ນາ­ຍົກ­ລັດ­ຖະ­ມົນ­ຕີ ສືບ­ຕໍ່​ເຂົ້າ​ຮ່ວມ​ກອງ​ປະ­ຊຸມ​ສຸດ​ຍອດອາ​ຊຽນ​ກັບ​ຄູ່​ເຈ­ລະ­ຈາ

06.11.2019 8:58     

   ໃນ​ວັນ​ທີ 4 ພະຈິກ 2019 ທີ່ບາງກອກ, ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ສປປ ລາວ ໄດ້​ສືບຕໍ່​ນຳພາ​ຄະນະ​ຜູ້​ແທນ​ແຫ່ງ ສປປ ລາວ ເຂົ້າ​ຮ່ວມ​ບັນດາ​ກອງ​ປະຊຸມ​ສຸດ​ຍອດ​ອາ​ຊຽນ ກັບ​ບັນດາ​ຄູ່​ເຈລະຈາ​ອາ​ຊຽນ ເຊັ່ນ: ກອງ​ປະຊຸມ​ສຸດ​ອາ​ຊຽນ​ບວກ​ສາມ ຄັ້ງ​ທີ 22; ກອງ​ປະຊຸມ​ສຸດ​ຍອດອາ​ຊຽ​ນ-​ອາເມຣິກາ ຄັ້ງ​ທີ 7; ກອງ​ປະຊຸມ​ສຸດ​ຍອດ​ອາຊີ​ຕາເວັນ​ອອກ ຄັ້ງ​ທີ 14 ແລະ ກອງ​ປະຊຸມ​ສຸດ​ຍອດ ​ອາ​ຊຽ​ນ-​ຍີ່ປຸ່ນ ຄັ້ງ​ທີ 22.

   ກອງ​ປະຊຸມ​ສຸດ​ຍອດ​ອາ​ຊຽນ​ບວກ​ສາມ ຄັ້ງ​ທີ 22 ຕີ​ລາຄາ​ສູງ​ຕໍ່​ຜົນ​ການຈັດຕັ້ງ​ປະຕິບັດ​ການ​ຮ່ວມ​ມື​ອາ​ຊຽນ​ບວກ​ສາມ​ໃນ​ໄລຍະ​ຜ່ານ​ມາ ໂດຍ​ສະເພາະ​ການຈັດຕັ້ງ​ປະຕິບັດ​ແຜນ​ປະຕິບັດ​ງານ​ອາ​ຊຽນ​ບວກ​ສາມ ໄລຍະ 2018-2022 ແລະ ຂໍ້​ສະເໜີ​ແນະ​ ຂອງ​ໜ່ວຍ​ງານ​ວິໄສ​ທັດ​ອາຊີ​ຕາເວັນ​ອອກ

