ລາວ​-​ໄທ ຮ່ວມ​ທອດ​ກະ­ຖິນ​ພະ​ຣາ​ຊະ​ທານ​ຂອງ​ເຈົ້າ​ຊີ­ວິດ​ໄທ

29.10.2019 8:49     

   ໃນ​ວັນ​ທີ 27 ຕຸລາຜ່ານ​ມາ ສະມາຄົມ​ລາວ​-​ໄທ​ ເພື່ອ ​ມິດຕະພາບ ຮ່ວມ​ກັບ ສະມາ ຄົມ ​ໄທ​-​ລາວ​ ເພື່ອ​ມິດຕະ ພາບ ແລະ ສະຖານ​ເອກ​ອັກ​ຄະ​ຣາ​ຊະ​ທູດ​ແຫ່ງ​ຣາ​ຊະ​ອານາຈັກ​ໄທ​ ປະຈຳ ສປປ ລາວ ໄດ້​ນຳ​ເອົາ​ກອງ​ກະຖິນ​ພະ​ຣາ​ຊະ​ທານ​ຂອງ​ເຈົ້າ​ຊີວິດ​ແຫ່ງ​ຣາ​ຊະ​ອານາຈັກ​ໄທ​ມາ​ທອດ​ຖວາຍ​ທີ່​ວັດ​ພະທາດ​ຫຼວງ​ເໝືອ ເມືອງ​ໄຊ​ເສດ​ຖາ ນະຄອນຫຼວງ​ວຽງ​ຈັນ ຊຶ່ງ​ແມ່ນ​ຍາ​ທ່ານ​ໃຫຍ່​ ມະຫາ​ງອນ​ດຳລົງ​ບຸນ​ ມະຫາ​ເຖຣະ​ເຈົ້າປະທານ​ອົງການ​ພຸດ​ທະ​ສາສະໜາ​ສຳພັນ​ລາວ​ເປັນ​ຜູ້​ຮັບ​ຜ້າ​ກະ​ຖິນ.

   ການ​ທອດ​ຖວາຍ​ກະຖິນ​ແມ່ນ​ກິດຈະກຳ​ຮ່ວມ​ຂອງ​ສອງ​ສະມາຄົມ​ລາວ​-​ໄທ​-​ລາວ​ເພື່ອ​ມິດຕະພາບ ​ໄດ້​ປະຕິບັດ​ນຳ​ກັນ​ທຸກ​ປີ​ເພື່ອ​ສົ່ງເສີມ​ຮີດຄອງ​ປະເພນີ​ອັນ​ດີງາມ​ຂອງ ສປປ ລາວ ແລະ ຣາ​ຊະ​ອານາຈັກ​ໄທ ຊຶ່ງ​ຄັ້ງ​ນີ້​ເປັນ​ຄັ້ງ​ທີ 3 ທີ່​ເຈົ້າ​ຊີວິດ​ແຫ່ງ​ຣາ​ຊະ​ອານາຈັກ​ໄທ (ລາ​ຊະ​ການ​ທີ 10) ໄດ້​ນຳ​ມາ​ທອດ​ຖວາຍ​ຢູ່ ສປປ ລາວ, ຄັ້ງ​ທີ 1 ຢູ່​ເມືອງ​ຫຼາ ແຂວງ​ອຸດົມ​ໄຊ ແລະ ຄັ້ງ​ທີ 2 ຢູ່​ເມືອງ​ໄຊ​ຍະ​ບູ​ລີ ແຂວງ​ໄຊ​ຍະ​ບູ​ລີ. ການ​ຖວາຍ​ກະຖິນ​ພະ​ຣາ​ຊະ​ທານ​ຂອງ​ເຈົ້າ​ຊີວິດ​ໄທ​ຄັ້ງ​ນີ້​ເປັນ​ການ​ປະກອບສ່ວນ​ສຳຄັນ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ຮ່ວມ​ມື​ທີ່​ມີ​ມູນເຊື້ອ​ດີງາມ​ລະຫວ່າງ​ສອງ​ປະເທດ​ທີ່​ເປັນ​ບ້ານ​ໃກ້​ເຮືອນ​ຄຽງ, ທັງ​ເປັນ​ການ​ສົ່ງເສີມ​ຮີດຄອງ​ປະເພນີ​ດ້ານ​ພຸດ​ທະ​ສາສະໜາ​ຂອງ​ສອງ​ປະເທດ​ອີກ​ດ້ວຍ.

   ເຂົ້າ​ຮ່ວມ​ພິ​ທິ​ທອດ​ກະຖິນ ​ໃນ​ຄັ້ງ​ນີ້​ມີ​ຝ່າຍ​ລາວ​ນຳ ​ໂດຍ​ທ່ານ ຫຽມ ພົມມະຈັນ ປະ ທານ​ສະມາຄົມ​ລາວ​-​ໄທ ​ເພື່ອ​ມິດຕະພາບ, ທ່ານ ແສງ ສຸ​ຂະ​ທິ​ວົງ ເອກ​ອັກ​ຄະ​ລັດ​ຖະ​ທູດ​ວິສາມັນ​ຜູ້​ມີ​ອຳນາດ​ເຕັມ​ແຫ່ງ ສປປ ລາວ ປະຈຳ​ບາງກອກ, ຝ່າຍ​ໄທ​ປະກອບ​ມີ​ທ່ານ ສຸ​ວິດ ສິ​ມະ​ສະກຸນ ປະທານ​ສະມາຄົມ​ໄທ​-​ລາວ​ເພື່ອ​ມິດຕະພາບ, ທ່ານ​ດຳລົງ ໄຄ່​ຄວນ ເອກ​ອັກ​ ຄະ​ຣາ​ຊະ​ທູດ​ແຫ່ງ​ຣາ​ຊະ​ອາ ນາຈັກ​ໄທ​ປະຈຳ ສປປ ລາວ, ມີ​ປະຊາຊົນ​ຜູ້​ມີ​ຈິດໃຈ​ເຫຼື້ອມໃສ​ໃນ​ພຸດ​ທະ​ສາສະໜາ​ທັງ​ລາວ ແລະ ໄທ​ເຂົ້າ​ຮ່ວມ​ເປັນ​ເຈົ້າ​ສັດທາ​ຢ່າງ​ຫຼວງ​ຫຼາຍ.

   ໄປ​ຄຽງ​ຄູ່​ກັບ​ການ​ທອດ​ກະຖິນ​ແລ້ວ​ຍັງ​ມີ​ກິດຈະກຳ​ປິ່ນ​ອ້ອມ​ເຊັ່ນ: ໂຮງໝໍ​ກຸງ​ເທບ​-​ຂອນ​ແກ່ນ ແລະ ໂຮງໝໍ​ກຸງ​ເທບ​-​ອຸດອນ​ ໄດ້​ນຳພາ​ທີ​ມ​ແພດ​ມາ​ກວດ​ສຸຂະພາບ​ໃຫ້​ແກ່​ພະສົງ ແລະ ສຳ​ມະ​ເນນ ໂດຍ​ບໍ່​ໄດ້​ເສຍ​ຄ່າ.
(ຂ່າວ​-​ພາບ: ສຸກ​ສາຄອນ)