ເປີດສາຍການບິນ ຫາງໂຈ່ວ-ວຽງຈັນ-ຫາງໂຈ່ວ


...

05.08.2019 10:02     

   ພິທີເປີດສາຍການບິນຮອບປະຖົມມະເລີກ ຫາງໂຈ່ວ-ວຽງຈັນ-ຫາງໂຈ່ວ ໄດ້ຈັດຂຶ້ນຢ່າງເປັນທາງການໃນທ້າຍເດືອນກໍລະກົດຜ່ານມານີ້ ທີ່ນະຄອນຫາງໂຈ່ວ ແຂວງເຈີ້ຈຽງ ສປ ຈີນ ໂດຍມີທ່ານ ອຸ່ນທວງ ຂາວພັນ ຮອງລັດຖະມົນ ຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ຈາງ ຈ້ຽນຕິງ ຮອງປະທານສະພາປະຊາຊົນນະຄອນຫາງໂຈ່ວ, ມີພາກສ່ວນກ່ຽວຂ້ອງເຂົ້າຮ່ວມ.
ການເປີດສາຍການບິນ ວຽງຈັນ-ຫາງໂຈ່ວ-ວຽງຈັນຄັ້ງນີ້ ເປັນຖ້ຽວບິນເໝົາລຳຂອງສາຍການບິນລາວ QV 852 ໂດຍແມ່ນບໍລິສັດບໍລິການ ສາຍການບິນເປົາເຊິນເຈີ້ຈຽງຈໍາກັດ ເປັນຜູ້ຮັບເໝົາ ຊຶ່ງຈະໃຫ້ບໍລິການ 1 ຖ້ຽວຕໍ່ອາທິດ (ທຸກໆວັນພຸດ) ຊຶ່ງເປັນກິດຈະກໍາໜຶ່ງທີ່ສໍາຄັນປະກອບສ່ວນໂຄສະນາສົ່ງເສີມການທ່ອງທ່ຽວ ທີ່ຜູ້ນຳສອງປະເທດລາວ-ຈີນ ເຫັນດີເປັນເອກະພາບຈັດຕັ້ງປີທ່ອງທ່ຽວລາວ-ຈີນ 2019 ຂຶ້ນ, ປະກອບສ່ວນອັນສໍາຄັນໃຫ້ແກ່ການພົວພັນຮ່ວມມື, ການພັດທະນາເສດຖະກິດ-ສັງຄົມ, ສົ່ງເສີມການຄ້າ-ການລົງທຶນ, ເພີ່ມຄວາມສະດວກສະບາຍໃຫ້ແກ່ການເດີນທາງ, ການທ່ອງທ່ຽວ ໄປມາຫາສູ່ກັນ ຂອງປະຊາຊົນລາວ-ຈີນ ກໍຄືຊາວນະຄອນຫາງໂຈ່ວ ນັບມື້ນັບສະດວກຂຶ້ນເທື່ອລະກ້າວ.
ນັກທ່ອງທ່ຽວຈີນ ເປັນຕະຫຼາດໃຫຍ່ ແລະ ສຳຄັນຂອງການທ່ອງທ່ຽວລາວ; ໃນປີ 2018 ມີນັກທ່ອງທ່ຽວຈີນ ມາທ່ຽວລາວ ຈຳນວນ 799.929 ເທື່ອຄົນ, ເພີ່ມຂຶ້ນ 25% ຖ້າທຽບໃສ່ປີ 2017 ແລະ ໃນ 6 ເດືອນທຳອິດຂອງປີ 2019 ເພີ່ມຂຶ້ນ 13% ທຽບໃສ່ໄລຍະເວລາດຽວກັນຂອງປີຜ່ານມາ ຊຶ່ງຄາດວ່າ ຈໍານວນນັກທ່ອງທ່ຽວຈີນ ທີ່ເຂົ້າມາທ່ຽວລາວ ຈະບັນລຸໂຕເລກຄາດໝາຍ 1 ລ້ານເທື່ອຄົນ ຊຶ່ງເປັນໂຕເລກທີ່ລັດຖະບານ ລາວໄດ້ກໍານົດໄວ້ໃນປີທ່ອງທ່ຽວລາວ-ຈີນ 2019.