ທຄຕລ ຮ່ວມ​ມື ກັບ​ສະ​ວິດ​ພາສ ໃຫ້​ບໍ­ລິ­ການ​ຮັບ​ຊຳ­ລະ​ເງິນຜ່ານ​ວີ​ແຊດ ແລະ ອາ­ລີ​ເພ

 

15.10.2019 9:13     

   ທະນາຄານ​ການ​ຄ້າຕ່າງ ປະເທດ​ລາວ​ມະຫາຊົນ (ທຄ ຕລ) ຮ່ວມ​ກັບ​ສະ​ວິດ​ພາສ (Swift Pass) ໄດ້​ຈັດ​ພິທີ​ເປີດ​ການ​ບໍລິການ​ຮັບ​ຊໍາ​ລະ​ເງິນ​ດ້ວຍ WeChat Pay ແລະ AliPay ຢ່າງ​ເປັນ​ທາງ​ການ​ເມື່ອ​ວັນ​ທີ 11 ຕຸລາ​ຜ່ານ​ມາ​ນີ້​ທີ່ໂຮງແຮມ​ລາວ​ພຣາ​ຊາ ນະຄອນຫຼວງ​ວຽງ​ຈັນ ໂດຍ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ພຸດ​ທະ​ໄຊ ສີວິໄລ ຮອງ​ຜູ້​ວ່າການ​ທະນາຄານ​ແຫ່ງ ສປປ ລາວ​ມີ​ພາກສ່ວນ​ທີ່​ກ່ຽວຂ້ອງ ​ແລະ​ແຂກ​ຖືກ​ເຊີນ​ເຂົ້າ​ຮ່ວມ.

   ທ່ານ​ ພູ​ຂົງ​ ຈັນທະຈັກ​ ຜູ້ ອຳນວຍການ​ໃຫຍ່​ ທຄຕລ​ ກ່າວ​ວ່າ: ໃນ​ຍຸກ​ແຫ່ງ​ການ​ພັດທະນາ​ທີ່​ເຕັກ​ໂນ​ໂລ​ຊີ​ມີ​ຄວາມ​ກ້າວ ໜ້າ​ສູງ​ທີ່​ທະນາຄານ​ຍຸກ​ໃໝ່​ຂັບ​ເຄື່ອນ​ດ້ວຍ​ເຕັກ​ໂນ​ໂລ​ຊີ​ດີ​ຈີ​ຕອນ,ທຄຕລ ຍັງ​ຄົງ​ມຸ້ງ​ໝັ້ນ​ໃນ​ການ​ເປັນ​ຜູ້ນຳ​ທາງ​ດ້ານ​ເຕັກ​ໂນ​ໂລ​ຊີ​ການ​ເງິນ​ເພື່ອ​ຕອບ​ສະ ໜອງ​ຄວາມ​ຕ້ອງການ​ຂອງ​ລູກ​ຄ້າ​ຫຼາຍ​ທີ່​ສຸດ​ຊຶ່ງ ທຄຕລ ໄດ້​ມີ​ການ​ພັດທະນາ​ຢ່າງ​ຕໍ່​ເນື່ອງ ແລະ ເຕີບ​ໃຫຍ່​ຂະຫຍາຍຕົວ​ໃນ​ຫຼາຍໆ​ຜະລິດ​ຕະ​ພັນ ໂດຍ​ສະເພາະ​ແມ່ນ​ການ​ບໍລິການ​ຊຳລະ​ສະ​ສາງ​ຄ່າ​ສິນຄ້າ​ຜ່ານ QR Code ກັບ​ສາກົນ , ທຄຕລ ໄດ້​ກ້າວ​ໄປ​ອີກ​ຂັ້ນ​ທາງ​ດ້ານ​ການ​ຮັບ​ຊຳລະ​ສະ​ສາງ​ດ້ວຍ QR Code ເພື່ອ​ຊ່ວຍ​ເປີດ​ຊ່ອງ​ທາງ​ການ​ຊຳລະ​ສະ​ສາງ​ໃຫ້​ຫຼາຍ​ຂຶ້ນ ຊຶ່ງ​ຜູ້​ໃຊ້​ແອັບ WeChat Pay ແລະ AliPay ສາ​ມາດ​ຊໍາ​ລະ​ສິນຄ້າ ແລະ ບໍລິການ​ທີ່​ປະເທດ​ລາວ​ໄດ້​ຢ່າງ​ສະດວກ​ປອດ​ໄພ ແລະ ຍັງ​ເປັນ​ການ​ເພີ່ມ​ຍອດ​ຂາຍ​ໃຫ້​ແກ່​ຮ້ານ​ຄ້າ​ໃນ​ລາວ​ອີກ​ດ້ວຍ.ຖື​ເປັນ​ຄັ້ງ​ທຳອິດ​ໃນ​ລາວ​ທີ່​ຮ້ານ​ຄ້າ​ສາມາດ​ຮັບ​ການ​ຊຳລະ​ດ້ວຍ WeChat Pay ຊຶ່ງ​ເປັນ​ການ​ຮັບ​ຊຳລະ​ດ້ວຍ QR Code ທີ່​ລວມ​ເອົາ​ທັງ WeChat Pay ແລະ AliPay ໄວ້​ໃນ QR Code ດຽວ​ກັນ ແລະ ຍັງ​ເປັນ​ຄັ້ງ​ທຳອິດ​ໃນ​ລາວ​ທີ່​ຮ້ານ​ຄ້າ E-Commerce ຈະ​ມີ QR Code ໄວ້​ຮອງ​ຮັບ​ການ​ຊຳລະ​ສະ​ສາງ​ດ້ວຍ Wechat pay ແລະ AliPay ອີກ​ດ້ວຍ.ທຄຕລ ເປີດ​ໃຫ້​ບໍລິການ​ຊຳລະ​ສະ​ສາງ​ດ້ວຍ WeChat Pay ແລະ AliPay ນີ້​ຈະ​ຊ່ວຍ​ໃຫ້​ຮ້ານ​ຄ້າ​ທີ່​ເປັນ​ສະມາຊິກ​ຂອງ BCEL ເປີດ​ໂອກາດ​ຂະຫຍາຍ​ຄວາມ​ອາດ​ສາມາດ​ໃນ​ການ​ຮັບ​ຊຳລະ​ສະ​ສາງ​ທີ່​ສອດຄ່ອງ​ກັບ​ຄວາມ​ຕ້ອງການ​ຂອງ​ຄົນ​ຈີນ​ໄດ້​ເປັນ​ຢ່າງ​ດີ ຊຶ່ງ​ເປັນ​ຜົນ​ປະໂຫຍດ​ຕໍ່​ຫົວໜ່ວຍ​ທຸລະ​ກິດ​ໃຫ້​ດີ​ຍິ່ງ​ຂຶ້ນ ​ເນື່ອງ​ຈາກ​ຈະ​ສະດວກ​ສະບາຍ​ເຮັດ​ໃຫ້​ລູກ​ຄ້າ​ຄົນ​ຈີນ​ຮູ້​ສຶກ​ເໝືອນ​ໃຊ້​ຈ່າຍ​ພາຍ​ໃນ​ປະເທດ​ຂອງ​ຕົນ​ຊ່ວຍ​ກະ​ຕຸ້ນ​ການ​ໃຊ້​ຈ່າຍ​ຂອງ​ຄົນ​ຈີນ​ໃນ​ລາວ ຊຶ່ງ​ເປັນ​ກຸ່ມ​ນັກ​ທ່ອງ​ທ່ຽວ​ຫຼັກໆ​ອີກ​ປະເທດ​ໜຶ່ງ. ທຄຕລ ​ມີ​ຖານ​ຮ້ານ​ຄ້າ​ສະມາຊິກ​ຮັບ​ຊຳລະ​ສະ​ສາງ​ດ້ວຍ QR Code Function OnePay ແອັບ BCEL One ຈຳນວນ​ຫຼາຍ​ກວ່າ 10.000 ຮ້ານ​ຄ້າ ທີ່​ພ້ອມ​ຈະ​ຮອງ​ຮັບ​ການ​ບໍລິການ​ຮັບ​ຊຳລະ​ສະ​ສາງ​ດ້ວຍ WeChat Pay ແລະ AliPay ແລະ ຍັງ​ສືບຕໍ່​ຂະຫຍາຍ​​ການຮ່ວມມື​ກັບຄູ່​ຮ່ວມ​ທຸລະ​ກິດ ແລະ ຮ້ານຄ້າ ສະມາຊິກ ​ເພື່ອຂະຫຍາຍ​ຕາໜ່າງ​ການ​ຮອງຮັບ WeChat Pay ແລະ AliPay ໃຫ້​ກວ້າງ​ໃນ​ຂົງເຂດ​ທົ່ວ​ປະ​ເທດ.

