ການ​ຮ່ວມ​ມື​ດ້ານ​ຄັງ​ປັນ­ຍາ ເພື່ອ​ຊຸກ­ຍູ້​ການ​ສ້າງ​ເສດ­ຖະ­ກິດ​ລາວ​-​ຈີນ

 

10.10.2019 8:33     

   ສະ​ຖາ​ບັນ​ຄົ້ນຄວ້າ​ເສດ ຖະກິດ​ແຫ່ງ​ຊາດ ສປປ ລາວ ແລະ ສະ​ຖາ​ບັນ​ຄົ້ນຄວ້າ​ໂລ​ຈິສ​ຕິກ​ ລະຫວ່າງ​ປະເທດ​ອາຊີ​ໃຕ້ ແລະ ອາຊີ​ຕາເວັນ​ອອກ​ສ່ຽງ​ໃຕ້ ແຫ່ງ​ນະຄອນ​ຄຸນ​ໝິງ ສປ ຈີນ ໄດ້​ຮ່ວມ​ກັນ​ຈັດ​ກອງ​ປະຊຸມ​ສຳ​ມະ​ນາ​ກ່ຽວ​ກັບ​ການ​ຮ່ວມ​ມື​ດ້ານ​ຄັງ​ປັນຍາ ເພື່ອ​ຊຸກຍູ້​ການ​ສ້າງ​ເສດຖະກິດ ລາວ​-​ຈີນ ຂຶ້ນ​ໃນ​ວັນ​ທີ 9 ຕຸລາ ນີ້​ທີ່ ໂຮງແຮມ​ດອນ​ຈັນ​ພາ​ເລດ ໂດຍ​ການ​ເປັນ​ປະທານ​ຮ່ວມ​ຂອງ ທ່ານ ຊື່ນ ເດດ​ວົງສາ ຮອງ​ຫົວໜ້າ​ສະ​ຖາ​ບັນ​ຄົ້ນຄວ້າ​ເສດຖະກິດ​ແຫ່ງ​ຊາດ ແລະ ທ່ານ ລື້ວ ຈີນ​ຊີນ ຫົວໜ້າ ສະ​ຖາ​ບັນ​ຄົ້ນຄວ້າ​ໂລ​ຈິ​ສ​ຕິກ ​ລະຫວ່າງ​ປະເທດ​ອາຊີ​ໃຕ້ ແລະ ອາຊີ​ຕາເວັນ​ອອກ​ສ່ຽງ​ໃຕ້ ແຫ່ງ​ນະຄອນ​ຄຸນ​ໝິງ ສປ ຈີນ ພ້ອມ​ດ້ວຍ​ພະນັກງານ​ທີ່​ກ່ຽວຂ້ອງ​ເຂົ້າ​ຮ່ວມ.

   ການ​ສຳ​ມະ​ນາກ່ຽວ​ກັບ​ກັບ​ການ​ຮ່ວມ​ມື​ດ້ານ​ຄັງ​ປັນຍາ ເພື່ອ​ຊຸກຍູ້​ການ​ສ້າງ​ເສດຖະກິດ ລາວ​-​ຈີນໃນ​ຄັ້ງ​ນີ້​ ປະກອບ​ມີ 3 ຫົວຂໍ້​ຄື: ການ​ພັດທະນາ​ລະບົບ​ໂລ​ຈິ​ສ​ຕິກ ເພື່ອ​ສົ່ງເສີມ​ໃຫ້ ສປປ ລາວ ກາຍເປັນ​ຈຸດ​ໃຈກາງ​ດ້ານ​ການ​ເຊື່ອມ​ຈອດ​ລະຫວ່າງ​ປະເທດ, ດ້ານ​ການ​ຮ່ວມ​ມື, ການ​ລົງທຶນ ແລະ ການ​ຄ້າ​ໃນ​ອະນຸ​ພາກ​ພື້ນ; ພັດທະນາ​ຕາມ​ເຂດ​ແຄວ້ນ, ກໍ​ລະ​ນິີ​ສຶກສາ, ເນື້ອ​ໃນ​ສຳຄັນ​ຂອງ​ແຜນ​ພັດ ທະນາ​ເຂດ​ພູ​ພຽງ​ບໍລະເວນ ທີ່​ເປັນ​ຈຸດ​ໃຈກາງ​ຢູ່​ພາກ​ໃຕ້​ຂອງ ສປປ ລາວ ແລະ ບົດຮຽນ​ຂອງ ສປ ຈີນ ກ່ຽວ​ກັບ​ກົນ​ໄກ​ການ​ສະໜອງ​ແຫຼ່ງ​ທຶນ​ໃຫ້​ແກ່​ການ​ພັດທະນາ​ອຸດສາຫະກຳ ແລະ ໂຄງ​ລ່າງ​ພື້ນ​ຖານ.

