5 ນະ­ຄອນ ປະ­ເທດ​ລຸ່ມ​ແມ່­ນ້ຳ​ຂອງຮ່ວມ​ມື​ດ້ານ​ການ­ທ່ອງ­ທ່ຽວ

15.10.2019 9:11     

   ນະຄອນຫຼວງ​ວຽງ​ຈັນ ໄດ້​ເປັນ​ເຈົ້າພາບ​ຈັດ​ກອງ​ປະຊຸມ​ທ່ອງ​ທ່ຽວ​ບັນດາ​ປະເທດ​ລຸ່ມ​ແມ່​ນໍ້າ​ຂອງ​ຄັ້ງ​ທີ 5 ຂຶ້ນ​ໃນວັນ​ທີ 14 ຕຸລາ 2019 ທີ່ ໂຮງແຮມ​ແມ່​ຂອງ​ລີ​ເວີ​ໄຊ ໂດຍ​ການ​ເປັນ​ປະທານ​ຂອງ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ​ຊຶ່ງ​ມີຄະນະ​ຜູ້​ແທນ​ຈາກ 5 ນະຄອນ​ປະເທດ​ລຸ່ມ​ແມ່​ນໍ້າ​ຂອງ ໂດຍປະກອບ​ມີ ນະຄອນ​ພະນົມ​ເປັນ ຣາ​ຊະ​ອານາຈັກ​ກຳປູເຈຍ, ນະຄອນຫຼວງ​ວຽງ​ຈັນ ສປປ ລາວ, ນະຄອນ​ຢາງ​ກຸງ ມຽນ​ມາ, ນະຄອນຫຼວງ​ບາງ ກອກ ປະເທດ​ໄທ, ນະຄອນ​ໂຮ່​ຈິມິນ ສສ ຫວຽດນາມ ພ້ອມ​ດ້ວຍ​ຜູ້ ຕາງໜ້າ​ຈາກ​ພາກ​ລັດ​-​ເອກະ​ຊົນ, ທູຕາ​ນຸ​ທູດ ເຂົ້າ​ຮ່ວມ.

   ທ່ານ ສິນ​ລະ​ວົງ ຄຸດ​ໄພ​ທຸນ ໄດ້​ກ່າວ​ວ່າ: ກອງ​ປະຊຸມ​ທ່ອງ​ທ່ຽວ 5 ນະຄອນ​ບັນດາ​ປະເທດ​ລຸ່ມ​ແມ່​ນໍ້າ​ຂອງ 4 ຄັ້ງ​ຜ່ານ​ມາ​ແມ່ນ​ມີ​ຜົນສຳເລັດ​ເປັນ​ຢ່າງ​ດີ ເຮັດ​ໃຫ້​ບັນດາ​ນະຄອນ​ປະເທດ​ລຸ່ມ​ແມ່​ນໍ້າ​ຂອງ​ມີ​ຄວາມ​ໃກ້ຊິດ​ກັນ​ຫຼາຍ​ຂຶ້ນ ໄດ້​ມີ​ ການ​ແລກປ່ຽນ​ບົດຮຽນ​ນຳ​ກັນ ຕໍ່​ກັບ​ແນວທາງ​ການ​ພັດທະນາ​ການທ່ອງທ່ຽວ​ແບບ​ເຊື່ອມ​ຕໍ່ ແລະ ການທ່ອງທ່ຽວ​ແບບ​ຍືນ​ຍົງ.

