ເປີດຂະບວນລົດໄຟຂົນສົ່ງສິນຄ້າຜ່ານແດນ ຂົວມິດຕະພາບ ລາວ-ໄທ


...

05.08.2019 10:00     

   ກົມທາງລົດໄຟ ກະຊວງໂຍທາທິການ ແລະ ຂົນສົ່ງ ໄດ້ຈັດພິທີເປີດແລ່ນຂະບວນລົດໄຟຂົນສົ່ງສິນຄ້າຜ່ານແດນຂ້າມຂົວມິດຕະພາບລາວ-ໄທ ແຫ່ງທີ 1 ຂຶ້ນຢ່າງເປັນທາງການໃນວັນທີ 1 ສິງຫາ ຜ່ານມາ ທີ່ລານຕູ້ສິນຄ້າທ່ານາແລ້ງ ເມືອງຫາດຊາຍຟອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ), ທ່ານ ກຽດຕິຄຸນ ຊາດປຣະເສີດ ເອກອັກຄະຣາຊະ ທູດໄທ ປະຈໍາ ສປປ ລາວ, ທ່ານ ວໍລະວຸດ ມາລາ ຮັກສາການແທນຜູ້ວ່າການ ການລົດໄຟແຫ່ງປະເທດໄທ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ໃນພິທີ ທ່ານ ແສງທະວີໃສ ມະລີວັນ ຫົວໜ້າກົມທາງລົດໄຟກ່າວວ່າ: ໂຄງການກໍ່ສ້າງທາງເຊື່ອມຕໍ່ລົດໄຟ ລາວ-ໄທ ໄລຍະທີ 1 ໄດ້ຮັບເງິນກູ້ຢືມ ແລະ ຊ່ວຍເຫຼືອຈາກອົງການນີດາປະເທດໄທໃນມູນຄ່າ 197 ລ້ານບາດ, ໄດ້ສໍາເລັດການກໍ່ສ້າງທາງລົດໄຟມີຄວາມຍາວ 3,5 ກິໂລແມັດ ໃນທ້າຍປີ 2008 ແລະ ໄດ້ເປີດການນໍາໃຊ້ຕົ້ນປີ 2009 ໂດຍປະຕິບັດຕາມສັນຍາຮ່ວມແລ່ນລົດໄຟ ລະຫວ່າງ ສອງລັດຖະບານ ລາວ-ໄທ ທີ່ໄດ້ລົງນາມສັນຍາຮ່ວມກັນໃນວັນທີ 30 ມີນາ 2008 ໂດຍເບື້ອງຕົ້ນໄດ້ດໍາເນີນການບໍລິການແລ່ນລົດໄຟຂົນສົ່ງໂດຍສານແຕ່ສະຖານີທ່ານາແລ້ງ ຫາ ສະຖານີໜອງຄາຍມີຄວາມຍາວ 6 ກິໂລແມັດ, ມີຜູ້ໂດຍສານນໍາໃຊ້ບໍລິການສະເລ່ຍ 35 ພັນຄົນຕໍ່ປີ, ມີ 2 ຖ້ຽວຕໍ່ມື້ ຊຶ່ງແມ່ນການຂົນສົ່ງທີ່ເປັນທາງເລືອກໜຶ່ງໃຫ້ພໍ່ແມ່ປະຊາຊົນສອງປະເທດ ແລະ ນັກທ່ອງທ່ຽວເດີນທາງໄດ້ດ້ວຍຄວາມສະດວກສະບາຍຫຼາຍຂຶ້ນ.
