ກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນຳ້ຂອງ-ແມ່ນຳ້ຄົງຄາ ຄັ້ງທີ 10


...

05.08.2019 9:44     

   ໃນວັນທີ 1 ສິງຫາຜ່ານມາ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດ ຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງຕອນລຸ່ມ-ສ. ອາເມຣິກາ ຄັ້ງທີ 12 ແລະ ຂອບການຮ່ວມມືແມ່ນໍ້າຂອງ-ແມ່ນ້ຳຄົງຄາ ຄັ້ງທີ 10 ທີ່ ບາງກອກ ປະເທດໄທ ຊຶ່ງມີບັນດາລັດຖະມົນຕີ ແລະ ຄະນະຜູ້ແທນຈາກປະເທດແມ່ນໍ້າຂອງ (ກໍາປູເຈຍ, ລາວ, ມຽນມາ, ໄທ, ຫວຽດນາມ) ແລະ ບັນດາຄູ່ຮ່ວມພັດທະນາ (ສ. ອາເມຣິກາ ແລະ ອິນເດຍ) ລວມທັງກອງເລຂາອາຊຽນເຂົ້າຮ່ວມ. ກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງຕອນລຸ່ມ-ສ. ອາເມຣິກາ ຄັ້ງທີ 12, ເປັນປະທານຮ່ວມ ລະຫວ່າງ ລັດຖະມົນຕີກະຊວງການຕ່າງປະເທດ ແຫ່ງ ຣາຊະອານາຈັກ ໄທ ແລະ ລັດຖະມົນຕີກະຊວງການຕ່າງປະເທດ ແຫ່ງ ສະຫະລັດ ອາເມຣິກາ. ກອງປະຊຸມ ໄດ້ສະແດງຄວາມຍິນດີຕໍ່ໝາກຜົນຂອງການຈັດຕັ້ງປະຕິບັດບັນດາແຜນວຽກ ແລະ ໂຄງການຕ່າງໆ ພາຍໃຕ້ຂອບຮ່ວມມືດັ່ງກ່າວໃນໄລຍະ 10 ປີ ຜ່ານມາ ຊຶ່ງໃນນັ້ນ ສປປ ລາວ ກໍໄດ້ຮ່ວມກັບ ສ.ອາເມຣິກາ ສໍາເລັດການຈັດຕັ້ງປະຕິບັດບັນດາໂຄງການຝຶກອົບຮົມດ້ານເຕັກນິກວິຊາການແບບຕໍ່ເນື່ອງ ເພື່ອຍົກລະດັບຄວາມອາດສາມາດໃຫ້ແກ່ບຸກຄະລາກອນ ຂອງ ສປປ ລາວ ຊຶ່ງບັນດາໂຄງການທີ່ພົ້ນເດັ່ນ ລວມມີ ໂຄງການຝຶກອົບຮົມພາສາອັງກິດສະເພາະດ້ານໃຫ້ແກ່ພະນັກງານລັດຖະກອນ ຢູ່ ສະຖາບັນການຕ່າງປະເທດ ໃນລະຫວ່າງປີ 2011-2017, ໂຄງການພື້ນຖານໂຄງລ່າງທີ່ທັນສະໄໝສໍາລັບແມ່ນໍ້າຂອງ (Smart Infrastructure for the Mekong ຫຼື SIM) ຢູ່ ກະຊວງພະລັງງານ ແລະ ບໍ່ແຮ່ ຈໍານວນທັງໝົດ 5 ໂຄງການ ໃນລະຫວ່າງປີ 2014-2017 ລວມມູນຄ່າຫຼາຍກວ່າ 1,75 ລ້ານໂດລາ, ໂຄງການເຊື່ອມຈອດແມ່ນໍ້າຂອງໂດຍຜ່ານການສຶກສາ ແລະ ຝຶກອົບຮົມ (Connecting the Mekong through Education and Training ຫຼື COMET) ຈໍານວນ 1 ໂຄງການ ສໍາລັບສົກປີ 2016-2017 ຢູ່ມະຫາວິທະຍາໄລແຫ່ງຊາດ ແລະ ໃນປີ 2017 ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ອົງການການສຶກສາໂລກ (World Education) ໄດ້ຮ່ວມສ້າງຕັ້ງສູນຝຶກອົບຮົມຝີມືແຮງງານສໍາລັບຜູ້ປະກອບການເພດຍິງ (Women's Entrepreneurial Centre), ຢູ່ນະຄອນຫຼວງວຽງຈັນ. ນອກຈາກນີ້, ບັນດາລັດຖະມົນຕີ ຍັງໄດ້ປຶກສາຫາລືກັນ ກ່ຽວກັບເອກະສານແນວຄວາມຄິດໃໝ່ທີ່ ສະຫະລັດ ອາເມຣິກາ ສະເໜີຂຶ້ນ ຊື່ວ່າ: "ໂຄງການຜົນກະທົບຕໍ່ສາທາ ລະນະ" ຫຼື LMI Public Impact Program ພ້ອມທັງແລກປ່ຽນຄວາມຄິດຄວາມເຫັນກ່ຽວກັບອະນາຄົດຂອງແມ່ນໍ້າຂອງ ໂດຍເນັ້ນໃສ່ຂົງເຂດຈຸດສຸມຂອງການຮ່ວມມືໃນປີຕໍ່ໜ້າ. ກອງປະຊຸມດັ່ງກ່າວຍັງໄດ້ຮັບຮອງເອົາເອກະສານສໍາຄັນ ຈໍານວນ 2 ສະບັບ ຄື: ຖະແຫຼງການຮ່ວມ ວ່າດ້ວຍ ການສະເຫຼີມສະຫຼອງຂອບການຮ່ວມມືແມ່ນໍ້າຂອງຕອນລຸ່ມ-ສ. ອາເມຣິກາ ຄົບຮອບ 10 ປີ ແລະ ຖະແຫຼງການຮ່ວມ ວ່າດ້ວຍ ການຮັດແໜ້ນຄວາມຮ່ວມມື ລະຫວ່າງ ເພື່ອນແມ່ນໍ້າຂອງຕອນລຸ່ມ ເພື່ອເປັນທິດທາງໃຫ້ແກ່ການຮ່ວມມືໃນຕໍ່ໜ້າ ແນໃສ່ສົ່ງເສີມການພັດທະນາເສດຖະກິດ-ສັງຄົມ ແລະ ຍົກສູງລະດັບຊີວິດການເປັນຢູ່ຂອງປະຊາຊົນ ໃນອະນຸພາກພື້ນແມ່ນໍ້າຂອງໃຫ້ດີຂຶ້ນເທື່ອລະກ້າວ. ພິເສດ ກ່ອນດຳເນີນກອງປະຊຸມ ບັນດາລັດຖະມົນຕີ ແລະ ຜູ້ເຂົ້າຮ່ວມທັງໝົດ ໄດ້ຮັບຊົມວີດີໂອໝາກຜົນຂອງການຮ່ວມມື ໃນຂອບການຮ່ວມມືແມ່ນ້ຳຂອງ - ສ. ອາເມຣິກາ ຄົບຮອບ 10 ປີ ແລະ ຕອນທ້າຍຂອງກອງປະຊຸມ ບັນດາລັດຖະມົນຕີກໍຍັງໄດ້ຮ່ວມພິທີມອບລາງວັນໃຫ້ບັນດາອະດີດນັກສຶກສາທີ່ດີເດັ່ນຂອງ LMI (LMI Outstanding Alumni Award Ceremony). ໃນຕອນບ່າຍຂອງວັນດຽວກັນ, ທ່ານ ສະເຫຼີມໄຊ ກົມມະສິດ ຍັງໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ແມ່ນ້ຳຄົງຄາ ຄັ້ງທີ 10 ຊຶ່ງເປັນປະທານຮ່ວມ ລະຫວ່າງ ທ່ານຮອງນາຍົກລັດຖະມົນຕີ ລັດຖະມົນ ຕີຕ່າງປະເທດຂອງ ສສ. ຫວຽດນາມ ແລະ ລັດຖະມົນຕີຕ່າງປະເທດຂອງອິນເດຍ. ກອງປະຊຸມ ໄດ້ທົບທວນຄືນຄວາມຄືບ ໜ້າຂອງການຈັດຕັ້ງປະຕິບັດວຽກງານຕ່າງໆພາຍໃຕ້ຂອບການຮ່ວມມືດັ່ງກ່າວ ໃນໄລຍະ 1 ປີຜ່ານມາ ໂດຍສະເພາະແມ່ນ ການຈັດຕັ້ງປະຕິບັດວຽກງານບຸລິມະສິດຕ່າງໆ ຢູ່ໃນແຜນປະຕິບັດງານຂອບການຮ່ວມມືແມ່ນໍ້າຂອງ-ແມ່ນ້ຳຄົງຄາ 2016-2018 ເຊັ່ນ: ວຽກງານດ້ານການທ່ອງທ່ຽວ, ວັດທະນະທຳ, ສຶກສາທິການ, ສາທາລະນະສຸກ, ຄົມມະນາຄົມ-ຂົນສົ່ງ, ຂໍ້ມູນຂ່າວສານ ແລະ ເຕັກໂນໂລຊີການສື່ສານ (ICT), ວິສາຫະກິດຂະໜາດນ້ອຍ ແລະ ຂະໜາດກາງ ແລະ ກະສິກຳ, ລວມທັງ ຄວາມຄືບໜ້າຂອງການຈັດຕັ້ງປະຕິບັດໂຄງການເຫັນຜົນໄວ (Quick Impact Project - QIP) ແລະ ການປຶກສາຫາລືແລກປ່ຽນຄຳຄິດເຫັນກ່ຽວກັບການຮ່ວມມືໃນຕໍ່ໜ້າ. ສຳລັບໂຄງການເຫັນຜົນໄວທີ່ ສປປ ລາວ ໄດ້ຮັບມີທັງໝົດ 3 ໂຄງການ ລວມມູນຄ່າ 150.000 ໂດລາ ຄື: 1) ໂຄງການຈັດຫາອຸປະກອນຫ້ອງວິໄຈຝຸ່ນ ທີ່ກົມຄຸ້ມຄອງ ແລະ ພັດທະນາທີ່ດິນກະສິກຳ; 2) ໂຄງການສົ່ງເສີມຄອບຄົວຕົວແບບເພື່ອລ້ຽງແບ້ເປັນຟາມ ທີ່ບ້ານແຈ້ງ ເມືອງທຸລະຄົມ ແຂວງ ວຽງຈັນ; ແລະ 3) ໂຄງ ການຂະຫຍາຍການປູກໝາກ ແໜ່ງອິນເດຍ (ໝາກແໜ່ງຂຽວ) ໃຫ້ແກ່ຊາວກະສິກອນ ທີ່ເມືອງປາກຊ່ອງ ແຂວງຈຳປາສັກ. ປັດຈຸບັນກຳລັງຢູ່ໃນຂັ້ນຕອນການຈັດຕັ້ງປະຕິບັດ. ນອກຈາກນີ້, ກອງປະຊຸມຍັງໄດ້ພິຈາລະນາ ແລະ ເຫັນດີຮັບຮອງເອົາ 2 ເອກະສານສໍາຄັນ ຄື: ຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນ້ຳຄົງຄາ ຄັ້ງທີ 10 ແລະ ແຜນປະຕິບັດງານຂອບການຮ່ວມມື ແມ່ນໍ້າຂອງ-ແມ່ນ້ຳຄົງຄາ 2018-2022 ສະບັບໃໝ່. (ຂ່າວ-ພາບ: ກະຊວງການຕ່າງປະເທດ)