ຄະນະຜູ້ແທນອົງການລິເລີ່ມ ເພື່ອການ ພັດທະນາ ນັອກແວ ຢ້ຽມຢາມລາວ


...

11.07.2019 9:30     

   ທ່ານ ນາງ ວຽງທອງ ສີພັນ ດອນ ປະທານອົງການກວດສອບແຫ່ງລັດ ສປປ ລາວ ໄດ້ຕ້ອນຮັບຄະນະຜູ້ແທນອົງການລິເລີ່ມເພື່ອການພັດທະນາ INTOSAI DEVELOPMENT INITIATIVE (IDI), ຊຶ່ງນຳໂດຍ ທ່ານ ນາງ ອີລິນາ ສະເປລນ ໂກວາສກິ ປະທານອົງການລິເລີ່ມເພື່ອການພັດທະນາ ປະເທດນັອກແວ ພ້ອມດ້ວຍຄະນະ ໃນວັນທີ 8 ກໍລະກົດ ຜ່ານມາທີ່ອົງການກວດສອບແຫ່ງລັດ ໃນໂອກາດທີ່ຄະນະຜູ້ແທນດັ່ງກ່າວເດີນທາງມາຢ້ຽມຢາມລາວ ຊຶ່ງເປັນການມາເຄື່ອນໄຫວຕາມແຜນການຮ່ວມມື ກິດຈະກຳຂອງອົງການລິເລີ່ມເພື່ອການພັດທະນາ ປີ 2019 ຕໍ່ອົງການກວດສອບແຫ່ງລັດ ສປປ ລາວ. ໃນໂອກາດດັ່ງກ່າວ ທ່ານ ນາງ ວຽງທອງ ສີພັນດອນ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ຄະນະຜູ້ແທນ ດັ່ງກ່າວທີ່ໄດ້ເດີນທາງມາຢ້ຽມ ຢາມ ແລະ ເຮັດວຽກຢູ່ ສປປ ລາວ ຊຶ່ງເປັນການຮ່ວມມືຊ່ວຍ ເຫຼືອຊຶ່ງກັນ ແລະ ກັນ ລະຫວ່າງອົງການກວດສອບແຫ່ງລັດ ສປປ ລາວ ແລະ ອົງການລິເລີ່ມ ເພື່ອການພັດທະນາ ນັອກແວ ໃຫ້ນັບມື້ຂະຫຍາຍຕົວຂຶ້ນ. ການມາຢ້ຽມຢາມ ແລະ ເຮັດວຽກຂອງຄະນະຜູ້ ແທນດັ່ງກ່າວໃນຄັ້ງນີ້ ເປັນໄປຕາມແຜນງານກິດຈະກຳຂອງອົງການລິເລີ່ມເພື່ອການພັດທະນາ ເພື່ອໃຫ້ການສະ ໜັບສະໜູນການຝຶກອົບຮົມ ແລະ ແລກປ່ຽນຄວາມຮູ້ດ້ານວິຊາການໃນການປະເມີນການ ຈັດຕັ້ງປະຕິບັດວຽກງານໃນໄລຍະຜ່ານມາ ແລະ ກຳນົດທິດທາງແຜນການໃນຕໍ່ໜ້າ. ການມາເຮັດວຽກຂອງອົງການລິເລີ່ມເພື່ອການພັດ ທະນາ ກັບອົງການກວດສອບແຫ່ງລັດ ສປປ ລາວ ສະແດງໃຫ້ເຫັນເຖິງຄວາມເຊື່ອໝັ້ນ, ໄວ້ວາງໃຈ ແລະ ໃຫ້ການສະ ໜັບສະໜູນ ອົງການກວດສອບແຫ່ງລັດ ສປປ ລາວ ເພື່ອຍົກລະດັບຂີດຄວາມສາມາດຂອງອົງການກວດສອບແຫ່ງລັດ ກໍຄືການພັດທະນາວຽກງານດ້ານບຸກຄະລາກອນ, ວຽກງານກວດສອບແຫ່ງລັດ, ວຽກງານສະຖາບັນຝຶກອົບຮົມ ໃຫ້ນັບມື້ ນັບເຂັ້ມແຂງ ແລະ ຫັນເປັນມືອາຊີບເທື່ອລະກ້າວ. ນອກນັ້ນ, ກໍເພື່ອໃຫ້ສາມາດບັນລຸເປົ້າໝາຍແຜນຍຸດທະສາດ ຂອງອົງການກວດສອບແຫ່ງລັດ ທີ່ວາງໄວ້. ນອກນັ້ນ, ຍັງໄດ້ປຶກສາຫາລືທິດທາງແຜນການຮ່ວມມືໃນຕໍ່ໜ້າ ເພື່ອສືບຕໍ່ການສະ ໜັບສະໜູນອົງການກວດສອບແຫ່ງລັດ ໃນດ້ານອື່ນໆເພື່ອເປັນການພັດທະນາວຽກງານກວດສອບໃນຕໍ່ໜ້າ. (ຂ່າວ-ພາບ: ກວດສອບແຫ່ງລັດ)