ທູດລາວ ຍື່ນສານຕາຕັ້ງຕໍ່ປະທານາທິບໍດີ ມານດິບ


...

05.08.2019 10:02     

   ທ່ານ ບຸນແນມ ຈວງຫອມ ໄດ້ຍື່ນສານຕາຕັ້ງຕໍ່ ທ່ານ ອິບຣາຮິມ ໂມຮາເມດ ໂຊລິ (Ibrahim Mohamed Solih) ປະທານາທິບໍດີ ແຫ່ງ ສາທາ ລະນະລັດ ມານດິບ ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາສາທາລະນະລັດ ມານດິບ ເມື່ອບໍ່ດົນມານີ້ ທີ່ທຳນຽບປະທານາທິບໍດີ ນະຄອນຫຼວງມາເລ, ສາທາລະນະລັດມານດິບ ໂດຍມີສໍານັກງານຕັ້ງຢູ່ນະ ຄອນຫຼວງນິວເດນລີ ປະເທດອິນເດຍ.
ໃນໂອກາດດັ່ງກ່າວ, ທ່ານເອກອັກຄະລັດຖະທູດໄດ້ສະແດງຄວາມຂອບໃຈຢ່າງສູງ ແລະ ຖືເປັນກຽດຢ່າງຍິ່ງທີ່ ທ່ານປະທານາທິບໍດີໄດ້ໃຫ້ກຽດຮັບສານຕາຕັ້ງດັ່ງກ່າວ ແລະ ໄດ້ໃຫ້ຄໍາໝັ້ນສັນຍາວ່າ ໃນໄລຍະເວລາການປະຕິບັດໜ້າທີ່ການທູດຢູ່ມານດິບ ຈະພະຍາຍາມເຮັດສຸດຄວາມສາມາດຂອງຕົນ ເພື່ອຊຸກຍູ້ສົ່ງເສີມສາຍພົວພັນ ມິດຕະພາບທີ່ດີງາມ ແລະ ການຮ່ວມມືສອງຝ່າຍໃຫ້ມີບາດກ້າວໃໝ່ ແລະ ຂະ ຫຍາຍຕົວຂຶ້ນໄປເລື້ອຍໆ. ພ້ອມນີ້, ທ່ານເອກອັກຄະລັດຖະທູດລາວ ກໍໄດ້ນໍາເອົາຄໍາອວຍພອນອັນປະເສີດ ແລະ ຄໍາຊົມເຊີຍອັນອົບອຸ່ນຂອງ ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ, ຝາກເຖິງ ທ່ານປະທານາທິບໍດີ ເນື່ອງໃນໂອກາດວັນຊາດຂອງ ສາທາລະນະລັດ ມານດິບ ຄົບຮອບ 54 ປີ ໃຫ້ທ່ານຈົ່ງມີພະລານາໄມແຂງແຮງ ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ແລະ ປະສົບຜົນສໍາເລັດໃນພາລະໜ້າທີ່ອັນມີກຽດຂອງທ່ານ ແລະ ຝາກຄໍາເຊື້ອເຊີນ ທ່ານປະທານາທິບໍດີມານດິບ ມາຢ້ຽມຢາມ ສປປ ລາວ ໃນເວລາທີ່ທ່ານສະດວກ.