   ​ຊຸດ​ທີ​ສອງ (EAVG II). ນອກຈາກ​ນີ້, ກອງ​ປະຊຸມ​ຍັງໄດ້​ສືບ​ຕໍ່​ຢຳ້​ຄືນ​ບົດບາດ​ສຳຄັນ​ຂອງ​ກົນ​ໄກ​ຮ່ວມ​ມື​ອາ​ຊຽນ​ບວກ​ສາມ​ໃນ​ການ​ສົ່ງເສີມ​ການ​ຮ່ວມ​ມື​ເພື່ອ​ການ​ພັດ​ທະ ນາ ແລະ ການ​ເຕີບ​ໂຕ​ດ້ານ​ເສດຖະກິດ ເພື່ອ​ກ້າວ​ໄປ​ສູ່​ການ​ບັນລຸ​ເປົ້າ​ໝາຍ​ໄລຍະ​ຍາວ​ຂອງ​ການ​ສ້າງ​ປະຊາ​ຄົມ​ອາຊີ​ຕາເວັນ​ອອກ ໂດຍ​ມີ​ອາ​ຊຽນເປັນ​ແກນ​ກາງ. ສຳລັບ​ໄລຍະ​ຕໍ່ໜ້າ, ຜູ້ນຳ​ອາ​ຊຽນ​ບວກ​ສາມ ເຫັນ​ດີ​ຈະ​ສືບຕໍ່​ຮ່ວມ​ມຶື​ກັນ​ໃນ​ບັນດາ​ຂະແໜງ​ການ​ບຸລິ​ມະ​ສິດ ຄື: ຂະແໜງການ​ເງິນ, ກະສິກຳ, ການ​ຮ່ວມ​ມື​ດ້ານ​ເສດຖະກິດ ແລະ ການ​ເງິນ, ການ​ເຊື່ອມ​ຈອດ, ຄວາມ​ໝັ້ນຄົງ​ດ້ານ​ສະບຽງ​ອາຫານ, ການ​ຮັດ​ແຄບ​ ຄວາມ​ແຕກ​ໂຕນ ​ດ້ານການພັດທະນາ, ການ​ສຶກສາ, ສາ​ທາ, ໄພພິບັດ​ທຳ​ມະ​ຊາດ, ຕ້ານ​ອາ​ຊະ​ຍາກຳຂ້າມ​ ຊາດ ແລະ ອື່ນໆ. ພິເສດ​ກອງ​ ປະຊຸມ​ຄັ້ງ​ນີ້ ໄດ້ຮັບຮອງ​ເອົາ ຖະແຫຼງການ ວ່າ​ດ້ວຍ​ການ​ເຊື່ອມສານ​ບັນດາ​ຂໍ້​ລິ​ເລີ່ມ​ການ ​ເຊື່ອມ​ຈອດ​ແນໃສ່​ຮັດ​ແໜ້ນ​ການຈັດຕັ້ງ​ປະຕິບັດ​ແຜນ​ງານ/ໂຄງການ​ບຸລິ​ມະ​ສິດ​ພາຍ​ໃຕ້ ແຜນ​ແມ່​ບົດ​ການ​ເຊື່ອມ​ຈອດ​ອາ​ຊຽນ 2025 ແລະ ການ​ເຊື່ອມ​ສານ​ກັບ​ບັນດາ​ຂໍ້​ລິ​ເລີ່ມ​ການ​ເຊື່ອມ​ຈອດ​ອື່ນໆ ໃນ​ພາກ​ພື້ນ ແລະ ຂອບ​ຈີ 20. ສຸດ​ທ້າຍ, ກອງ​ປະຊຸມ ຍັງ​ໄດ້​ຈັດ​ພິທີ​ເປີດ​ເລີ່ມ​ນໍາ​ໃຊ້​ເວັບ​ໄຊ​ຂອບ​ການ​ຮ່ວມ​ມື​ອາ​ຊຽນ​ບວກ​ສາມ​ຕື່ມ.

   ສຳລັບ​ກອງ​ປະຊຸມ​ສຸດ​ຍອດ ອາ​ຊຽ​ນ-​ອາເມ​ຣິກາ ຄັ້ງ​ທີ 7, ໃນ​ຖານະ​ປະເທດ​ປະສານ​ງານ​ໃຫ້​ແກ່​ການ​ພົວພັນ​ຮ່ວມ​ມື​ອາ​ຊຽ​ນ - ອາເມຣິກາ, ທ່ານ​ ທອງ​ລຸນ ສີ​ສຸ​ລິດ ໄດ້ຕາງໜ້າ ນຳສະເໜີ​ບົດຄໍາ​ເຫັນ​ລວມ​ຂອງ​ອາ​ຊຽນ ຕີ​ລາຄາ​ຄືນ​ການ​ຮ່ວມ​ມື​ຜ່ານ​ມາ ແລະ ກໍາ​ນົດ​ທິດ​ທາງ​ໃນ​ຕໍ່​ໜ້າ. ກອງ​ປະຊຸມ​ຄັ້ງ​ນີ້ ໄດ້​ຕີລາຄາ​ ສູງ​ຕໍ່ ຄວາມ​ຄືບ​ໜ້າ​ໃນ​ການຈັດຕັ້ງ​ປະຕິບັດ​ການ​ຮ່ວມ​ມື​ໃນ​ໄລຍະ​ຜ່ານ​ມາ​ໂດຍ​ການ​ຜັນ​ຂະຫຍາຍ​ແຜນ​ປະຕິບັດ​ງານ​ອາ​ຊຽ​ນ-​ອາ​ເມຣິ​ ກາ ສໍາ​ລັບ​ປີ 2016-2020 ແລະ ຜົນ​ກອງ​ປະຊຸມ​ສຸດ​ຍອດ​ອາ​ຊຽນ - ​ອາ ​ເມ​ຣິ​ກາ ຄັ້ງ​ທີ 6 ໃນ​ປີ 2018. ສໍາ​ລັບ​ໄລຍະ​ຕໍ່ໜ້າ, ກອງ​ປະຊຸມ​ສືບຕໍ່​ຮ່ວມ​ມື​ກັນ​ດ້ານ​ຄວາມ​ໝັ້ນຄົງ​ທາງ​ໄຊ​ເບີ; ຕົວ​ເມືອງ​ອັດ​ສະ​ລິ​ຍະ; ຈຸ​ລະວິ​ສາຫະ​ກິດ, ວິ​ສາ​​ຫະ​ກິດ​ຂະໜາດ​ນ້ອຍ ແລະ ຂະໜາດ​ກາງ ແລະ ການ​ຄ້າ ແລະ ການ​ລົງ​ທຶນ.