   ສຳລັບ​ກອງ​ປະຊຸມ​ທ່ອງ​ທ່ຽວ 5 ນະຄອນ ​ປະເທດ​ລຸ່ມ​ແມ່​ນໍ້າ​ຂອງ​ໃນ​ຄັ້ງ​ນີ້ ເຈົ້າ​ໜ້າທີ່​ອາວຸໂສ​ໄດ້​ເລືອກ​ເອົາ​ຄຳ​ຂວັນ ຫຼື ຫົວຂໍ້​ລວມ​ທີ່​ວ່າ ຄວາມ​ເປັນ​ໜຶ່ງ​ດຽວ​ໃນ​ການ​ເຊື່ອມ​ໂຍງ​ການ​ຮ່ວມ​ມື​ດ້ານ​ການທ່ອງທ່ຽວ ​ຊຶ່ງປະກອບ​ມີ 4 ຫົວຂໍ້​ຄື: ການ​ເຊື່ອມ​ໂຍງ​ຜະລິດ​ຕະ​ພັນ​ການທ່ອງທ່ຽວ, ການ​ເຊື່ອມ​ໂຍງ​ກິດຈະກຳ​ໂຄສະນາ​ການທ່ອງທ່ຽວ, ການ​ເຊື່ອມ​ໂຍງ​ການ​ພັດທະນາ​ບຸກ​ຄະລາ​ກອນ​ການທ່ອງທ່ຽວ, ການ​ເຊື່ອມ​ໂຍງ​ການ​ເປັນ​ເຈົ້າ​ການ​ດ້ານ​ການທ່ອງທ່ຽວ ຊຶ່ງ​ເບິ່ງ​ລວມ​ແລ້ວ​ຄຳ​ຂວັນ ແລະ ຫົວຂໍ້​ກອງ​ປະຊຸມ​ຄັ້ງ​ນີ້ ແມ່ນ​ສອດຄ່ອງ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ບັນດາ​ນະຄອນ ທັງ​ສອດຄ່ອງ​ກັບ​ນະໂຍບາຍ​ເຊື່ອມ​ໂຍງອາ​ ຊຽນ ແລະ ແຜນ​ປະຕິບັດງານ ​ໃນ​ຂອບ​ການທ່ອງທ່ຽວ​ຂອງ ​ປະເທດ​ລຸ່ມ​ແມ່​ນໍ້າ​ຂອງ​ທີ່​ລັດ ຖະບານ​ຂອງ​ປະເທດ​ເຮົາ​ໄດ້​ກຳນົດ​ເອົາ ຄຽງ​ຄູ່​ກັນ​ນັ້ນ ກອງ​ປະຊຸມ​ຄັ້ງ​ນີ້​ໄດ້​ຈັດ​ຂຶ້ນ​ກົງ​ກັບ​ງານ​ບຸນ​ອອກ​ພັນ​ສາ ແລະ ບຸນ ຊ່ວງເຮືອ​ປະ​ຈໍາ​ປີ 2019 ຂອງ​ຊາວ​ນະຄອນຫຼວງ​ວຽງ​ຈັນ ຊຶ່ງ​ເປັນ​ງານ​ບຸນ​ປະເພນີ​ທີ່​ສຳຄັນ​ໜຶ່ງ​ຂອງ​ຊາດ ແລະ ຕິດ​ພັນ​ກັບ​ແມ່​ນໍ້າ​ຂອງ​ທີ່​ເປັນ​ສັນຍາ​ລັກ​ແຫ່ງ​ການ​ຮ່ວມ​ມື​ຂອງ 5 ນະຄອນ ທັງ​ເປັນ​ການ​ຊຸກຍູ້​ສົ່ງເສີມ​ການ​ພັດທະນາ​ວຽກ​ງານ​ທ່ອງ​ທ່ຽວ​ສີຂຽວ, ສະອາດ ແລະ ຍືນ​ຍົງ ສອດຄ່ອງ​ຕາມ​ຍຸດທະສາດ​ການ​ເຕີບ​ໂຕ​ສີຂຽວ​ຂອງ​ລັດຖະບານ ກໍ​ຄື ມາດ​ຕະຖານ​ເງື່ອນໄຂ​ເມືອງ​ທ່ອງ​ທ່ຽວ​ສະອາດ​ຂອງ​ອາ​ຊຽນ.

