ອົງການໄອຍະການປະຊາຊົນສູງສຸດ ລາວ-ກູບາ ເສີມຂະຫຍາຍການຮ່ວມມື


...

29.05.2019 10:31     

   ທ່ານ ຄຳສານ ສຸວົງ ກໍາມະການສູນກາງພັກ, ເລຂາຄະນະພັກ, ຫົວໜ້າອົງການໄອຍະການປະຊາຊົນສູງສຸດ ພ້ອມຄະນະໄດ້ຕ້ອນຮັບ ທ່ານ ນາງ ຢາມີລາ ພີນາ ໂອຈີດາ ກໍາມະການສູນກາງພັກກອມມູນິດກູບາ ຫົວໜ້າອົງການໄອຍະການສູງສຸດ ແຫ່ງ ສ.ກູບາ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຮ່ວມກັບ ອົງການປະຊາຊົນສູງສຸດ ເມື່ອວັນທີ 28 ພຶດສະພານີ້ ທີ່ນະ ຄອນຫຼວງວຽງຈັນ.
ອົງການໄອຍະການປະ ຊາຊົນ ແຫ່ງ ສປປ ລາວ ແລະ ອົງການໄອຍະການສູງສຸດ ແຫ່ງ ສ.ກູບາ ທັງສອງອົງການທີ່ໄດ້ຮ່ວມອຸດົມການອັນດຽວກັນ, ອຸດົມການສັງຄົມນິຍົມ ພັກ-ລັດ ແລະ ປະຊາຊົນສອງປະເທດເຄີຍມີມູນເຊື້ອການພົວພັນຮ່ວມມືກັນ ແລະ ການຊ່ວຍເຫຼືອຊຶ່ງກັນ ແລະ ກັນມາແຕ່ສະໄໝຕໍ່ສູ້ກູ້ຊາດ ແລະ ການຕ້ານຈັກກະພັດຜູ້ຮຸກຮານຂອງປະຊາຊົນລາວໃນສະໄໜກ່ອນ. ຍາມໃດປະຊາຊົນ ສ.ກູບາ ກໍໄດ້ໃຫ້ການຮ່ວມມືຊ່ວຍເຫຼືອປະຊາຊົນລາວໂດຍຕະຫຼອດມາ ແລະ ມາເຖິງໄລຍະການປ່ຽນແປງໃໝ່ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ຊຶ່ງສອງປະເທດໄດ້ສືບຕໍ່ຜັນຂະຫຍາຍສາຍພົວພັນການຮ່ວມມືອັນດີງາມທີ່ມີມາແຕ່ດົນນານແລ້ວນັ້ນໃຫ້ນັບມື້ຮັດແໜ້ນ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ຈຸດປະສົງການມາຢ້ຽມຢາມ ແລະ ເຮັດວຽກຢ່າງເປັນທາງການ ຢູ່ ສປປ ລາວ ຄະນະຜູ້ແທນຂັ້ນສູງອົງການໄອຍະການສູງສຸດ ແຫ່ງ ສ.ກູບາໃນຄັ້ງນີ້ ແມ່ນເພື່ອເປັນການເສີມຂະຫຍາຍຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງສອງອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການສູງສຸດ ແຫ່ງ ສ.ກູບາ ເວົ້າສະເພາະ, ເວົ້າລວມ ກໍເພື່ອເປັນການຜັນຂະຫຍາຍ ເນື້ອໃນຈິດໃຈຂອງບົດບັນທຶກຊ່ວຍຈຳ ທີ່ສອງອົງການໄດ້ລົງນາມຮ່ວມມືກັນຜ່ານມາ,
ພ້ອມນັ້ນ ທ່ານ ຄຳສານ ສຸວົງ ແລະ ທ່ານ ນາງ ຢາມີລາ ພີນາ ໂອຈີດາ ຍັງໄດ້ຮ່ວມກັນລົງນາມໃນບົດບັນທຶກຊ່ວຍຈຳເພື່ອສືບຕໍ່ເສີມຂະຫຍາຍການຮ່ວມມືໃນຕໍ່ໜ້າອີກດ້ວຍ.
(ຂ່າວ-ພາບ: ຕຸໄລເພັດ ພິມເມືອງ)