ເຈົ້າແຂວງໆຢຸນນານ ຢ້ຽມຢາມສປປ ລາວ


...

30.05.2019 9:50     

   ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ແລະ ພົບປະສອງຝ່າຍກັບ ທ່ານ ຫຼວນ ເສີງຟາ ເຈົ້າແຂວງໆຢຸນນານ ແຫ່ງ ສປ ຈີນ ພ້ອມດ້ວຍຄະນະ ໃນວັນທີ 28 ພຶດສະພາຜ່ານມາ ທີ່ໂຮງແຮມລາວພລາຊາ. ການພົບປະຄັ້ງນີ້, ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລາວ-ຈີນ ແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ຄູ່ຮ່ວມຊາຕາກຳສັງຄົມນິຍົມລາວ-ຈີນ, ຈີນ-ລາວ; ຕີລາຄາສູງຕໍ່ຜົນສໍາເລັດໃນການເປັນເຈົ້າພາບຈັດກອງປະຊຸມເວທີປຶກສາຫາລືການຮ່ວມມືສາກົນ ໜຶ່ງແລວ ໜຶ່ງເສັ້ນທາງ ຄັ້ງທີ 2 ແລະ ຜົນສຳເລັດຂອງການຢ້ຽມຢາມທາງລັດຖະກິດ ສປ ຈີນ ຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໃນທ້າຍເດືອນເມສາ 2019 ທີ່ຜ່ານມາ. ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈໄປຍັງພັກ, ລັດຖະບານ, ປະຊາ ຊົນ ແລະ ທຸກພາກສ່ວນທີ່ກ່ຽວຂ້ອງຂອງ ສປ ຈີນ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນໄລຍະຜ່ານມາ ເວົ້າລວມ, ເວົ້າສະເພາະ ແຂວງຢຸນນານ ກໍໄດ້ໃຫ້ການຊ່ວຍເຫຼືອແກ່ ສປປ ລາວ ດ້ານມະນຸດສະທຳ ທັງວັດຖຸສິ່ງຂອງ, ປັດໄຈຕ່າງໆ ລວມທັງເງິນ ແລະ ທີມງານກູ້ໄພໄປຊ່ວຍປະຊາຊົນຜູ້ຖືກເຄາະຮ້າຍ ແລະ ໄດ້ຮັບຜົນກະທົບຈາກເຫດການໄພພິບັດຢູ່ເມືອງສະໜາມໄຊ ແຂວງອັດຕະປື ແລະ ນຳ້ຖ້ວມຢູ່ຫຼາຍແຂວງ ຂອງ ສປປ ລາວ ໃນປີ 2018 ທີ່ຜ່ານມາ. ແຂວງຢຸນນານ ໄດ້ມີການປະກອບສ່ວນທີ່ສຳຄັນໃນການຊຸກຍູ້ ແລະ ສົ່ງເສີມການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການສຶກສາ, ວັດທະນະທຳ, ທ່ອງທ່ຽວ ແລະ ອື່ນໆ ລະຫວ່າງ ສປປ ລາວ ແລະ ສປ ຈີນ, ສາມາດເວົ້າໄດ້ວ່າແຂວງຢຸນນານເປັນຂົວຕໍ່ທີ່ສຳຄັນ ລະຫວ່າງ ສປປ ລາວ ແລະ ສປ ຈີນ, ຊຶ່ງແຂວງຢຸນນານ ເປັນແຂວງດຽວຂອງ ສປ ຈີນ ທີ່ມີຊາຍແດນຕິດຈອດກັບ ສປປ ລາວ ແລະ ແມ່ນຈຸດເລີ່ມຕົ້ນຂອງ ແລວທາງເສດຖະກິດ ລາວ-ຈີນ-ລາວ ຕາມຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ຂອງ ປະທານ ສີ ຈິ້ນຜິງ. ທ່ານ ສະເຫຼີມໄຊ ກົມມະສິດ ໄດ້ອວຍພອນໃຫ້ ສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນຮ່ວມມືລາວ-ຈີນ ແບບຄູ່ຮ່ວມມື ຍຸດທະສາດຮອບດ້ານໝັ້ນຄົງ ຍາວນານ ຕາມທິດ 4 ດີ ແລະ ຄູ່ຮ່ວມຊາຕາກຳສັງຄົມນິຍົມລາວ-ຈີນ, ຈີນ-ລາວ ຈົ່ງສືບຕໍ່ຈະເລີນງອກງາມຍິ່ງໆຂຶ້ນ ແລະ ອວຍພອນໃຫ້ ທ່ານ ຫຼວນ ເສີງຟາ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ ແລະ ນໍາພາປະຊາຊົນແຂວງຢຸນນານ ສືບຕໍ່ໄດ້ຮັບຜົນສຳເລັດອັນໃໝ່ໃຫຍ່ຫຼວງກວ່າເກົ່າ ແລະ ຈົ່ງປະສົບຜົນສຳເລັດຢ່າງຈົບງາມ ໃນການເດີນທາງຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້. ໃນໂອກາດດຽວກັນນີ້, ທ່ານ ຫຼວນ ເສີງຟາ ກໍ່ໄດ້ສະແດງຄວາມຂອບໃຈຕໍ່ ພັກ, ລັດຖະບານ ແຫ່ງ ສປປ ລາວ ທີ່ໄດ້ໃຫ້ກຽດຕ້ອນຮັບອັນອົບອຸ່ນຕໍ່ການຢ້ຽມຢາມ ສປປ ລາວ ຢ່າງເປັນທາງການຂອງທ່ານ ໃນຄັ້ງນີ້ ແລະ ສະແດງຄວາມຍິນດີຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ຄູ່ຮ່ວມຊາຕາກຳສັງຄົມນິຍົມລາວ-ຈີນ, ຈີນ-ລາວ ລະຫວ່າງ ສອງພັກ-ສອງລັດຖະບານ ກໍຄື ປະຊາຊົນສອງຊາດ ຈີນ ແລະ ລາວ ເວົ້າລວມ, ເວົ້າສະເພາະ ກໍຄືແຂວງຢຸນນານ ແລະ ສປປ ລາວ ໃຫ້ນັບມື້ນັບໄດ້ຮັບການເສີມຂະຫຍາຍທັງລວງກວ້າງ ແລະ ລວງເລິກ ແລະ ມີປະສິດທິຜົນ, ນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດຈີນ ແລະ ລາວ. (ຂ່າວ-ພາບ: ກະຊວງການຕ່າງປະເທດ)