   ທ່ານ ຊື່ນ ເດດ​ວົງສາ ໄດ້​ເວົ້າ​ວ່າ: ການ​ຈັດ​ກອງ​ປະຊຸມ​ສຳ​ມະ​ນາ​ໃນ​ຄັ້ງ​ນີ້ ກໍເພື່ອ​ໃຫ້​ຄຳ​ເຫັນ​ດ້ານ​ການ​ຄົ້ນຄວ້າ​ແກ່​ລັດຖະບານ ກໍ​ຄື​ໃຫ້​ຄຳ​ປຶກ​ສາ​ແກ່​ວິ​ສາ​ຫະ​ກິດ​ໄດ້​ເປີດ​ກວ້າງ​ການ​ຮ່ວມ​ທຸລະ​ກິດ​ລະຫວ່າງ​ສອງ​ຝ່າຍ ແລະ ຫຼາຍ​ຝ່າຍ​ແບບ​ຕ່າງ​ຝ່າຍ​ຕ່າງ​ມີ​ຜົນ​ນັ້ນ, ໃນ​ຕະຫຼອດ 2 ປີທີ່​ຜ່ານ​ມາ ທັງ​ສອງ​ສະ​ຖາ​ບັນ​ໄດ້​ສ້າງ​ກົນ​ໄກ​ການ​ຮ່ວມ​ມື ແລະ ການ​ແລກປ່ຽນ​ຄວາມ​ຄິດ​ເຫັນ​ດ້ານ​ຄັງ​ປັນຍາ ໂດຍ​ໄດ້​ຈັດ​ເວທີ​ປຶກສາ​ຫາລື ແລະ ສຳ​ມະ​ນາ​ທາງ​ວິຊາ​ການ​ໃນ​ຮູບ​ແບບ​ຕ່າງໆ ຢູ່​ນະຄອນຫຼວງ​ວຽງ​ຈັນ ແລະ ຢູ່​ນະຄອນ​ຄຸນ​ໝິງ​ແຂວງ​ຢູນ​ໜານ ສປ ຈີນ, ພ້ອມ​ທັງ​ໄດ້​ເຂົ້າ​ຮ່ວມ​ເວທີ​ປຶກສາ​ຫາລື​ດ້ານ​ຄັງ​ປັນຍາ​ລະຫວ່າງ​ປະເທດ ໃນ​ຂອບ​ແນວ​ຄິດ​ລິ​ເລີ່ມ ໜຶ່ງ​ແລວ​ໜຶ່ງ​ເສັ້ນທາງ, ໃນ​ຂອບ​ການ​ຮ່ວມ​ມື ແມ່​ນ້ຳ​ລ້ານ​ຊ້າງ​-​ແມ່ນ້ຳ​ຂອງ ແລະ ໃນ​ຂອບ​ການ​ຮ່ວມ​ມື​ລຸ່ມ​ແມ່ນ້ຳ​ຂອງ​ເປັນຕົ້ນ,ຈຸດ​ສຸມ​ຂອງ​ການ​ຄົ້ນຄວ້າ​ຮ່ວມ​ກັນ​ດ້ານ​ຄັງ​ປັນຍາ ແມ່ນ​ຄົ້ນຄວ້າ​ການ​ພັດທະນາ​ລະບົບ​ໂລ​ຈິສຕິກ ໂດຍ​ຕິດ​ພັນ​ກັບ​ການ​ປະສານ​ສົມທົບ​ການ​ພັດທະນາ​ເຂດ​ແຄ້ວນ ທີ່​ມີ​ທ່າແຮງ​ບົ່ມ​ຊ້ອນ ແລະ ທ່າແຮງ​ໄດ້​ປຽບ​ຂອງ​ແຕ່​ລະ​ເຂດທີ່​ແຕກ​ຕ່າງ​ກັນ ພ້ອມ​ທັງ​ໃຫ້​ມີ​ການ​ເຊື່ອມ​ໂຍງ ແລະ ເຊື່ອມ​ຈອດ​ລະ ຫວ່າງ​ປະເທດ​ໃນ​ອະນຸ​ພາກ​ພື້ນ ທັງ​ນີ້​ກໍເພື່ອ​ຜັນ​ຂະຫຍາຍ​ຍຸດທະສາດ ຫັນ​ໃຫ້​ລາວ​ຈາກ​ການ​ເປັນ​ປະເທດ​ບໍ່​ມີ​ທາງ​ອອກ​ສູ່ທະເລໄປ​ສູ່ປະເທດ​ທີ່​ເຊື່ອມ​ຈອດ​ລະຫວ່າງ​ປະເທດ ໂດຍ​ຕິດ​ພັນ​ກັບ​ຍຸດທະສາດ ໜຶ່ງ​ແລວ​​ໜຶ່ງ​ເສັ້ນທາງ, ພ້ອມ​ທັງ​ ເພື່ອ​ຜັນ​ຂະຫຍາຍ​ແຜນ​ແມ່​ບົດ​ຄູ່​ຮ່ວມ​ຊະ​ຕາ​ກຳ​ລະຫວ່າງ​ສອງ​ປະ​ເທດ.
(ຂ່າວ​: ບຸນ​ຕອມ)