ທູດລາວຍື່ນສານຕາຕັ້ງຕໍ່ປະທານາທິບໍດີ ສ.ອາແຊັກບາຍຊານ


...

09.08.2019 10:02     

   ໃນວັນທີ 2 ສິງຫາຜ່ານມາ ທີ່ນະຄອນຫຼວງບາກູ, ທ່ານ ສີວຽງເພັດ ເພັດວໍລະສັກ ໄດ້ຍື່ນສານຕາຕັ້ງຕໍ່ພະນະທ່ານ ອິລຮາມ ອາລີແຢບ (Ilham Aliyev), ປະທານາທິບໍດີ ສາທາລະນະລັດ ອາແຊັກບາຍຊານ ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ສາທາລະນະລັດ ອາແຊກບາຍຊານ ໂດຍມີສໍານັກງານຕັ້ງຢູ່ນະຄອນຫຼວງມົສກູ ສະຫະພັນຣັດເຊຍ. ໃນໂອກາດນີ້, ກ່ອນອື່ນໝົດ ທ່ານເອກອັກຄະລັດຖະທູດ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ພ້ອມດ້ວຍພອນໄຊອັນປະເສີດຈາກ ພະນະທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປລາວ ຝາກເຖິງພະນະທ່ານປະທານາທິບໍດີ ສາທາລະນະລັດ ອາແຊັກບາຍຊານ, ລັດຖະບານ ແລະ ປະຊາຊົນອາແຊັກບາຍຊານ ທຸກຖ້ວນໜ້າ. ພ້ອມນີ້, ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈຢ່າງສູງ ແລະ ຖືເປັນກຽດຢ່າງຍິ່ງທີ່ພະນະທ່ານປະທານາທິບໍດີໃຫ້ກຽດຮັບສານຕາຕັ້ງດັ່ງກ່າວ. ພະນະທ່ານ ອິລຮາມ ອາລີແຢບ ໄດ້ສະແດງຄວາມຂອບໃຈ ແລະ ຝາກຄວາມຢື້ຢາມຖາມຂ່າວອັນອົບອຸ່ນ ພ້ອມດ້ວຍພອນໄຊອັນປະເສີດຂອງຕົນ ຝາກເຖິງພະນະທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ , ລັດຖະບານ ແລະ ປະຊາຊົນລາວ ທຸກຖ້ວນໜ້າເຊັ່ນກັນ. ພ້ອມກັນນີ້, ກໍໄດ້ສະແດງຄວາມຊົມເຊີຍຕໍ່ທ່ານ ສີວຽງເພັດ ເພັດວໍລະສັກທີ່ໄດ້ຖືກແຕ່່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ສາທາລະນະລັດ ອາແຊັກບາຍຊານ. ສາທາລະນະລັດ ປະຊາ ທິປະໄຕ ປະຊາຊົນລາວ ແລະ ສາທາລະນະລັດ ອາແຊັກບາຍຊານ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 22 ພຶດສະພາ ປີ 1995.