ທ່ານ ສະເຫຼີມໄຊ ກົມມະສິດ ຕ້ອນຮັບຜູ້ຊ່ວຍລັດຖະມົນຕີກະຊວງການຕ່າງປະເທດອາເມຣິກາ


...

21.05.2019 11:25     

   ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ເຄີສເຕັນ ແມດິຊັນ (Kirsten D.Madison) ຜູ້ຊ່ວຍລັດຖະມົນຕີກະຊວງການຕ່າງປະເທດ ສະຫະລັດອາເມຣິກາ, ທັງເປັນຜູ້ຮັບຜິດຊອບວຽກງານປາບປາມຢາເສບຕິດ, ການບັງຄັບໃຊ້ກົດໝາຍ ແລະ ການຕ້ານອາຊະຍາກຳຂ້າມຊາດ ພ້ອມຄະນະ ເມື່ອວັນທີ 20 ພຶດສະພາ ຜ່ານມາ ທີ່ກະຊວງການຕ່າງປະເທດ, ໃນໂອກາດທີ່ເດີນທາງມາຢ້ຽມຢາມ ສປປ ລາວ ລະຫວ່າງວັນທີ 19 - 21 ພຶດສະພາ ນີ້.
ໂອກາດດັ່ງກ່າວ, ທ່ານ ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ລາວ ຂອງຜູ້ຊ່ວຍ ລັດຖະມົນຕີກະຊວງການຕ່າງປະເທດອາເມຣິກາໃນຄັ້ງນີ້ ຊຶ່ງເປັນໂອກາດທີ່ສຳຄັນໃນການປຶກສາຫາລືກັບພາກສ່ວນທີ່ກ່ຽວຂ້ອງຂອງລາວ ເພື່ອຊອກຫາຊ່ອງທາງເສີມຂະຫຍາຍການພົວພັນຮ່ວມມືສອງຝ່າຍໃຫ້ເຂັ້ມແຂງ ແລະ ມີຄວາມກ້າວໜ້າຍິ່ງໆຂຶ້ນໃນຕໍ່ໜ້າ. ທ່ານລັດຖະມົນຕີ ຍັງໄດ້ອວຍພອນໃຫ້ທ່ານ ນາງ ເຄີສເຕັນ ແມດິຊັນ ພ້ອມຄະນະ ຈົ່ງປະສົບຜົນສຳເລັດອັນຈົບງາມໃນການມາເຄື່ອນໄຫວຢ້ຽມຢາມ ສປປ ລາວຄັ້ງນີ້.
ໂອກາດດຽວກັນນີ້, ທ່ານ ນາງ ເຄີສເຕັນ ແມດິຊັນ ກໍ່ໄດ້ກ່າວສະແດງຄວາມຂອບໃຈຕໍ່ທ່ານລັດຖະມົນຕີທີ່ໄດ້ຕ້ອນຮັບຢ່າງອົບອຸ່ນ ພ້ອມທັງລາຍງານຈຸດປະສົງຂອງການມາຢ້ຽມຢາມ ສປປ ລາວໃຫ້ທ່ານລັດຖະມົນຕີໄດ້ຊາບ.
(ຂ່າວ-ພາບ: ສຸກສະຫວັນ)