ໃນວັນດຽວກັນນັ້ນ, ທ່ານເອກອັກຄະລັດຖະທູດລາວຍັງໄດ້ເຂົ້າຢ້ຽມຂາໍ່ນັບທ່ານ ອັບດູນລາ ຊາຮິດ (Abdulla Shahid) ລັດຖະມົນຕີກະຊວງການຕ່າງປະເທດມານດິບ ແລະ ທ່ານ ອາເມດ ຄາລີ (Ahmed Khaleel) ຮອງລັດຖະມົນຕີກະຊວງການຕ່າງປະເທດມານດິບ ຊຶ່ງທ່ານທູດໄດ້ແຈ້ງໃຫ້ຊາບກ່ຽວກັບສະພາບການພັດ ທະນາເສດຖະກິດ-ສັງຄົມຂອງ ສປປ ລາວ ໂດຍລວມ ແລະ ໄດ້ແລກປ່ຽນຄວາມຄິດຄວາມເຫັນກ່ຽວກັບທ່າແຮງໃນຂົງເຂດຕ່າງໆທີ່ສອງຝ່າຍສາມາດຮ່ວມມືກັນໄດ້ ໂດຍສະເພາະການພັດທະນາຊັບ ພະຍາກອນມະນຸດ, ການທ່ອງ ທ່ຽວ ແລະ ອື່ນໆ ລວມທັງ ການສະໜັບສະໜູນ ຊຶ່ງກັນ ແລະ ກັນໃນເວທີພາກພື້ນ ແລະ ສາກົນ ຊຶ່ງຈະນໍາເອົາຜົນປະໂຫຍດມາສູ່ປະຊາຊົນສອງຊາດໃນຕໍ່ໜ້າ. ໃນໂອກາດດຽວກັນ, ທ່ານເອກອັກຄະລັດຖະທູດລາວພ້ອມຄະນະຍັງໄດ້ເຂົ້້າຮ່ວມງານລ້ຽງ ແລະ ພິທີສວນສະໜາມຄັ້ງໃຫຍ່ ເພື່ອສະເຫຼີມສະຫຼອງວັນຊາດມານດິບຄົບຮອບ 54 ປີ.
ສປປ ລາວ ແລະ ສ.ມານດິບ ໄດ້ສ້າງຕັ້ງສາຍພົວພັນການທູດນໍາກັນວັນທີ 10 ກຸມພາ 2012, ເຖິງວ່າຍັງເປັນໄລຍະເວລາສັ້ນໆ ແຕ່ສາຍພົວພັນຮ່ວມມືດັ່ງກ່າວກໍໄດ້ກາຍເປັນມູນເຊື້ອດີງາມ ແລະ ທັງສອງຝ່າຍກໍພະຍາຍາມຫາຊ່ອງທາງ ເພື່ອຊຸກຍູ້ສົ່ງເສີມສາຍພົວພັນ ແລະ ການຮ່ວມມື ຕາມທ່າແຮງຂອງຕົນ ໃຫ້ກາຍເປັນຮູບປະທໍາຫຼາຍຂຶ້ນ.
ສາທາລະນະລັດ ມານດິບ ມີເນື້ອທີ່ທັງໝົດ 297,8 ຕາຕະລາງກິໂລແມັດ ຊຶ່ງເປັນເນື້ອທີ່ດິນກວມເອົາພຽງ 1%, ສ່ວນທີ່ເຫຼືອ 99% ລ້ວນແຕ່ເປັນທະເລ ແລະ ມີປະຊາກອນທັງໝົດ 452.184 ຄົນ (ປີ2019). ມານດິບເປັນໜຶ່ງໃນບັນດາປະເທດອາຊີໃຕ້ທີ່ມີເສດຖະກິດຂະຫຍາຍຕົວໄວໃນລະດັບ 8,8% (ປີ2017) ແລະ ລາຍຮັບຕໍ່ຫົວຄົນແມ່ນ 10.535 ໂດລາ/ຄົນ/ປີ (ປີ2017). ມານດິບເປັນປະເທດທີ່ມີທິວທັດທໍາມະຊາດທີ່ສວຍງາມ ໂດຍສະເພາະບັນດາເກາະດອນທີ່ເປັນເອກະລັກ ທີ່ດຶງດູດນັກທ່ອງທ່ຽວຫຼາຍລ້ານຄົນ ແລະ ໄດ້ກາຍເປັນຈຸດໝາຍການທ່ອງທ່ຽວທີ່ີມີຊື່ສຽງຂອງໂລກ ທີ່ສາມາດລາຍຮັບເປັນອັນດັບໜຶ່ງໃຫ້ແກ່ປະເທດ ແລະ ຮອງລົງມາແມ່ນການປະມົງ.
(ຂ່າວ-ຮູບ: ກະຊວງການຕ່າງປະເທດ)