ແຂວງຊຽງຂວາງເປີດແຫລ່ງທ່ອງທ່ຽວແຫ່ງໃໝ່

ໃນວັນທີ 23 ມັງກອນ 2012 ນີ້ ຢູ່ທີ່ພູເກັງ ເມືອງແປກ ແຂວງຊຽງຂວາງ ໄດ້ຈັດພິທີເປີດແຫລ່ງທ່ອງທ່ຽວພູເກັງຂຶ້ນຢ່າງເປັນທາງ
ການ. ເປັນກຽດເຂົ້າຮ່ວມມີທ່ານ ສຈ.ດຣ. ສົມກົດ ມັງໜໍ່ເມກ ກຳມະການສູນກາງພັກ ເລຂາພັກແຂວງ, ເຈົ້າແຂວງໆຊຽງຂວາງ, ທ່ານ
ນາງ ບົວລີ ອຸດົມສຸກ ກຳມະການພັກແຂວງ, ເລຂາພັກເມືອງ, ເຈົ້າເມືອງໆແປກ, ມີຫົວໜ້າຫ້ອງການທ່ອງທ່ຽວແຂວງ, ເມືອງ ແລະ ອຳ
ນາດການປົກຄອງບ້ານ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ. ໃນພິທີ, ທ່ານ ຄຳເພັດ ພົມມະດວງໄກສອນ ຫົວໜ້າພະແນກ
ທ່ອງທ່ຽວ ແຂວງຊຽງຂວາງ ໄດ້ຂຶ້ນຜ່ານບົດສະຫຼຸບລາຍງານການກໍ່ສ້າງແຫລ່ງທ່ອງທ່ຽວພູເກັງ ເປັນບ່ອນຜະລິດໄຫຫີນຂອງຄົນບູຮານ,
ພູເກັງຕັ້ງຢູ່ບ້ານລາດງ່ອນ ເມືອງແປກ ແຂວງຊຽງຂວາງ ຫ່າງຈາກຕົວເມືອງໂພນສະຫວັນ ປະມານ 15 ກິໂລແມັດ, ພູເກັງ ເປັນຮ່ອງ
ຮອຍປະຫວັດສາດໃນສະໄຫມສົງຄາມປົດປ່ອຍຊາດ, ຍາດເອົາຄວາມເປັນເອກະລາດມາໃຫ້ປະຊາຊົນ ໄປພ້ອມກັນນັ້ນໃນຂອບເຂດພູເກັງ
ຍັງມີຖ້ຳທຳມະຊາດ ປ່າໄມ້ ແລະ ເປັນຈຸດທິວທັດທຳມະຊາດທີ່ສວຍສົດງົດງາມ, ພູເກັງໄດ້ເລີ່ມລົງມືຈັດຕັ້ງປະຕິບັດແຕ່ປີ 2010-2011
ໃຊ້ງົບປະມານ 17 ຕື້ກວ່າກີບ ໂດຍແມ່ນລັດຖະບານເປັນຜູ້ລົງທຶນ 100%, ບັນດາວຽກງານດັ່ງກ່າວໄດ້ຮັບການຈັດຕັ້ງປະຕິບັດສຳເລັດ
ແລ້ວ 64%. ແຫລ່ງທ່ອງທ່ຽວພູເກັງໃນອະນາຄົດຈະສ້າງເປັນແຫລ່ງທ່ອງທ່ຽວຄົບວົງຈອນ ໝາຍຄວາມວ່າຈະສ້າງສະລິງໄຟຟ້າຂຶ້ນ-ລົງ,
ສືບຕໍ່ສ້າງເສັ້ນທາງຍ່າງໄປທາງທິດຕາເວັນອອກ ແລະ ສ້າງເສັ້ນທາງລົງມາສູ່ສະຖານທີ່ຈອດລົດຕື່ມອີກ, ສ້າງລະບົບຫ້ອງນ້ຳຂອບເຂດ
ທາງຍ່າງ ແລະ ຮາວປະກັນໄພ, ບ່ອນທີ່ສູງຊັນ, ດຶງໄຟຟ້າເຂົ້າຖ້ຳ ແລະ ຂຸມຄອງໃຕ້ດິນ ແລະ ອື່ນໆ.

ຫລັງຈາກນັ້ນ ສຈ.ດຣ. ສົມກົດ ມັງໜໍ່ເມກ ພ້ອມດ້ວຍແຂກເຂົ້າຮ່ວມກໍ່ໄດ້ໃຫ້ກຽດຕັດແຖບຜ້າ ແລະ ລັ່ນຄ້ອງ 9 ບາດ ເພື່ອປະກາດ
ເປີດແຫລ່ງທ່ອງທ່ຽວພູເກັງ ຢ່າງເປັນທາງການ. (ນັກຂ່າວ ປກສ ແຂວງຊຽງຂວາງ)