ທູດລາວ ຍື່ນສານຕາຕັ້ງຕໍ່ປະທານາທິບໍດີ ບັງກລາເທດ


...

14.08.2019 10:27     

   ທ່ານ ບຸນແນມ ຈວງຫອມ ໄດ້ຍື່ນສານຕາຕັ້ງຕໍ່ພະນະ ທ່ານ ເມັມ ອັບດູລ ຮາມິດ( M Abdul Hamid ) ປະທານາ ທິບໍດີ ແຫ່ງ ສາທາລະນະລັດ ປະຊາຊົນ ບັງກລາເທດ,ເພື່ອ ດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ສາທາລະນະລັດ ປະຊາຊົນ ບັງກລາເທດ ໃນວັນທີ 8 ສິງຫາຜ່ານມານີ້ ທີ່ທໍານຽບປະທານາທິບໍດີນະຄອນຫຼວງດາກາ ຊຶ່ງມີສໍານັກງານຕັ້ງຢູ່ ນະຄອນຫຼວງນິວເດນລີ ປະເທດອິນເດຍ.
ໃນໂອກາດດັ່ງກ່າວ, ທ່ານທູດໄດ້ສະແດງຄວາມຂອບໃຈຢ່າງ ສູງ ແລະ ຖືເປັນກຽດຢ່າງຍິ່ງທີ່ທ່ານປະທານາທິບໍດີໄດ້ໃຫ້ກຽດຮັບສານຕາຕັ້ງດັ່ງກ່າວ ແລະ ໄດ້ໃຫ້ຄໍາໝັ້ນສັນຍາວ່າ ໃນໄລຍະເວລາການປະຕິບັດໜ້າທີ່ການທູດຢູ່ບັງກລາເທດ ທ່ານຈະພະຍາຍາມເຮັດສຸດຄວາມສາມາດຂອງຕົນ ເພື່ອຊຸກຍູ້ສົ່ງເສີມສາຍພົວພັນມິດ ຕະພາບທີ່ມີມູນເຊື້ອດີງາມ ແລະ ການຮ່ວມມືສອງຝ່າຍໃຫ້ຂະຫຍາຍຕົວຂຶ້ນໄປເລື້ອຍໆ. ພ້ອມນີ້, ທ່ານທູດລາວກໍໄດ້ນໍາເອົາຄໍາອວຍພອນໄຊອັນປະເສີດຂອງ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ຝາກເຖິງປະທານາທິບໍດີ ເມັມ ອັບດູລ ຮາມິດ (M Abdul Hamid) ຈົ່ງມີພະລານາໄມສົມບູນ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ແລະ ໄດ້ຮັບຜົນສໍາເລັດໃນໜ້າທີ່ ແລະ ຝາກເຊື້ອເຊີນທ່ານປະທານາທິບໍດີບັງກລາເທດ ມາຢ້ຽມຢາມ ສປປ ລາວ ໃນເວລາທີ່ທ່ານສະດວກ.
ສປປ ລາວ ແລະ ສປ ບັງ ກລາເທດ ໄດ້ສ້າງຕັ້ງສາຍພົວ ພັນການທູດນໍາກັນໃນປີ 1988 ເຖິງວ່າການພົວພັນຮ່ວມມືທາງດ້ານເສດຖະກິດຍັງມີຂອບເຂດຈໍາກັດ, ແຕ່ສອງຝ່າຍກໍໄດ້ມີການແລກປ່ຽນການຢ້ຽມຢາມຊຶ່ງກັນ ແລະ ກັນຂອງຄະນະຜູ້ແທນໃນລະດັບຕ່າງໆຢ່າງເປັນປົກກະຕິ ແລະ ໄດ້ໃຫ້ການສະໜັບສະໜູນຊຶ່ງກັນ ແລະ ກັນໃນເວທີພາກພື້ນ ແລະ ສາກົນ.
ສາທາລະນະລັດ ປະຊາຊົນ ບັງກລາເທດ ມີເນື້ອທີ່ທັງໝົດ 147.570 ກິໂລຕາແມັດ ແລະ ມີປະຊາກອນທັງໝົດປະມານ 163 ລ້ານຄົນ (ໃນປີ 2019). ບັງກລາເທດເປັນໜຶ່ງໃນບັນດາປະເທດອາຊີໃຕ້ທີ່ມີປະຊາກອນແໜ້ນໜາທີ່ສຸດໃນໂລກ, ສະເລ່ຍ 1.106 ຄົນຕໍ່ກິໂລຕາແມັດ; ເປັນໜຶ່ງໃນບັນດາປະເທດອາຊີໃຕ້ທີ່ມີເສດຖະກິດຂະຫຍາຍຕົວໄວ ໃນລະດັບ 8,8% (2017) ແລະ ລາຍຮັບຕໍ່ຫົວຄົນຕໍ່ປີປະມານ 1.888 ໂດລາ. ບັງກລາເທດເປັນສູນກາງທາງດ້ານທຸລະກິດໃນອາຊີໃຕ້ ແລະ ເປັນປະເທດທີ່ມີສູນກາງເສດຖະກິດໃຫຍ່ທີ່ສຸດໃນທິດຕາເວັນອອກຂອງອາຊີໃຕ້ ໂດຍມີການຜະລິດເຄື່ອງນຸ່ງຫົ່ມ ແລະ ແຜ່ນແຜທີ່ໃຫຍ່ອັນດັບຕົ້ນໆໃນອາຊີໃຕ້ ເພື່ອຈໍາໜ່າຍທັງພາຍໃນ ແລະ ຕ່າງປະເທດ ຊຶ່ງເປັນຂະແໜງການທີ່ນໍາລາຍໄດ້ຫຼັກມາສູ່ປະເທດ.
(ຂ່າວ+ພາບ: ກະຊວງການຕ່າງປະເທດ)