ໃນເດືອນມິຖຸນາ ປີ 2012 ໄດ້ລົງນາມກູ້ຢືມເງິນ ແລະ ຊ່ວຍເຫຼືອ ລະຫວ່າງ ລັດຖະບານ ລາວ-ໄທ ໄລຍະທີ 2 ໃນມູນຄ່າທັງໝົດ 1.650 ລ້ານບາດ ດ້ວຍທຶນກູ້ຢືມ 70% ແລະ ຊ່ວຍເຫຼືອ 30% ໃນນັ້ນ ໄດ້ແບ່ງອອກເປັນສອງຕອນຄື: ຕອນທີ 1 ໄດ້ຈັດຕັ້ງປະຕິບັດການກໍ່ສ້າງແຕ່ເດືອນມີນາ ປີ 2013 ແລະ ສໍາເລັດໃນເດືອນກັນຍາ ປີ 2015 ຊຶ່ງປະກອບມີລານຕູ້ສິນຄ້າ CY, ຫ້ອງການສາງໃນຮົ່ມ, ທາງລົດໄຟເຂົ້າໄປຫາລານຕູ້ສິນຄ້າ, ລາງຫຼີກລະບົບໂທລະຄົມ ແລະ ສິ່ງອໍານວຍຄວາມສະດວກຕ່າງໆໃນມູນຄ່່າ 655 ລ້ານບາດ (ສະກຸນເງິນໄທ). ສ່ວນຕອນທີ 2 ແມ່ນຈະສືບຕໍ່ສ້າງທາງລົດໄຟແຕ່ທ່ານາແລ້ງຫາ ສະຖານີ ນະຄອນຫຼວງວຽງຈັນ (ບ້ານຄໍາສະຫວາດ ເມືອງໄຊເຊດຖາ) ຄວາມຍາວ 7,5 ກິໂລແມັດ ຊຶ່ງໄດ້ລົງນາມກໍ່ສ້າງໃນວັນທີ 28 ມິຖຸນາ 2019 ຈະເລີ່ມກໍ່ສ້າງໃນເດືອນຕຸລາ 2019 ຄາດວ່າຈະໃຫ້ສໍາເລັດໃນເດືອນ ທັນວາ 2021 ເພື່ອສືບຕໍ່ການນໍາໃຊ້ລານຕູ້ສິນຄ້າ CY ໃຫ້ຖືກຕ້ອງຕາມຈຸດປະສົງເປົ້າໝາຍໃນວັນທີ 8 ພຶດສະພາ 2018 ໄດ້ມີການເຊັນບົດບັນທຶກຈັດຫາດ້ານເຕັກນິກ ລະຫວ່າງ ກົມທາງລົດໄຟ ກະຊວງ ຍທຂ ແລະ ການລົດໄຟ ແຫ່ງປະເທດໄທ ເພື່ອກະກຽມໃຫ້ແກ່ການຂົນສົ່ງສິນຄ້າທາງລົດໄຟ ຕາມສັນຍາທີ່ສອງລັດຖະບານລາວ-ໄທ ໄດ້ລົງນາມຮ່ວມກັນໄວ້ນັ້ນ, ສໍາລັບເວລາການຂົນສົ່ງສິນຄ້າແມ່ນຢູ່ໃນໄລຍະ 6 ໂມງ ຫາ 21 ໂມງ ໂດຍມີສອງຖ້ຽວຕໍ່ມື້, ນໍ້າໜັກສິນຄ້າບໍ່ເກີນ 15 ໂຕນຕໍ່ເພົາ ( 1 ຖ້ຽວມີ 10 ເພົາ). ໄລຍະຜ່ານມາກົມທາງລົດໄຟ ແລະ ການລົດໄຟ ແຫ່ງປະເທດໄທ ໄດ້ປະສານສົມທົບຢ່າງໃກ້ຊິດ ເພື່ອຊຸກຍູ້ພາກສ່ວນກ່ຽວຂ້ອງ ແລະ ເຈົ້າໜ້າທີ່ສອງປະເທດເພື່ອຊ່ວຍເຫຼືອອໍານວຍຄວາມສະດວກໃຫ້ຂະບວນລົດໄຟຂົນສົ່ງສິນຄ້າສາມາດແລ່ນຜ່ານໄປມາໄດ້ ອັນເປັນພື້ນຖານທີ່ດີໃຫ້ແກ່ການຂົນສົ່ງສິນຄ້າທາງລົດໄຟລາວ-ຈີນ ແລະ ໄທ-ຈີນ ທີ່ຈະເຊື່ອມຕໍ່ກັນໃນອະນາຄົດທີ່ຈະມາເຖິງນີ້.
(ຂ່າວ -ພາບ: ຍຸພິນທອງ)