ທູດ​ລາວ ຍື່ນ​ສານ​ຕາ​ຕັ້ງ​ຕໍ່​ປະ­ທານ​ປະ­ເທດ ຫວຽດ­ນາມ

21.10.2019 9:47     

   ໃນ​ວັນ​ທີ 16 ຕຸລາຜ່ານ​ມາ ທີ່ສໍາ​ນັກ​ງານ​ປະທານ​ປະເທດ ແຫ່ງ ສສ ຫວຽດນາມ, ທ່ານ ແສງ​ເພັດ ຮຸ່ງ​ບຸນ​ຍວງ ໄດ້​ເຂົ້າ​ຍື່ນ​ສານ​ຕາ​ຕັ້ງ​ຕໍ່ທ່ານ ຫ​ງວຽນ ຝູ ຈ້ອງ ປະທານ​ປະເທດ ແຫ່ງ​ສສ ຫວຽດນາມ ເພື່ອ​ດໍາ​ລົງ​ຕໍາ​ແໜ່​ງ​ເປັນເອກ​ອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ ສປປ ລາວ ປະ​ຈໍາ ສສ ຫວຽດນາມ.ໃນ​ໂອກາດ​ນີ້​ ທ່ານ ແສງ​ເພັດ ຮຸ່ງ​ບຸນ​ຍວງ ໄດ້​ສະແດງ​ຄວາມ​ຍິນດີ ແລະ ເປັນ​ກຽດ​ຢ່າງ​ສູງ​ທີ່​ໄດ້​ຮັບ​ການ​ແຕ່ງຕັ້ງ​ໃຫ້​ ດໍາ​ລົງ​ຕໍາ​ແໜ່​ງ​ເປັນເອກອັກ​ຄະ​ ລັດ​ຖະ​ທູດວິສາມັນ​ຜູ້​ມີ​ອໍານາດ​ເຕັມ ແຫ່ງ ສປປ ລາວ ປະ​ຈໍາ ສສ ຫວຽດນາມ, ທ່ານທູດໄດ້​ນຳ​ເອົາ​ຄໍາ​ອວຍພອນ​ອັນ​ປະເສີດ​ຂອງທ່ານ​ປະທານ​ປະ ເທດ ສປປ ລາວ ຝາກມາຍັງ​ທ່ານ​ປະທານ​ປະເທດ ສສ ຫວຽດນາມ ພ້ອມ​ທັງ​ໃຫ້​ຄໍາ​ໝັ້ນ​ສັນຍາ​ວ່າ ທ່ານ​ຈະ​ພະຍາຍາມ​ເຮັດ​ສຸດ​ຄວາມ​ສາມາດ​ຂອງຕົນເຂົ້າ​ໃນ​ການ​ເສີມ​ຂະຫຍາຍສາຍພົວພັນອັນ​ ຍິ່ງ​ໃຫຍ່, ຄວາມ​ສາມັກຄີ​ແບບ​ ພິເສດ ແລະ ການ​ຮ່ວມ​ມື​ຮອບ ດ້ານ ລະຫວ່າງສອງ​ພັກ, ສອງ​ ລັດ ແລະ ປະຊາຊົນ​ສອງປະເທດ ໃຫ້​ແຕກ​ດອກ​ອອກ​ຜົນ ແລະ ໃຫ້​ຂະຫຍາຍຕົວຢ່າງ​ບໍ່​ຢຸດ​ຢັ້ງ.

   ທ່ານ​ ຫ​ງວຽນ ຝູ ຈ້ອງ ປະ ທານ​ປະເທດ ແຫ່ງ ສສ ຫວຽດ ນາມ ໄດ້​ຕາງໜ້າ​ລັດ ແລະ ປະ ຊາຊົນ​ຫວຽດນາມ ສະແດງ​ຄວາມ​ຍິນດີ​ຕໍ່​ທ່ານ​ທູດ ແລະ ສົ່ງ​ຄໍາ​ຢື້​ຢາມ​ຖາມ​ຂ່າວ ແລະ ພອນ​ໄຊ​ອັນ​ປະເສີດມາ​ຍັງ​ບັນດາ​ການ​ນຳ​ລາວ ຈົ່ງ​ມີພະລາ​ນາໄມ​ ສົມບູນ, ມີ​ຄວາມ​ຜາ​ສຸກ ແລະ​ໄດ້​ຮັບ​ຜົນສຳເລັດ​ໃໝ່ ໃນ​ການ ​ນໍາ​ພາ​ລັດຖະບານ ແລະ ປະ ຊາຊົນ​ລາວ​ໄປ​ສູ່​ຄວາມ​ຈະເລີນ​ຮຸ່ງ​ເຮືອງ.

   ປະທານ​ປະ​ເທດ​ ຫ​ງວຽນ ຝູ ຈ້ອງ ຍັງ​ໄດ້​ກ່າວ​ວ່າ ປັດຈຸ ບັນ, ຫວຽດນາມ​ໄດ້​ມີ​ການຂະ ຫຍາຍຕົວ​ຢ່າງ​ຕັ້ງໜ້າ ໃນ​ທຸກ​ຂົງເຂດ ແລະ ເຮັດ​ໃຫ້​ຊື່​ສຽງ ຂອງ​ຫວຽດນາມ ​ນັບ​ມື້​ສູງ​ເດັ່ນ​ໃນ​ເວທີ​ພາກ​ພື້ນ ແລະ ສາ​ກົນ. ເປັນຕົ້ນ​ແມ່ນຫວຽດນາມ​ຈະ​ດຳລົງ​ຕຳແໜ່ງ​ເປັນ​ປະທານອາ​ ຊຽນ ໃນ​ປີ 2020 ແລະ ເປັນສະ ມາຊິກ​ບໍ່​ຖາວອນຂອງສະພາ​ ຄວາມ​ໝັ້ນຄົງ​ສະຫະ​ປະຊາ ຊາດ ອາຍຸ​ການ 2020-2021. ປະທານ​ປະເທດ ຫງວຽນ ຝູ ຈ້ອງ ເຊື່ອ​ໝັ້ນ​ວ່າ ໃນ​ໄລຍະ​ປະຕິບັດ​ໜ້າທີ່​ຂອງ​ຕົນ ຢູ່​ຫວຽດນາມ, ທ່ານ​ເອກ​ອັກ​ຄະ​ລັດ​ຖະ​ທູດຈະ ​ປະຕິບັດ​ບັນດາ​ໜ້າທີ່ ທີ່​ລັດ ແລະ ປະຊາຊົນ ມອບໝາຍໃຫ້ ປະສົບ​ຜົນ​ສໍາ​ເລັດ​ເປັນ​ຢ່າງດີ. ສປປ​ລາວ ແລະ ສສ ຫວຽດນາມ ໄດ້​ສ້າງຕັ້ງ​ສາຍ​ພົວພັນ​ການ​ທູດ​ ນໍາ​ກັນ ໃນ​ວັນ​ທີ 5 ກັນຍາ 1962, ເປັນ​ປະເທດ​ບ້ານ​ໃກ້​ເຮືອນ​ຄຽງ, ມີ​ການ​ພົວພັນ​ມິດ ຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ແບບ​ພິເສດ ແລະ ມີ​ ການ​ຮ່ວມ​ມື​ຮອບດ້ານການ ເມືອງ, ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ, ການ​ສຶກສາ, ວັດທະນະທຳ, ການ​ຄ້າ​-​ການ​ລົງທຶນ, ການ​ຄົມ​ມະ​ນາ​ຄົມ​-​ຂົນສົ່ງ, ກະ​ສິ​ກໍາ ແລະ ອື່ນໆ. ນັບ​ມື້​ເຂົ້າ​ສູ່​ລວງ​ເລິກ ແລະ ນໍາມາ​ຊຶ່ງຜົນ​ປະໂຫຍດມາສູ່​ປະຊາຊົນ​ສອງ​ຊາດ ລາວ​-​ຫວຽດນາມ ໃຫ້​ແທດເໝາະ​ກັບ​ສະພາບ​ຕົວ​ຈິງ.
(ຂ່າວ: ກົມ​ການ​ຂ່າວ)