ເຈົ້າໜ້າທີ່ອາວຸໂສ ອາຊຽນຊາຍ ທົບທວນການຈັດຕັ້ງປະຕິບັດ ວຽກງານ ພ້ອມກຳນົດທິດທາງຕໍ່ໜ້າ


...

05.07.2019 11:07     

   ກອງປະຊຸມເຈົ້າໜ້າທີ່ອາວຸໂສ ຄັ້ງທີ 5 ຂອງສະຫະພັນສະຖາບັນກວດສອບສູງສຸດບັນດາປະເທດອາຊີຕາເວັນອກກສ່ຽງໃຕ້ (ອາຊຽນຊາຍ) (The 5th ASEANSAI Senior Official s Meeting) ທີ່ອົງການກວດສອບແຫ່ງລັດ ສປປ ລາວ ໄດ້ຮັບກຽດເປັນເຈົ້າພາບ,ໄດ້ຈັດຂຶ້ນໃນວັນທີ 4 ກໍລະກົດນີ້ ທີ່ໂຮງແຮມຄຣາວພຣາຊາ ນະຄອນຫຼວງວຽງຈັນ ໂດຍການເປັນປະທານກ່າວເປີດງານ ຂອງທ່ານ ນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ສປປ ລາວ, ທັງເປັນປະທານຂອງ ສະຫະພັນສະຖາບັນກວດສອບສູງສຸດ ບັນດາປະເທດອາຊີຕາວັນອອກສ່ຽງໃຕ້, ມີບັນດາຜູ້ແທນຈາກ 10 ສະຖາບັນກວດສອບສູງສຸດຂອງບັນດາປະເທດສະມາຊິກອາຊຽນ ເຂົ້າຮ່ວມ.
ທ່ານ ນາງ ວຽງທອງ ສີພັນດອນ ໄດ້ສະແດງຄວາມຊົມເຊີຍຕໍ່ ຄະນະຜູ້ແທນຈາກສະຖາບັນກວດສອບສູງສຸດຂອງບັນດາປະເທດສະມາຊິກອາຊຽນ ທີ່ເດີນທາງມາເຂົ້າຮ່ວມກອງປະຊຸມຄັ້ງນີ້, ຊຶ່ງເຫັນໄດ້ເຖິງຄວາມເອົາໃຈໃສ່ຂອງບັນດາປະເທດສະມາຊິກ ທີ່ໄດ້ປະກອບສ່ວນອັນສຳຄັນເຂົ້າໃນການຈັດຕັ້ງປະຕິບັດວຽກງານຂອງສະຫະພັນສະຖາບັນກວດສອບສູງສຸດບັນດາປະເທດອາຊີຕາເວັນອອກສ່ຽງໃຕ້ ໂດຍສະເພາະແມ່ນການປຶກສາຫາລື ແລະ ທົບທວນຄືນກ່ຽວກັບບັນດາໜ້າວຽກທີ່ຈັດຕັ້ງປະຕິບັດໃນໄລຍະ 2018-2019 ພ້ອມທັງກຳນົດທິດທາງການເຄື່ອນໄຫວໃນປີ 2020-2021 ຂອງ 4 ຄະນະກຳມະການຂອງອາຊຽນຊາຍຄື: ຄະນະກຳມະການແຜນຍຸດທະສາດ, ຄະນະກຳມະການຝຶກອົບຮົມ, ຄະນະກຳມະການແລກປ່ຽນຄວາມຮູ້ ແລະ ຄະນະກຳມະການລະບຽບ ແລະ ຂັ້ນຕອນປະຕິບັດ ເພື່ອຮັບປະກັນຄວາມສອດຄ່ອງກັບການຈັດຕັ້ງປະຕິບັດວຽກງານຕົວຈິງຕາມສະພາບແວດລ້ອມໃນປັດຈຸບັນ ແລະ ຮັບປະກັນຄວາມເປັນເອກະພາບ ເຮັດໃຫ້ ສະຫະພັນສະຖາບັນກວດສອບສູງສຸດຂອງບັນດາປະເທດອາຊີຕາເວັນອອກສ່ຽງໃຕ້ສືບຕໍ່ນັບມື້ນັບເຂັ້ມແຂງຂຶ້ນ ຢ່າງມີສະຖຽນລະພາບ.
(ຂ່າວ: ອົງການກວດສອບແຫ່ງລັດ; ຮູບ: ບຸນຕອມ)