Chania

ສົ່ງເສີມອາຊຽນໃຫ້ມີຄວາມຍືນຍົງ ດ້ານສິ່ງແວດລ້ອມ

   ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສອາຊຽນດ້ານສິ່ງແວດລ້ອມ ຄັ້ງທີ 25 ລະຫວ່າງວັນທີ 25-29 ສິງຫາ 2014 ເຊິ່ງກອງປະຊຸມຄັ້ງນີ້ມີຄວາມໝາຍສຳຄັນຍິ່ງໃນການປຶກສາຫາລືກ່ຽວກັບວຽກງານສິ່ງແວດລ້ອມເພື່ອແນໃສ່ເຮັດແນວໃດໃຫ້ພາກພື້ນອາຊີມີຄວາມອຸດົມສົມບູນດ້ານຊັບພະຍາກອນທຳມະຊາດ ສິ່ງແວດລ້ອມທີ່ສົດໃສແລະ ດຶງດູດນັກທ່ຽວທ່ອງຈາກທົ່ວໂລກ ໃຫ້ນັບມື້ຫຼາຍຂຶ້ນ.
    ກອງປະຊຸມເຈົ້າໜ້າທີ່ອາວຸໂສອາຊຽນດ້ານສິ່ງແວດລ້ອມຈັດຂຶ້ນຕອນບ່າຍວັນທີ 26 ສິງຫາ 2014 ຢູ່ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ ໂດຍເປັນປະທານຮ່ວມຂອງທ່ານ ດຣ. ນາງ ອີນາອິດຊະນາ ອິສສັກ ຫົວໜ້າຄະນະຜູ້ແທນຂອງປະເທດອິນໂດເນເຊຍ ທ່ານນາງມອນມະນີ ຍອຍບົວກ່ອງ ປະທານເຈົ້າໜ້າທີ່ອາວຸໂສຂອງ ສປປ ລາວທັງເປັນຫົວໜ້າກອງເລຂາຄະນະກຳມະການແມ່ນ້ຳຂອງແຫ່ງຊາດລາວມີຜູ້ຕາງໜ້າຈາກປະເທດສະມາຊິກອາຊຽນ ອາຊຽນບວກ 3ແລະ ປະເທດຄູ່ເຈລະຈາລວມທັງໝົດ 19 ປະເທດເຂົ້າຮ່ວມ.
   ເປົ້າໝາຍກອງປະຊຸມຄັ້ງນີ້ ຜູ້ຕາງໜ້າຈາກປະເທດສະມາຊິກ ໄດ້ປຶກສາຫາລືແລະ ລາຍງານຄວາມຄືບໜ້າຂອງການຈັດຕັ້ງປະຕິບັດແຜນງານຕ່າງໆທີ່ນອນຢູ່ໃນແຜນງານການຮ່ວມມືອາຊຽນດ້ານສິ່ງແວດລ້ອມ ວາງແຜນການເຄື່ອນໄຫວ ແລະ ຮັບຮອງເອົາແຜນໃນປີຕໍ່ໜ້າລະຫວ່າງບັນດາປະເທດສະມາຊິກອາຊຽນ ອາຊຽນບວກ 3 ແລະ ຄູ່ຮ່ວມເຈລະຈາເຊິ່ງຂໍ້ມູນກອງປະຊຸມຄັ້ງນີ້ ຍັງຈະເປັນການເກັບກຳຂໍ້ມູນພື້ນຖານເພື່ອເປັນບ່ອນອີງໃຫ້ແກ່ກອງປະຊຸມລັດຖະມົນຕີອາຊຽນ ດ້ານສິ່ງແວດລ້ອມທີ່ຈະໄດ້ຈັດຂຶ້ນລະຫວ່າງວັນທີ 27-31 ຕຸລາ 2014 ຢູ່ນະຄອນຫຼວງວຽງຈັນຕື່ມອີກ ສຳລັບຄະນະກຳມະການ ຫຼືເຈົ້າໜ້າທີ່ອາວຸໂສອາຊຽນ ດ້ານສິ່ງແວດລ້ອມ ໄດ້ຮັບການສ້າງຕັ້ງຂຶ້ນໃນປີ 1989 ເປັນຕົ້ນມາ ມີຈຸດປະສົງເພື່ອສົ່ງເສີມໃຫ້ພາກພື້ນກໍ່ຄືປະເທດສະມາຊິກມີຄວາມຍືນຍົງດ້ານສິ່ງແວດລ້ອມປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມເພື່ອການພັດທະນາເສດຖະກິດ-ສັງຄົມທີ່ຕິດພັນກັບການຮັກສາສິ່ງແວດລ້ອມທີ່ຍືນຍົງ ແນໃສ່ອະນຸຮັກດິນ ນ້ຳແຮ່ທາດ ພະລັງງານ ຊີວະນາໆພັນ ແລະ ປ່າໄມ້ ລວມທັງພື້ນທີ່ແຄມທະເລໃຫ້ມີສິ່ງແວດລ້ອມ ແລະ ສະພາບອາກາດທີ່ດີເພື່ອຊຸກຍູ້ໃຫ້ວຽກງານການທ່ອງທ່ຽວຂະຫຍາຍຕົວຢ່າງເຂັ້ມແຂງຍິ່ງຂຶ້ນ.
ແຫຼ່ງຂໍ້ມູນ: www.vientianemai.net


ຂອບໃຈຫລາຍໆ




ຈາກແຫຼ່ງຂ່າວ: www.vientianemai.net