ລັດຖະມົນຕີກະຊວງພາຍໃນ ຕ້ອນຮັບ ຄະນະຜູ້ແທນທະນາຄານໂລກ


07.06.2019 10:15     

   ທ່ານ ຄໍາໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ຕ້ອນຮັບການເຂົ້າຢ້ຽມຂ່ຳ ນັບຂອງທ່ານ ນາງ ວຽງສະໄໝ ສິດທິລາດ ຮອງຫົວໜ້າ ຫ້ອງ ການທະນາຄານໂລກ ປະຈໍາ ສປປ ລາວ ແລະ ພາກ ພື້ນອາຊີ-ປາຊີຟິກ, ໃນວັນທີ 6 ມິຖຸນານີ້ ທີ່ຫ້ອງຮັບແຂກກະຊວງ ພາຍໃນ. ໃນໂອກາດດັ່ງກ່າວ, ທ່ານ ລັດຖະມົນຕີ ໄດ້ສະແດງຄວາມຕ້ອນຮັບ, ຊົມເຊີຍຕໍ່ທ່ານ ຮອງຫົວໜ້າຫ້ອງການທະນາຄານໂລກ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ, ຊຶ່ງເປັນການປະກອບສ່ວນສໍາຄັນເຂົ້າໃນການພັດທະນາປະເທດ ກໍຄື ການເພີ່ມພູນຄູນສ້າງ ສາຍພົວພັນມິດຕະພາບ ແລະ ການຮ່ວມມືລະຫວ່າງ ທະນາຄານໂລກກັບ ສປປ ລາວ ທີ່ເຄີຍມີມາແລ້ວນັ້ນໃຫ້ແໜ້ນແຟ້ນ ຍິ່ງໆຂຶ້ນ.
ຈາກນັ້ນ, ທ່ານ ແຊມ ຊ່ຽວຊານອາວຸໂສ ດ້ານສາທາ ລະນະສຸກຂອງທະນາຄານໂລກ ປະຈໍາຢູ່ ວໍຊິງຕັນດີຊີ, ໄດ້ລາຍງານຈຸດປະສົງຂອງການມາໃນຄັ້ງນີ້ ໃຫ້ກັບທ່ານ ລັດຖະມົນຕີໄດ້ຮັບຊາບວ່າ: ເພື່ອປຶກສາຫາລືກ່ຽວກັບການ ກະກຽມໂຄງການຈັດຕັ້ງປະຕິ ບັດຍຸດທະສາດວຽກງານການຈົດທະບຽນ ແລະ ສະຖິຕິພົນລະເມືອງ ຕາມທີ່ໄດ້ກໍານົດໄວ້ໃນຍຸດທະສາດ ວຽກງານການຈົດທະບຽນ ແລະ ສະຖິຕິພົນລະເມືອງປີ 2016-2025 ທີ່ທ່ານນາຍົກລັດຖະມົນຕີ ໄດ້ຮັບຮອງ ໃນເດືອນພຶດສະພາ 2017; ພ້ອມທັງຕິດຕາມຄວາມຄືບໜ້າ ການຈັດຕັ້ງປະຕິບັດວຽກງານ ຄຸ້ມຄອງພົນລະເມືອງ ພາຍໃຕ້ການສະໜັບສະໜູນຂອງທະນາຄານໂລກ ເປັນຕົ້ນແມ່ນ ຮູບແບບຂອງໂຄງການ ແລະ ໄລຍະເວລາ ຂອງໂຄງການຈັດຕັ້ງປະຕິບັດຍຸດທະສາດ; ການກະກຽມກິດຈະກໍາຂອງໂຄງການ; ການເຮັດທົດລອງຊັອບແວ ລະບົບຖານຂໍ້ມູນຄຸ້ມຄອງພົນລະເມືອງ ທີ່ທະນາຄານໂລກໃຫ້ການຊ່ວຍເຫຼືອ.
ຈາກນັ້ນ, ທ່ານ ນາງ ວຽງສະໄໝ ສິດທິລາດ ໄດ້ຕາງໜ້າໃຫ້ກັບຄະນະສະແດງຄວາມຂອບໃຈເປັນຢ່າງສູງຕໍ່ທ່ານ ລັດຖະມົນຕີ ທີ່ເສຍສະຫຼະເວລາໃຫ້ການຕ້ອນຮັບອັນອົບອຸ່ນໃນຄັ້ງນີ້.
( ຂ່າວ: ແສງຈັນ)