ກະ­ຊວງ ຮສສ ແລະ ສິງ­ກະ­ໂປ ຮ່ວມ​ມືຝຶກ​ອົບ­ຮົມ​ວຽກ​ງານ​ແຮງ​ງານ

10.10.2019 8:31     

   ທ່ານ ຄຳ​ແພງ ໄຊ​ສົມແພງ ລັດຖະມົນຕີກະຊວງ​ແຮງ​ງານ ແລະ ສະຫວັດດີ​ການ​​ສັງຄົມ (ຮສສ) ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່ານັບ​ຂອງ​ທ່ານ ນາງ ແລວ ສຸ ລິນ (Leow siu Lin) ເອກ​ອັກ​ຄະ​ລັດ​ຖະ​ທູດ ແຫ່ງ ສາທາລະນະ​ລັດ ສິງກະໂປ ປະຈຳ ສປປ ລາວ ​ເມື່ອ​ວັນ​ທີ 9 ຕຸລາ​ນີ້ ທີ່ກະຊວງ​ດັ່ງກ່າວ ໃນ​ໂອກາດ​ທີ່​ທ່ານ ມາ​ດຳ​ລົງ​ຕຳ ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ຄົນ​ໃໝ່ ປະຈຳ ສປປ ລາວ.

   ໃນ​ໂອກາດ​ນີ້, ທ່ານ ລັດຖະມົນຕີ ກະຊວງ ຮສສ ໄດ້​ສະແດງ​ຄວາມ​ຕ້ອນຮັບ​ຊົມເຊີຍ​ຕໍ່​ທ່ານ ທູດ ທີ່​ມາ​ດຳລົງ​ຕຳແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ ສິງກະໂປ​ຄົນ​ໃໝ່ ປະຈຳ​ລາວ
ຊຶ່ງ​ເປັນ​ການ​ປະ​​ກອບສ່ວນທີ່​ສຳຄັນ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ລະຫວ່າງ ສປປ ລາວ - ສິງກະໂປ ​ທີ່​ມີ​ມາ​ດົນ​ນານ​ແລ້ວ​ນັ້ນ​ໃຫ້​ດີ​ຂຶ້ນ​ເລື້ອຍໆ ໂດຍ​ສະ​ເພ​າະ​ແມ່ນ​ການ​ຮ່ວມ​ມື​ລະຫວ່າງ​ກະຊວງ ຮສສ ແລະ ສິງກະໂປ ຊຶ່ງ​ສິງກະໂປ ໄດ້​ໃຫ້ການ​ຊ່ວຍເຫຼືອ​ໃນ​ການ​ຝຶກ​ອົບຮົມ​ວຽກ​ງານ ແຮງ​ງານ ແລະ ສະຫວັດດີ​ການ​-​ສັງຄົມ ທັງ​ຢູ່ ສປປ ລາວ ແລະ ຢູ່​ສິງກະໂປ​ໄດ້ 200 ກວ່າ​ຄົນ. ນອກຈາກ​ນີ້, ລັດຖະບານ ແລະ ປະຊາຊົນ​ສິງກະໂປ ​ຍັງ​ໄດ້​ປະກອບສ່ວນ​ຊ່ວຍເຫຼືອ​ປະຊາຊົນ​ລາວ​ ທີ່ໄດ້​ຮັບ​ຜົນ​ກະທົບ​ທາງ​ທຳ​ມະ​ຊາດ (ໄພ​ນ້ຳ​ຖ້ວມ) ໃນ​ໄລຍະ​ຜ່ານ​ມາ.

   ທ່ານ ນາງ ແລວ ສຸ ລິນ ໄດ້​ສະແດງ​ຄວາມ​ຂອບໃຈ​ຕໍ່​ທ່ານ ລັດຖະມົນຕີ ທີ່​ໄດ້​ໃຫ້ການ​ຮັບ​ໃນ​ຄັ້ງ​ນີ້ ແລະ ຈະ​ສືບ​ຕໍ່​ປະຕິບັດ​ໜ້າທີ່​ການ​ທູດ​ຢູ່ ສປປ ລາວ ໃຫ້​ດີ​ຂຶ້ນ​ເລື້ອຍໆ.
(ຂ່າວ​-​ພາບ: ບຸນ​ທົງ)