   ກອງ​ປະຊຸມ​ຄັ້ງ​ນີ້​ໄດ້​ລົງ​ນາມ​ຮ່ວມ​ກັນ​ຈັດ​ຕັ້ງ​ປະຕິບັດ​ເນື້ອ​ໃນ​ກອງ​ປະຊຸມ​ທ່ອງ​ທ່ຽວ​ບັນດາ​ປະເທດ​ລຸ່ມ​ແມ່​ນໍ້າ​ຂອງ ​ຄັ້ງ​ທີ 5 ໃນ​ນັ້ນ​ໄດ້​ເຫັນ​ດີ​ຮ່ວມ​ກັນ​ສ້າງ​ຜະລິດ​ຕະ​ພັນ​ການ ທ່ອງທ່ຽວ​ເຊື່ອມ​ຕໍ່​ສົ່ງເສີມສະ ໜັບສະໜູນ​ກິດຈະ​ກໍາ​ທ່ອງ​ທ່ຽວ​ຮ່ວມ​ກັນແລກປ່ຽນ​ຂໍ້​ມູນ ​ຂ່າວສານ​ທີ່​ຮັບ​ໃຊ້​ເປັນ​ພື້ນ ຖານ​ຂອງ​ການທ່ອງທ່ຽວແລກ ປ່ຽນ​ບົດຮຽນ​ໃນ​ການ​ສ້າງ​ມາດ ຕະຖານ​ການ​ບໍລິການ​ໃຫ້​ເປັນ​ອັນ​ລວມ ສ້າງ​ມາດຕະຖານປົກ​ ປັກ​ຮັກສາ​ມໍລະດົກ​ທາງ​ດ້ານ ​ວັດ​ທະ​ນະ​ທໍາ ແລະ ທໍາ​ມະ​ຊາດ ແລະ ວິທີ​ການ​ຈັດ​ມາດຕະຖານ​ລະດັບ​ຊາດມາດຕະຖານ​ທ່ອງ​ທ່ຽວ​ອາ​ຊຽນ ແລະ ຊຸມ​ຊົນ ທັງ​ຮ່ວມ​ກັນ​ພັດທະນາ ແລະ ສ້າງ​ເສັ້ນ ທາງ​ທ່ອງ​ທ່ຽວ​ໃໝ່​ຢ່າງ​ໜ້ອຍ 2 ຕົວ​ເມືອງ​ພາຍ​ໃນ 5 ນະຄອນ​ສະມາຊິກ​ຕ້ອງລວມ​ ສູນເພີ່ມ​ທະວີ​ການ​ຮ່ວມ​ມືຟື້ນ​ ຟູ​ມໍລະດົກ​ວັດ​ທະ​ນະ​ທໍາ ແລະ ການແລກປ່ຽນ​ບັນດາ​ໂຄງ ການ​ຝຶກອົບຮົມ ແລະ ແບບ ແຜນຮູບ​ແບບການ​ຟື້ນ​ຟູ​ມໍລະ ດົກວັດ​ທະ​ນະ​ທໍາຕົກລົງ​ແຜນ ການ​ປະຕິບັດ​ການ​ຮ່ວມ​ມື​ດ້ານ​ການທ່ອງທ່ຽວ​ລະຫວ່າງ​ບັນດາ​ນະຄອນ​ລຸ່ມ​ແມ່​ນໍ້າ​ຂອງ​ດ້ານ​ການທ່ອງທ່ຽວ 2018-2020 ສໍາ​ລັບ​ເຈົ້າພາບ​ກອງ​ປະຊຸມ​ທ່ອງ​ທ່ຽວ 5 ປະເທດ​ລຸ່ມ​ນໍ້າ​ຂອງ​ຄັ້ງ​ທີ 6 ໃນ​ປີ 2020 ໂດຍ​ໄດ້​ຮັບ​ການ​ເປັນ​ເຈົ້າພາບ​ຂອງ​ ນະຄອນ​ໂຮ່ຈິມິນ ສສ ຫວຽດ ນາມ.
(ຂ່າວ: ເພັດ​ສະ​ໝອນ)