ກອງປະຊຸມຫົວໜ້າກົມພາສີອາຊຽນ ຄັ້ງທີ 28


...

12.06.2019 10:14     

   ກອງປະຊຸມຫົວໜ້າກົມພາສີ ອາຊຽນ ຄັ້ງທີ 28 ໄດ້ຈັດຂຶ້ນໃນວັນທີ 11 ມິຖຸນານີ້ ທີ່ນະຄອນຫຼວງວຽງຈັນ ຊຶ່ງ ສປປ ລາວ ໄດ້ຮັບກຽດເປັນເຈົ້າພາບຕາມຮອບວຽນຂອງອາຊຽນ. ໂດຍການເຂົ້າຮ່ວມຂອງທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ; ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ, ກະຊວງການເງິນ; ທ່ານ ດາໂຕ້ ແພັດດີ້ ອັບດຸນ ຮາລິມ ຫົວໜ້າກົມພາສີ ປະເທດມາເລເຊຍ (ເຈົ້າພາບຈັດກອງປະຊຸມຫົວໜ້າກົມພາສີ ອາຊຽນ ຄັ້ງທີ 27) ມີບັນດາຜູ້ແທນລະດັບຫົວໜ້າກົມພາສີຂອງບັນດາສະມາຊິກອາຊຽນ 10 ປະເທດ; ກອງເລຂາອາຊຽນ, ອົງການພາສີໂລກ ແລະ ບັນດາປະເທດຄູ່ຮ່ວມພັດທະນາເຂົ້າຮ່ວມ.
ກອງປະຊຸມດັ່ງກ່າວ, ຜູ້ເຂົ້າຮ່ວມໄດ້ປຶກສາຫາລືເພື່ອຈັດຕັ້ງປະຕິບັດຕາມແຜນວຽກງານພາສີສະເພາະທີ່ໄດ້ຖືກ ກໍານົດໃນກອງປະຊຸມລັດຖະມົນຕີການເງິນອາຊຽນ ແລະ ຜູ້ວ່າການທະນາຄານກາງ; ໄດມີການຮ່ວມປຶກສາຫາລືທັງໝົດ 40 ກວ່າຫົວຂໍ້. ຊຶ່ງມີການປຶກສາ ຫາລືພາຍໃນອາຊຽນປະມານ 15 ກວ່າຫົວຂໍ້, ປຶກສາຫາລືກັບບັນດາປະເທດຄູ່ຮ່ວມພັດ ທະນາປະມານ 15 ຫົວຂໍ້ ແລະ ປຶກສາຫາລືກັບພາກທຸລະກິດ 10 ຫົວຂໍ້. ນອກຈາກການເຂົ້າຮ່ວມກອງປະຊຸມແລ້ວ, ກົມພາສີຍັງມີການພົບປະ 2 ຝ່າຍກັບ 7 ປະເທດເພື່ອແລກປ່ຽນບົດຮຽນແລະຮ່ວມມືດ້ານການພັດທະນາບຸກຄະລາກອນແລະເຕັກນິກວິຊາການສະເພາະພາສີ. ກອງປະຊຸມຄັ້ງນີ້ແມ່ນເປັນສ່ວນປະກອບທີ່ສໍາຄັນໜຶ່ງໃນການສ້າງປະຊາຄົມອາຊຽນ(AEC), ເພື່ອປຶກສາຫາລື ການເຊື່ອມໂຍງວຽກງານພາສີຂອງບັນດາປະເທດສະມາຊິກອາຊຽນ, ປັບປຸງລະບົບພາສີອາຊຽນໃຫ້ມີປະສິດທິພາບສູງ, ໃຫ້ຮັກສາໄດ້ຄວາມປອດໄພຕາມດ່ານພາສີຊາຍແດນ, ການສ້າງສິ່ງອໍານວຍຄວາມສະດວກທາງການຄ້າ ແລະ ການຄຸ້ມຄອງການສົ່ງອອກ-ນໍາເຂົ້າ ສິນຄ້າ ຜ່ານດ່ານພາສີສາກົນ.
(ຂ່າວ-ພາບ: ຍຸພິນທອງ)