ທ່ານ ນາງ ສູນທອນ ໄຊຍະຈັກ ຕ້ອນຮັບທູດຣັດເຊຍ ເຂົ້າຢ້ຽມຂໍ່ານັບອຳລາ


...

05.09.2019 8:13     

   ວັນທີ 3 ກັນຍານີ້ ທີ່ຄະນະ ພົວພັນຕ່າງປະເທດສູນກາງພັກ, ທ່ານນາງ ສູນທອນ ໄຊຍະຈັກ ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອໍາລາຂອງທ່ານ ມີຄາອິນ ບາຣານົບ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສະຫະ ພັນ ຣັດເຊຍ ປະຈຳ ສປປ ລາວ ກ່ອນຈະເດີນທາງກັບຄືນປະ ເທດ ພາຍຫຼັງສຳເລັດການປະ ຕິບັດໜ້າທີ່ການທູດ ປະຈຳ ສປປ ລາວ ເປັນເວລາ 5 ປີກວ່າ. ໃນໂອກາດນີ້, ທ່ານນາງ ສູນທອນ ໄຊຍະຈັກ ໄດ້ກ່າວສະແດງຄວາມຊົມເຊີຍຕໍ່ຜົນ ງານອັນຫຼວງຫຼາຍຂອງທ່ານທູດທີ່ໄດ້ປະກອບສ່ວນເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງສອງປະເທດຣັດເຊຍ-ລາວ ໃນຂົງເຂດຕ່າງໆ, ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນສະຫະພັນຣັດເຊຍ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ລາວ ໃນພາລະ ກິດຕໍ່ສູ້ປົກປັກຮັກສາປະເທດຊາດ ໃນເມື່ອກ່ອນກໍຄືການສ້າງສາພັດທະນາໃນປັດຈຸບັນ ແລະ ຫວັງຢ່າງຍິ່ງວ່າ ການພົວ ພັນ ແລະ ການຮ່ວມມືລະ ຫວ່າງສປປ ລາວ ແລະ ສ.ຣັດເຊຍ ຈະສືບຕໍ່ເຕີບໃຫຍ່ຂະຫຍາຍຕົວ ແລະ ມີປະສິດທິຜົນຍິ່ງໆຂຶ້ນ ເພື່ອຜົນປະໂຫຍດຂອງປະຊາ ຊົນ 2 ຊາດກໍຄື ເພື່ອສັນຕິພາບ, ມິດຕະພາບ ແລະ ການຮ່ວມມື ໃນພາກພື້ນ ແລະ ໃນໂລກ. ທ່ານ ມີຄາອິນ ບາຣານົບ ໄດ້ສະແດງຄວາມຂອບໃຈຕໍ່ທ່ານຫົວໜ້າຄະນະພົວພັນຕ່າງປະເທດສູນກາງພັກກໍຄືການນໍາຂອງຂະແໜງການອື່ນໆ ທີ່ໄດ້ໃຫ້ຄວາມຊ່ວຍເຫຼືອ ແລະ ອໍານວຍຄວາມສະດວກແກ່ທ່ານ ໃນການປະຕິບັດໜ້າທີ່ການທູດຢູ່ລາວເປັນເວລາ 5 ປີກວ່າຜ່ານມາ. ທ່ານທູດໄດ້ຕີລາຄາສູງຕໍ່ການແລກປ່ຽນຢ້ຽມຢາມຊຶ່ງກັນ ແລະ ກັນຂອງ ການນໍາຂັ້ນສູງຂອງ 2 ປະເທດ ໃນໄລຍະຜ່ານມາກໍຄືການພົວ ພັນລະຫວ່າງສາຍພັກ ແລະ ສາຍອົງການຈັດຕັ້ງມະຫາຊົນຂອງສອງປະເທດທີ່ມີການພົວ ພັນ ແລະ ໄປມາຫາສູ່ກັນຢ່າງເປັນປົກກະຕິ. ທ່ານ ນາງ ສູນທອນ ໄຊຍະຈັກ ໄດ້ອວຍພອນໃຫ້ທ່ານ ທູດ ມີຄາອິນ ບາຣານົບ ກັບຄືນປະເທດດ້ວຍຄວາມສະຫວັດດີພາບ ແລະ ໄດ້ຮັບຜົນສໍາເລັດໃນ ໜ້າທີ່ໃໝ່ທີ່ສໍາຄັນຂອງທ່ານ. (ຂ່າວ: ຄຕພ)