   ໃນ​ຕອນ​ບ່າຍ​ຂອງ​ວັນ ດຽວກັນ, ທ່ານ​ນາຍົກລັດຖະ ມົນຕີ ໄດ້​ສືບຕໍ່​ນຳພາ​ຄະນະ​ເຂົ້າ ​ຮ່ວມກອງ​ປະຊຸມ​ສຸດ​ຍອດ​ອາຊີ​ຕາເວັນ​ອອກ ຄັ້ງ​ທີ 14 ຊຶ່ງ​ບັນດາ​ຜູ້​ນໍາ ໄດ້​ຢຳ້ຄືນ​ບົດບາດ​ສຳຄັນ ຂອງ​ອີ​ເອ​ເ​ອັສ ໃນ​ການ​ເປັນ​ເວທີ​ປຶກສາ​ຫາລື​ລະດັບ​ຜູ້​ນໍາ ກ່ຽວ​ກັບ​ບັນຫາ​ຍຸດທະສາດ, ການເມືອງ, ເສດຖະກິດ, ແລະ ຄວາມ​ສົມບູນ​ພູນ​ສຸກ​ໃນ​ພາກ​ພື້ນ​ອາຊີ​ຕາເວັນ​ອອກ. ກອງ​ປະຊຸມ ໄດ້​ສະແດງ​ຄວາມ​ຍິນດີ​ຕໍ່​ຄວາມ​ຄືບ​ໜ້າ​ໃນ​ການຈັດຕັ້ງ ຜັນ​ຂະຫຍາຍ​ບັນດາ​ຂໍ້​ຕົກລົງ​ຂອງ​ຜູ້​ນໍາ ອີ​ເອ​ເອັສ ໃນ​ໄລຍະ 1 ປີຜ່ານມາ ໂດຍ​ສະເພາະ​ການຈັດຕັ້ງ​ປະຕິບັດ​ແຜນ​ປະຕິ ບັດ​ງານ​ມະນີລາ 2018-2022. ກອງ​ປະຊຸມ​ຄັ້ງ​ນີ້ ໄດ້​ອອກ​ຖະ ແຫຼງການ 3 ສະບັບ: 1) ການ​ຕ້ານ​ການ​ແຜ່​ລາມ​ຂອງ​ຢາ​ເສບ​ຕິດ​ຜິດ​ກົດໝາຍ; 2) ການ​ຮ່ວມ​ມື​ເພື່ອ​ຕ້ານ​ອາ​ຊະ​ຍາ​ກຳ​ຂ້າມ​ຊາດ; ແລະ 3) ການ​ຮ່ວມ​ມື​ເພື່ອ​ຄວາມ​ຍືນ​ຍົງ. ພິເສດ,ໃນ​ກອງ​ປະຊຸມ​ນີ້ ຍັງ​ໄດ້​ແລກ​ປ່ຽນ​ຄໍາ​ຄິດ​ເຫັນ ກ່ຽວ​ກັບ​ບັນຫາ​ພາກ​ພື້ນ ແລະ ສາກົນ ທີ່​ມີ​ຄວາມ​ສົນໃຈ​ຮ່ວມ​ກັນ.

