ລາວ - ຫວຽດນາມ ສືບຕໍ່ເພີ່ມພູນຄູນສ້າງສາຍພົວພັນ ມິດຕະພາບກ້າວຂຶ້ນສູ່ລະດັບໃໝ່


...

14.08.2019 11:17     

   ແຫຼ່ງຂ່າວຈາກສຳນັກງານຂ່າວສານຫວຽດນາມແຈ້ງໃຫ້ ຮູ້ວ່າ: ເມື່ອບໍ່ດົນມານີ້ ຢູ່ສຳນັກ ງານສູນກາງພັກ, ສະຫາຍ ຫງວຽນຝູຈ້ອງ ເລຂາທິການໃຫຍ່ປະທານປະເທດແຫ່ງ ສສ ຫວຽດນາມ ໄດ້ຕ້ອນຮັບ ແລະ ພົບປະກັບສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໃນໂອກາດຢ້ຽມຢາມ ສສ ຫວຽດນາມ.
ເລຂາທິການໃຫຍ່ ປະທານປະເທດ ຫງວຽນຝູຈ້ອງ ແລະ ເລຂາທິການໃຫຍ່ ປະທານປະເທດ ບຸນຍັງ ວໍລະຈິດ ສະແດງຄວາມດີໃຈຢ່າງຍິ່ງທີ່ ໄດ້ມີໂອກາດພົບກັນອີກເທື່ອໜຶ່ງ, ສະແດງຄວາມປິຕິຊົມເຊີຍບັນດາຜົນສຳເລັດອັນສຳຄັນ ທັງພາຍໃນ ແລະ ຕ່າງປະເທດ ພາຍຫຼັງ 3 ປີກວ່າດຳເນີນ ການຈັດຕັ້ງປະຕິບັດ ມະຕິ ກອງ ປະຊຸມໃຫຍ່ຂອງແຕ່ລະພັກ, ສະແດງຄວາມເຊື່ອໝັ້ນຢ່າງໜັກແໜ້ນວ່າພາຍໃຕ້ການນຳ ພາຂອງພັກກອມມູນິດຫວຽດ ນາມ ແລະ ພັກປະຊາຊົນ ປະ ຕິວັດລາວ ພາລະກິດການປ່ຽນ ແປງໃໝ່, ປົກປັກຮັກສາ ແລະ ສ້າງສາພັດທະນາປະເທດເທດຊາດ ຢູ່ຫວຽດນາມ ແລະ ລາວ ຈະສືບຕໍ່ຍາດໄດ້ຜົນສຳເລັດອັນໃໝ່ໃຫຍ່ຫຼວງກວ່າເກົ່າ, ຈັດຕັ້ງປະຕິບັດບັນດາເປົ້າໝາຍຂອງແຕ່ລະພັກວາງອອກໄດ້ຢ່າງມີໄຊ, ກະກຽມ ແລະ ຈັດກອງປະຊຸມໃຫຍ່ອົງຄະນະພັກແຕ່ລະຂັ້ນສຳເລັດຜົນ, ກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດ ຂອງແຕ່ລະພັກ.
ເລຂາທິການໃຫຍ່ປະ ທານປະເທດ ຫງວຽນຝູຈ້ອງ ແລະ ເລຂາທິການໃຫຍ່ ປະ ທານປະເທດ ບຸນຍັງ ວໍລະຈິດ ສະແດງຄວາມພາກພູມໃຈເປັນຢ່າງຍິ່ງ ທີ່ເຫັນວ່າ ສາຍພົວພັນຄວາມສາມັກຄີພິເສດ ຫວຽດນາມ - ລາວ ນັບມື້ນັບໄດ້ຮັບການຂະຫຍາຍຕົວກ້າວ ເຂົ້າສູ່ລວງເລິກ, ແທດຕົວຈິງ ແລະ ມີປະສິດທິຜົນໃນທຸກຂົງເຂດ, ນຳເອົາຜົນປະໂຫຍດຕົວຈິງມາສູ່ປະຊາຊົນຂອງແຕ່ລະປະເທດປະກອບສ່ວນເຂົ້າໃນການສ້າງສັນຕິພາບ, ຄວາມໝັ້ນຄົງ, ການຮ່ວມມື ແລະ ພັດທະນາຢູ່ໃນພາກພື້ນ ແລະ ໃນໂລກ, ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ການສະໜັບສະໜູນ ແລະ ການຊ່ວຍເຫຼືອອັນໃຫຍ່ຫຼວງ, ທັນ ການ ແລະ ມີປະສິດທິຜົນທີ່ສອງພັກ, ສອງລັດ ມີໃຫ້ແກ່ກັນໃນເມື່ອກ່ອນກໍຄືໃນປັດຈຸບັນ. ສອງຝ່າຍຢັ້ງຢືນວ່າ ຈະປະສານສົມທົບກັນຢ່າງແໜ້ນແຟ້ນ ຈັດຕັ້ງປະຕິບັດຢ່າງມີປະສິດທິຜົນບັນດາຂໍ້ຕົກລົງລະຫວ່າງການນຳຂັ້ນສູງຂອງສອງພັກ, ສອງລັດ, ປົກປັກຮັກສາ ແລະ ເພີ່ມພູນຄູນສ້າງສາຍພົວພັນມິດ ຕະພາບອັນຍິ່ງໃຫຍ່່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ຂະຫຍາຍຕົວກ້າວຂຶ້ນສູ່ລະດັບໃໝ່ ແລະ ສຶກສາອົບຮົມໃຫ້ແກ່ບັນດາຮຸ່ນຄົນສືບທອດສາຍພົວພັນຄວາມສາມັກຄີພິເສດດັ່ງກ່າວ.
ເລຂາທິການໃຫຍ່ປະ ທານປະເທດ ຫງວຽນຝູຈ້ອງ ແລະ ເລຂາທິການໃຫຍ່ ປະ ທານປະເທດ ບຸນຍັງ ວໍລະຈິດ ໄດ້ແຈ້ງສະພາບຂອງແຕ່ລະພັກ, ແຕ່ລະປະເທດໃນປັດຈຸບັນໃຫ້ກັນຊາບ ໂດຍສະເພາະແມ່ນວຽກງານກໍ່ສ້າງພັກ ແລະ ກະກຽມກອງປະຊຸມໃຫຍ່ອົງ ຄະນະພັກແຕ່ລະຂັ້ນກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດຂອງແຕ່ລະພັກ, ແລກປ່ຽນກ່ຽວກັບສະພາບການສາກົນ ແລະ ພາກພື້ນທີ່ພົ້ນເດັ່ນທີ່ຕ່າງຝ່າຍຕ່າງມີຄວາມສົນໃຈ, ແລກປ່ຽນບາງມາດຕະການຊຸກຍູ້ສາຍພົວພັນສາມັກຄີພິເສດ ຫວຽດນາມ - ລາວ ໃນຕໍ່ໜ້າ.
(ຂ່າວ: ຈາກ ຄະນະພົວພັນຕ່າງປະເທດສູນກາງພັກ ປປ ລາວ)