວມສູນປະຊາທິປະໄຕ, ແບ່ງງານໃຫ້ບຸກຄົນຮັບຜິດຊອບ, ປະຕິບັດລະບອບສ່ອງແສງ, ກວດກາ ແລະລາຍງານເປັນປົກກະຕິທ່ານຮອງນາຍົກແນະນຳຕື່ມ.
   ແນໃດກໍດີສຳລັບຄຳແນະນຳຂອງທ່ານຮອງນາຍົກໃນຄັ້ງນີ້ກໍຄາດວ່າຈະເປັນແນວທາງໜຶ່ງທີ່ຈະເຮັດໃຫ້ຂະແໜງການເງິນມີຄວາມຮັດກຸມຂຶ້ນຕື່ມແຕ່ທັງນີ້ກໍຂຶ້ນກັບຂອດຝ່າຍຈັດຕັ້ງປະຕິບັດວ່າຈະອັດຊ່ອງຮົ່ວໄດ້ໜ້ອຍຫຼາຍປານເພື່ອເຮັດໃຫ້ການຈັດຕັ້ງປະຕິບັດລາຍຮັບ ແລະລາຍຈ່າຍໄດ້ມີປະສິດທິພາບໄຮ້ການຕົກເຮ່ຍເສຍຫາຍ ໂດຍຜ່ານການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນສົກປີ 2015-2016 ດ້ານລາຍຮັບຂະແໜງການເງິນສາມາດປະຕິບັດໄດ້ແລ້ວ 8,01 ພັນຕື້ກີບ ເທົ່າກັບ 30,6% ຂອງແຜນການປີ ຫຼື ເທົ່າກັບ 54,4% ຂອງແຜນການ 6 ເດືອນຕົ້ນປີສ່ວນດ້ານລາຍຈ່າຍກໍປະຕິບັດໄດ້ 11,5 ພັນຕື້ກີບເທົ່າກັບ 36% ຂອງແຜນການປີ.


ຂໍຂອບໃຈ




ຈາກແຫຼ່ງຂ່າວ: ໜັງສືພິມເສດຖະກິດ-ສັງຄົມ