ທ່ານ ສະເຫຼີມໄຊ ກົມມະສິດ ຕີລາຄາສູງ ຕໍ່ການຊ່ວຍເຫຼືອຂອງເອີຣົບ


...

10.09.2019 8:14     

   ໃນຕອນບ່າຍຂອງວັນທີ 9 ກັນຍານີ້ ທີ່ກະຊວງການຕ່າງປະເທດ, ທ່ານ ສະເຫຼີມໄຊກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ເນເວັນ ມີມິຊາ (Neven Mimica) ກຳມາທິການເອີຣົບຮັບຜິດຊອບວຽກການຮ່ວມມື ແລະ ການພັດທະນາສາກົນ ພ້ອມດ້ວຍຄະນະ, ທີ່ເດີນທາງມາຢ້ຽມຢາມ ສປປ ລາວ ໃນລະຫວ່າງວັນທີ 9-10 ກັນຍາ 2019. ໃນໂອກາດດັ່ງກ່າວ, ທ່ານລັດຖະມົນຕີໄດ້ສະແດງຄວາມຍິນດີຕ້ອນຮັບຄະນະຜູ້ແທນຢ່າງອົບອຸ່ນ ແລະ ຕີລາຄາສູງຕໍ່ການພົວພັນຮ່ວມມືສອງຝ່າຍ ຊຶ່ງໃນນັ້ນ ທ່ານລັດຖະມົນຕີ ໄດ້ສະແດງຄວາມ ຂອບອົກຂອບໃຈຢ່າງສູງຕໍ່ການສະໜັບສະໜູນ ແລະ ຊ່ວຍເຫຼືອ ຂອງສະຫະພາບເອີຣົບ ເຂົ້າໃນການພັດທະນາເສດຖະກິດ- ສັງຄົມຂອງ ສປປ ລາວ ໃນໄລ ຍະຜ່ານມາ ຊຶ່ງເປັນການປະ ກອບສ່ວນອັນສຳຄັນ ເຮັດໃຫ້ ສປປ ລາວ ມີຜົນສຳເລັດໃນການຈັດຕັ້ງປະຕິບັດເປົ້າໝາຍການພັດທະນາທີ່ຍືນຍົງຂອງອົງການສະຫະປະຊາຊາດ ແລະ ທັງນຳເອົາປະເທດຊາດອອກ ຈາກຄວາມທຸກຍາກ ແລະ ດ້ອຍ ພັດທະນາເທື່ອລະກ້າວ. ນອກ ຈາກນີ້, ສອງຝ່າຍຍັງໄດ້ປຶກ ສາຫາລືກ່ຽວກັບບັນຫາສິ່ງທ້າທາຍ ແລະ ທິດທາງໃນການສືບຕໍ່ເສີມຂະຫຍາຍການພົວພັນຮ່ວມມືໃນຕໍ່ໜ້າ, ແລກປ່ຽນຄຳ ຄິດເຫັນກ່ຽວກັບບັນຫາພົ້ນເດັ່ນຂອງສາກົນ ແລະ ພາກພື້ນທີ່ ສອງຝ່າຍມີຄວາມສົນໃຈຮ່ວມກັນ. ການຢ້ຽມຢາມຂອງຄະນະ ຜູ້ແທນຈາກສະຫະພາບເອີຣົບ ໃນຄັ້ງນີ້ໄດ້ເປັນຂີດໝາຍອັນ ສຳຄັນ, ທັງເປັນການປະກອບ ສ່ວນຢ່າງຕັ້ງໜ້າເຂົ້າໃນການເສີມຂະຫຍາຍການພົວພັນຮ່ວມມືລະຫວ່າງ ສປປ ລາວ ແລະ ສະຫະພາບເອີຣົບໃຫ້ນັບມື້ນັບມີປະສິດທິຜົນຍິ່ງໆຂຶ້ນ.