ໂຄງ­ການ​ກໍ່­ສ້າງ​ທາງ​ລົດ­ໄຟ​ລາວ​-​ຈີນ ຊ່ວຍ­ເຫຼືອ​ຜູ້​ປະ­ສົບ​ໄພນ້ຳ​ຖ້ວມ​ຢູ່​ແຂວງ​ພາກ​ໃຕ້​ຂອງ​ລາວ

28.10.2019 8:54     

   ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ ຍທຂ ໄດ້​ຕ້ອນຮັບຜູ້ຕາງໜ້າ​ໂຄງການ​ກໍ່ສ້າງ​ທາງ​ລົດໄຟ ລາວ​-​ຈີນ ເພື່ອ​ຮ່ວມ​ຊ່ວຍເຫຼືອ​ຜູ້​ປະສົບ​ໄພ​ນໍ້າ​ຖ້ວມ​ຢູ່​ບັນດາ​ແຂວງ​ພາກ​ໃຕ້​ຂອງ​ລາວ ​ໃນວັນ​ທີ 23 ຕຸ​ລາ​ຜ່ານ​ມາ ທີ່​ຫ້ອງ​ຮັບແຂກ​ກະຊວງ ໂຍທາ​ທິ​ການ ແລະ ຂົນສົ່ງ (ຍທຂ).

   ໂຄງການ​ກໍ່ສ້າງ​ທາງ​ລົດ ໄຟ ລາວ​-​ຈີນ ໄດ້​ຮ່ວມ​ໃຈ​ບໍລິ ຈາກ​ຊ່ວຍເຫຼືອ​ເຂດ​ປະສົບ​ໄພ​ນໍ້າ​ຖ້ວມ​ໃນ​ຄັ້ງ​ນີ້ ມີ​ມູນ​ຄ່າ 100.000.000 ກີບ. ໃນ​ໂອກາດ​ດັ່ງກ່າວ​ນີ້ ທ່ານ ບຸນ​ຈັນ ສິນ​ທະ​ວົງ ກໍໄດ້​ກ່າວ​ຄໍາ​ຂອບໃຈຕໍ່​ຄວາມ​ເປັນ​ຫ່ວງ​ເປັນ​ໄຍ​ຂອງ​ທ່ານຜູ້ຕາງໜ້າ​ໂຄງການ​ກໍ່ສ້າງ​ທາງ​ລົດໄຟ ​ລາວ​-​ຈີນ ທີ່ມີ​ນໍ້າ​ໃຈ​ໃນ​ການ​ຊ່ວຍເຫຼືອ​ໃນ​ຄັ້ງ​ນີ້ ແລະ ທ່ານຍັງ​ໄດ້​ກ່າວ​ອີກ​ວ່າ: ເງິນ​ຈໍາ​ນວນ​ດັ່ງກ່າວ​ນີ້​ຈະ​ໄດ້​ມອບ​ໃຫ້ລັດຖະບານ​ໂດຍ​ກົງເພື່ອ​ມອບ​ໃຫ້ 3 ແຂວງ​ທີ່​ປະສົບ​ໄພ​ນໍ້າ​ຖ້ວມຄື: ແຂວງສະຫວັນ​ນະ​ເຂດ ຈຳນວນ 30 ລ້ານ​ກີບ, ແຂວງສາລະ​ວັນ ຈໍາ​ນວນ 40 ລ້ານ​ກີບ ແລະ ແຂວງ​ຈໍາ​ປາ​ສັກ ຈຳນວນ 30 ລ້ານ​ກີບ, ເພື່ອ​ນໍາ​ໄປ​ຊ່ວຍເຫຼືອ​ປະຊາຊົນ​ທີ່​ປະສົບ​ໄພ​ນໍ້າ​ຖ້ວມ​ໃນ​ຄັ້ງ​ນີ້. ພ້ອມ​ກັນ​ນັ້ນ​ທາງ​ກະຊວງ ຍທຂ ກໍໄດ້​ມອບ​ໃບ​ຍ້ອງຍໍ​ໃຫ້​ກັບ ໂຄງການ​ກໍ່ສ້າງ​ທາງ​ລົດໄຟ ລາວ​-​ຈີນ ທີ່​ຮ່ວມ​ໃຈ​ບໍລິຈາກ​ຊ່ວຍເຫຼືອ​ໃນ​ຄັ້ງ​ນີ້.
(ຂ່າວ​-​ພາບ: ຍທຂ) ​