ລາວ-ອາເມຣິກາ ຈະຮ່ວມມືສົ່ງເສີມ ຕ່ອງໂສ້ການຜະລິດກະສິກຳ


...

12.07.2019 8:45     

   ສປປ ລາວ-ສະຫະລັດອາເມຣິກາ ຈະຮ່ວມມືກັນ ດ້ານວຽກງານກະສິກໍາ ເພື່ອປັບປຸງຊີວິດການເປັນຢູ່ຂອງຊາວກະສິກອນໃຫ້ນັບມື້ນັບດີຂຶ້ນ, ໃນໄລຍະປະຕິບັດໂຄງການ 4 ປີ ( 2018-2021) ລວມມີມູນຄ່າທັງໝົດ 9 ລ້ານກວ່າໂດລາ. ໂຄງການ USADA CLEAN ແມ່ນໂຄງການທີ່ໄດ້ຮັບການສະໜັບສະໜູນດ້ານການເງິນຈາກ USADA ແລະ ຈັດຕັ້ງປະຕິບັດໂດຍອົງການ Winrock Internafional ປະຈຳ ສປປ ລາວ, ຊຶ່ງຈະປະຕິບັດທັງໃນນະຄອນຫຼວງວຽງຈັນ, ແຂວງວຽງຈັນ ລວມທັງເຂດພູພຽງບໍລະເວນທີ່ກວມເອົາ 3 ແຂວງຄື: ແຂວງຈໍາປາສັກ, ສາລະວັນ ແລະ ເຊກອງນໍາອີກ. ໂຄງການດັ່ງກ່າວຈະສ້າງຄວາມເຊື່ອມໂຍງກັບຕະຫຼາດ ແລະ ເພີ່ມຄວາມຕ້ອງການ ໃຫ້ແກ່ຜົນຜະລິດ ດ້ານກະສິກໍາທີ່ສະອາດຂອງລາວ ທັງພາຍໃນປະເທດ, ພາກພື້ນ ແລະ ສາກົນ ໂດຍຜ່ານການປະຕິບັດ ໃຫ້ສອດຄ່ອງກັບມາດຕະຖານ ແລະ ການປັບປຸງລະບົບ ຫຼັງການເກັບກ່ຽວ. ທ່ານ ລຽນທີແກ້ວ, ລັດ ຖະມົນຕີກະຊວງກະສິກໍາແລະປ່າໄມ້ ກ່າວວ່າ: ໂຄງການດັ່ງ ກ່າວໄດ້ສົ່ງເສີມພັດທະນາຕ່ອງ ໂສ້ການຜະລິດຂອງມັນຕົ້ນ, ກາເຟ, ຖົ່ວດາວອິນຄາ, ໝາກ ກ້ວຍ, ໝາກກ້ຽງ, ຜັກກະລໍ່າປີ ແລະ ພິກໄທ ເພື່ອຜະລິດພືດເປັນສິນຄ້າ ສົ່ງອອກຕ່າງ ປະເທດ, ເຫັນໄດ້ວ່າ ບັນດາພືດດັ່ງກ່າວ ເປັນທ່າແຮງ ແລະ ມີຄວາມສໍາຄັນທາງດ້ານເສດ ຖະກິດຂອງລາວສູງສຸດ. ທ່ານຍັງກ່າວຕື່ມວ່າ: ຂ້າ ພະເຈົ້າເຊື່ອໝັ້ນວ່າ ພາຍໃຕ້ການຊີ້ນໍາໆພາຂອງການນໍາຂະແໜງການກະສິກໍາ ແລະ ປ່າໄມ້, ການນໍານະຄອນຫຼວງ, ແຂວງວຽງຈັນ, ແຂວງສາລະວັນ, ແຂວງຈໍາປາສັກ ແລະ ແຂວງເຊກອງ ໂດຍສົມທົບກັບ ອົງການ ວິນຣອກ (winrock) ສາກົນ ປະຈໍາ ສປປ ລາວ, ໂຄງ ການດັ່ງກ່າວຈະຖືກປະຕິບັດໄປຕາມແຜນການ ແລະ ສໍາເລັດຕາມຈຸດປະສົງທີ່ວາງໄວ້. ທ່ານ ນາງ ຣີນາ ບິດເຕີ (RENA BITTER) ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສະຫະລັດອາເມຣິກາ ປະຈໍາລາວ ໄດ້ກ່າວວ່າ: ພວກເຮົາຕື່ນເຕັ້ນ ແລະ ດີໃຈຫຼາຍ ທີ່ຈະໄດ້ຮ່ວມມື ດ້ານກະສິກໍາ ກັບອົງການ ວິນຣອກ ປະຈຳ ລາວ ຍ້ອນວ່າ ຂະແໜງການກະສິກໍາ ຖືເປັນຂະແໜງທີ່ສໍາຄັນ ຕໍ່ກັບຊີວິດການເປັນຢູ່ຂອງປະຊາຊົນລາວ ໂດຍຜ່ານການສ້າງຂີດຄວາມສາມາດເພີ່ມກໍາລັງການຜະລິດ ແລະ ເຊື່ອມໂຍງຊາວກະສິກອນ ເຂົ້າສູ່ຕະຫຼາດໂຄງ ການດັ່ງກ່າວຈະສ້າງຜົນປະ ໂຫຍດໃຫ້ແກ່ປະຊາຊົນລາວຫຼາຍຄອບຄົວທີ່ມີຊີວິດການເປັນຢູ່ຕິດພັນກັບການກະສິກໍາ. ອົງການ ວິນຣອກ ສາກົນ ແມ່ນອົງການຈັດຕັ້ງສາກົນໜຶ່ງ ທີ່ບໍ່ຂຶ້ນກັບລັດຖະບານຂອງປະເທດສະຫະລັດອາເມຣິກາ ມີສໍານັກງານຕັ້ງຢູ່ນະຄອນຫຼວງວໍຊິງຕັນ ດິຊີ, ໄລຍະຜ່ານມາ, ອົງການດັ່ງກ່າວ ໄດ້ມີສ່ວນຮ່ວມ ໃນການຈັດຕັ້ງປະຕິບັດໂຄງການ ການພັດທະນາດ້ານສິ່ງແວດລ້ອມ; ການພັດທະນາວຽກງານສັງຄົມ ແລະ ການພັດທະນາວຽກງານດ້ານກະສິກໍາ ຫຼາຍກວ່າ 40 ປະເທດ ທົ່ວໂລກ; ປັດຈຸບັນ ອົງການດັ່ງກ່າວ ໂດຍໄດ້ຮັບທຶນ ສະໜັບສະໜູນ ຈາກກະຊວງກະສິກໍາ ປະເທດສະຫະລັດອາເມຣິກາ ກໍາລັງມາ ຈັດຕັ້ງປະຕິບັດໂຄງການພັດ ທະນາດ້ານກະສິກໍາຢູ່ ສປປ ລາວ ຄື: ໂຄງການສ້າງຄວາມເຊື່ອມໂຍງ ເພື່ອຂະຫຍາຍກະສິກໍາ. ພິທີເຊັນບົດບັນທຶກຄວາມ ເຂົ້າໃຈ ລະຫວ່າງກົມປູກຝັງ ກະຊວງກະສິກໍາ ແລະ ປ່າໄມ້ ແລະ ອົງການ ວິນຣອກ ສາ ກົນ ເພື່ອຈັດຕັ້ງປະຕິບັດໂຄງ ການສ້າງຄວາມເຊື່ອມໂຍງຂະ ຫຍາຍເຄືອຂ່າຍກະສິກໍາ, ໄດ້ມີຂຶ້ນໃນວັນທີ 10 ກໍລະກົດນີ້ ທີ່ໂຮງແຮມຄຣາວພາຊາ ລະຫວ່າງ ທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ກະຊວງກະສິກໍາ ແລະ ປ່າໄມ້ ແລະ ທ່ານ ອາເລັກຊານເດີ ເດຮັນ ຫົວໜ້າໂຄງການປະຈໍາອົງການ ວິນຣອກ, ໂດຍການເຂົ້າຮ່ວມເປັນສັກຂີພິຍານຂອງທ່ານ ລຽນ ທີແກ້ວ, ທ່ານ ນາງ ຣີນາ ບິດເຕີ ພ້ອມດ້ວຍແຂກຖືກເຊີນທີ່ກ່ຽວຂ້ອງທັງສອງຝ່າຍເຂົ້າຮ່ວມ. (ຂ່າວ: ແສງຈັນ)