ເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມມືສ້າງຊ່ອງລາຍການໂທລະພາບດີຈີຕອນລາວ


...

30.05.2019 10:34     

   ໂທລະພາບແຫ່ງຊາດລາວ ຮ່ວມກັບ ກຸ່ມບໍລິສັດ ວິທະຍຸ-ໂທລະພາບ ແຂວງຢຸນນານ ຈຳກັດ ໄດ້ຈັດພິທີເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມມືສ້າງຊ່ອງລາຍການ ໂທລະພາບດີຈີຕອນລາວ ຂຶ້ນໃນວັນທີ 28 ພຶດສະພາ ຜ່ານມາ ທີ່ໂຮງແຮມລາວພລາຊາ ນະຄອນຫຼວງວຽງຈັນ. ຮ່ວມລົງນາມໃນຄັ້ງນີ້, ຝ່າຍລາວໂດຍ ທ່ານ ບຸນເຈົ້າ ພິຈິດ ຜູ້ອຳນວຍການໃຫຍ່ໂທລະພາບແຫ່ງຊາດລາວ, ຝ່າຍຈີນໂດຍທ່ານ ເຫີຍ ຢ່າ ນິ໋ງ ປະທານ ກຸ່ມບໍລິສັດ ວິທະຍຸ-ໂທລະພາບຢຸນນານ ຈຳກັດ ໂດຍໃຫ້ກຽດເຂົ້່າຮ່ວມເປັນສັກຂີພິຍານຂອງທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ., ທ່ານ ສະຫວັນຄອນ ຣາຊມຸນຕຣີ ຮອງລັດ ຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ຫຼວນ ເສີງຟາ ເຈົ້າແຂວງໆຢຸນນານ ສປ ຈີນ, ທ່ານທູດ ສປຈີນ ປະຈຳລາວ ແລະ ແຂກຖືກເຊີນເຂົ້າຮ່ວມ . ທ່ານ ບຸນເຈົ້າ ພິຈິດ ໄດ້ກ່າວຈຸດປະສົງໃນການເຊັນບົດບັນທຶກຄັ້ງນີ້ວ່າ: ເພື່ອສ້າງສະຖານີໃນໄລຍະເວລາຂ່າວພາກເຊົ້າ ພາກທ່ຽງ ພາກຄ່ໍາ ເປັນຂ່າວ ແລະ ເຫດການສຳຄັນຊຶ່ງຈະໄດ້ຖ່າຍທອດສົດຕ່າງໆແມ່ນຈະໄດ້ຖ່າຍທອດຕໍ່ເລີຍໂດຍບໍ່ມີການຕັດ, ລາຍການຊ່ອງຈະມີສອງພາສາລາວ- ຈີນ ແລະ ໝາຍຄວາມວ່າເພື່ອແລກປ່ຽນວັດທະນະທຳ ແລກປ່ຽນສື່ມວນຊົນອີກດ້ວຍ ໂດຍສະເພາະປີນີ້ແມ່ນສຳຄັນທີ່ສຸດແມ່ນປີທ່ອງທ່ຽວລາວ-ຈີນ, ຊ່ອງລາຍການດັ່ງກ່າວແມ່ນຈະມີລາຍການຊອດແຊກວັດທະນະທຳກ່ຽວກັບອາຫານ ແລະ ສະຖານທີ່ທ່ອງທ່ຽວຕ່າງໆທີ່ເປັນທັງພາສາລາວ-ຈີນ. ນອກຈາກນັ້ນ ຈະມີລະຄອນມີຮູບເງົາຂອງຈີນ ແລະ ລະຄອນຂອງຈີນ ຖືວ່າເປັນລະຄອນທີ່ມີຊື່ສຽງລະດັບໂລກ ທີ່ຈະໄດ້ນຳມາແປອອກອາກາດ ໃນເວລານີ້ແມ່ນກຳລັງທົດລອງອອກອາກາດຈະໃຊ້ເວລາ 3 ເດືອນ, ທົດລອງເຕັກນິກ ທົດລອງການກະຈາຍເລື່ອງຂ່າວ ສາລະຄະດີ ບັນເທີງ ແລະ ອື່ນໆ. (ຂ່າວ: ນາງ ສະຫວັນຄຳ)