   ທ່ານ​ກ່າວ​ຕື່ມ​ວ່າ:ໃນ​ຍຸກ​ແຫ່ງ​ການ​ພັດທະນາ​ທີ່​ເຕັກ​ໂນ​ໂລ​ຊີ​ມີ​ຄວາມ​ກ້າວໜ້າ​ສູງ ແລະ ເພື່ອ​ການ​ຫັນ​ເປັນ​ດີ​ຈິ​ຕອນຂອງ​ອຸດ​ສາ​ຫະ​ກໍາ​ການ​ຊໍາ​ລະສະ​ສາງ​ຂອງ​ລາວ ທຄຕລ ຈະ​ສືບຕໍ່​ພັດທະນາ​ຜະລິດ​ຕະ​ພັນ ແລະ ການ​ບໍລິການ​ຢ່າງ​ບໍ່​ຢຸດ​ຢັ້ງ ໂດຍ​ທຸກ​ຜະລິດ​ຕະ​ພັນ ແລະ ການ​ບໍລິການ ທຄຕລ ແມ່ນ​ເນັ້ນ​ຄວາມ​ທັນ​ສະໄໝ, ສະດວກ​ສະບາຍ, ມີ​ຄວາມປອດ ​ໄພ ກວດ​ສອບ​ໄດ້ ແລະ ໄດ້​ມາດຕະຖານ​ສາກົນ ເພື່ອ​ນໍາ​ສະເໜີ​ບໍລິການ​ທາງ​ການ​ເງິນ​ທີ່​ຫຼາກ​ຫຼາຍ​ທັນ​ສະໄໝ ຕອບ​ສະໜອງ​ຄວາມ​ຕ້ອງການ​ຂອງລູກ​ຄ້າ ບົນ​ພື້ນ ຖານ​ຄວາມ​ຮັບຜິດຊອບ​ສູງ​ຕໍ່​ສັງຄົມ, ເພື່ອ​ໃຫ້​ລູກ​ຄ້າ​ ແລະ​ ສັງຄົມ​ ໄດ້​ຮັບ​ປະໂຫຍດ​ສູງ​ສຸດ.
(ຂ່າວ: ທຄຕລ)