ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບຄະນະຜູ້ແທນ ກູບາ


...

11.06.2019 9:26     

   ວັນທີ 7 ມິຖຸນາຜ່ານມານີ້ ທີ່ຄະນະພົວພັນຕ່າງປະເທດສູນກາງພັກ, ສະຫາຍ ນ. ສູນທອນ ໄຊຍະຈັກ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ຕ້ອນຮັບ ສະຫາຍ ໂອເມໂຣ ອາໂກດສຕາ ອານວາເຣັດສ ກຳມະການສູນກາງພັກ ສະມາຊິກສະພາແຫ່ງຊາດອຳນາດປະຊາຊົນກູບາ, ເລຂາທິການສະພາແຫ່ງລັດກູບາ ພ້ອມດ້ວຍຄະນະ ໃນໂອກາດຢ້ຽມຢາມ ລາວ ແຕ່ວັນທີ 6-7 ມິຖຸນາ 2019.
ໃນໂອກາດນີ້, ສະຫາຍ ນ. ສູນທອນ ໄຊຍະຈັກ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການມາຢ້ຽມຢາມລາວ ຂອງຄະນະຜູ້ແທນສະພາແຫ່ງຊາດອຳນາດປະຊາຊົນກູບາ, ຊຶ່ງເປັນການປະກອບສ່ວນທີ່ສໍາຄັນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບ ລະຫວ່າງ ສອງພັກ, ສອງລັດ ແລະ ປະຊາ ຊົນສອງຊາດລາວ-ກູບາ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ; ໄດ້ແຈ້ງໃຫ້ຄະນະຊາບກ່ຽວກັບຜົນສໍາເລັດອັນພົ້ນເດັ່ນໃນການສ້າງສາພັດທະນາປະເທດຊາດຢູ່ສປປ ລາວ ໃນຊຸມປີຜ່ານມາ ແລະ ທິດທາງແຜນການໃນການພັດທະນາເສດຖະກິດ-ສັງຄົມຂອງລາວ ໃນຕໍ່ໜ້າ; ຕີລາຄາສູງມູນເຊື້ອການພົວພັນຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດ; ສະແດງຄວາມຊົມເຊີຍຢ່າງຈິງໃຈຕໍ່ບັນດາຜົນສຳເລັດຂອງກູບາ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະແມ່ນການພັດທະນາເສດຖະກິດ-ສັງຄົມ ແລະ ຜົນສຳເລັດໃນການປັບປຸງລັດຖະທຳມະນູນສະບັບໃໝ່ ແລະ ອວຍພອນໃຫ້ປະຊາຊົນກູບາ ພາຍໃຕ້ການນຳພາຂອງພັກກອມມູນິດກູບາ ຈົ່ງສືບຕໍ່ຍາດໄດ້ຜົນສຳເລັດໃໝ່ໃຫຍ່ຫຼວງກວ່າເກົ່າ ໃນພາລະກິດສ້າງສາປະເທດຊາດກູບາສັງຄົມນິຍົມ, ໂດຍສະເພາະແມ່ນການປະຕິບັດມະຕິຂອງກອງປະຊຸມໃຫຍ່ ຄັ້ງທີ VII ຂອງພັກກອມມູນິດກູບາ.
ສະຫາຍ ໂອເມໂຣ ອາໂກດສຕາ ອານວາເຣັດສ, ໄດ້ສະແດງຄວາມຂອບໃຈຢ່າງຈິງໃຈມາຍັງ ສະຫາຍ ຫົວໜ້າຄະນະພົວພັນຕ່າງປະເທດສູນກາງພັກປປ ລາວ ທີ່ໄດ້ໃຫ້ການຕ້ອນຮັບອັນອົບອຸ່ນແກ່ຄະນະ, ໄດ້ສະແດງຄວາມດີໃຈທີ່ໄດ້ມີໂອກາດຢ້ຽມຢາມສປປ ລາວ ແລະ ມາເຫັນບັນດາຜົນສຳເລັດອັນໃຫຍ່ຫຼວງຂອງປະຊາຊົນລາວ ທີ່ຍາດມາໄດ້ໃນພາລະກິດສ້າງສາພັດທະນາປະເທດຊາດ ພາຍໃຕ້ການນຳພາອັນຖືກຕ້ອງ ຂອງພັກປປ ລາວ, ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນລາວ ໄດ້ຮັບການປັບປຸງໃຫ້ດີຂຶ້ນເທື່ອລະກ້າວ. ສະຫາຍ ໂອເມໂຣ ອາໂກດສຕາ ອານວາເຣັດສ ໄດ້ແຈ້ງໃຫ້ຊາບກ່ຽວກັບຜົນສຳເລັດອັນພົ້ນເດັ່ນຂອງ ສ.ກູບາ ໃນໄລຍະທ້າຍຊຸມປີຫຼັງໆມານີ້ ໂດຍສະເພາະ ແມ່ນຜົນສຳເລັດໃນການປັບປຸງລັດຖະທຳມະນູນໃໝ່ ສະບັບປີ 2019, ໄດ້ຕີລາຄາສູງຕໍ່ການພົວພັນຮ່ວມມືທີ່ເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດກູບາ-ລາວ ໃນດ້ານຕ່າງໆ ແລະ ອວຍພອນໃຫ້ພັກ, ລັດກໍຄືປະຊາຊົນລາວ ຈົ່ງໄດ້ຮັບຜົນສຳເລັດໃໝ່ໃຫຍ່ຫຼວງກວ່າເກົ່າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກໃຫ້ປະກົດຜົນເປັນຈິງ.
(ຂ່າວ-ພາບ: ຄຕພ)