   ກອງ​ປະຊຸມ​ສຸດ​ຍອດ​ອາ​ຊຽ​ນ-​ຍີ່ປຸ່ນ ຄັ້ງ​ທີ 22 ໄດ້​ສະແດງ​ຄວາມ​ຊົມເຊີຍ ຍີ່ປຸ່ນ ຕໍ່​ຜົນ​ສໍາ​ເລັດ​ອັນ​ຈົບງາມ ໃນ​ການ​ເປັນ​ເຈົ້າພາບ​ຈັດ​ກອງ​ປະຊຸມ​ກຸ່ມ​ປະເທດ G20 ໃນ​ເດືອນ​ມິຖຸນາ ຜ່ານ​ມາ ແລະ ໄດ້​ຕີ​ລາຄາ​ສູງ​ຕໍ່​ການຈັດຕັ້ງ​ປະຕິບັດ​ການ​ພົວພັນ​ຮ່ວມ​ມື​ອາ​ຊຽ​ນ-​ຍີ່ປຸ່ນ ໃນ​ໄລຍະ​ຜ່ານ​ມາ ໂດຍ​ສະເພາະ​ປະກອບສ່ວນ​ເຂົ້າ​ໃນ​ການຈັດຕັ້ງ​ປະຕິບັດ​ແຜນ​ແມ່​ບົດ​ການ​ເຊື່ອມ​ຈອດ ອາ​ຊຽນ 2025; ແຜນ​ປະຕິບັດ​ງານ​ຂໍ້​ລິ​ເລີ່ມ​ວ່າ​ດ້ວຍ​ການ​ເຊື່ອມ​ໂຍງ​ອາ​ຊຽນ ສະບັບ​ທີ 3 ແລະ ແຜນການ​ຮ່ວມ​ມື​ເຕັກ​ນິ​ກ-​ວິຊາ​ການ​ຜ່ານ​ອົງການ​ໄຈ​ກາ. ສໍາ​ລັບ​ການ​ຮ່ວມ​ມື​ໃນ​ໄລຍະ​ຕໍ່ໜ້າ, ສອງ​ຝ່າຍ​ເຫັນ​ດີ​ຈະ​ເພີ່ມ​ທະວີ​ການ​ຮ່ວມ​ມື​ບາງ​ຂົງເຂດ​ບຸລິ​ມະ​ສິດ ເຊັ່ນ: ການ​ຕ້ານ​ອາ​ຊະ​ຍາ​ກໍາ​ຂ້າມ​ຊາດ; ຄວາມ​ໝັ້ນຄົງ​ທາງ​ໄຊ​ເບີ; ການ​ຕ້ານ​ການ​ກໍ່​ການ​ຮ້າຍ ແລະ ອາ​ຊະ​ຍາ​ກໍາ​ຂ້າມ​ຊາດ. ພິເສດ, ໃນ​ກອງ​ປະຊຸມ​ຄັ້ງ​ນີ້ ຍັງ​ໄດ້​ອອກ​ຖະແຫຼງການ​ຮ່ວມ​ອາ​ ຊຽ​ນ-​ຍີ່ປຸ່ນ ວ່າ​ດ້ວຍ​ການ​ເຊື່ອມ​ຈອດ​ຕື່ມ.

   ກອງ​ປະຊຸມ​ສຸດ​ຍອດ​ອາ​ເຊັບ ໄດ້​ແຈ້ງ​ຜົນສຳເລັດ​ພາກ​ເນື້ອ​ໃນ​ຂອງ​ສັນຍາ​ໂດຍ​ສ່ວນ​ໃຫຍ່ ແລະ ການ​ເຂົ້າ​ເຖິງ​ຕະຫຼາດ​ຂອງ​ສັນຍາ​ທັງ​ໝົດ ສໍາ​ລັບ 15 ປະເທດ ແລະ ເຫັນ​ດີ ຕໍ່​ກັບ​ບົດ​ຖະແຫຼງການ​ຮ່ວມ​ຂອງ​ບັນດາ​ຜູ້​ນໍາ ອາ​ເຊັບ. ສ່ວນ​ປະເທດ ອິນ​ເດຍ ແມ່ນ​ຍັງ​ຕ້ອງການ​ເວລາ​ໃນ​ການ​ປຶກສາ​ຫາລື​ເພີ່ມ​ຕື່ມ. ພ້ອມ​ກັນ​ນັ້ນ, ບັນດາ​ຜູ້​ນໍາ​ອາ​ເຊັບ ກໍເຫັນ​ດີ​ຈະ​ສືບຕໍ່​ເຈລະຈາ​ບັນຫາ​ທີ່​ຄ້າງ​ຄາ​ທັງ​ໝົດ ໃຫ້​ໄວ​ເທົ່າ​ທີ່​ຈະ​ເປັນ​ໄປ​ໄດ້ ເພື່ອ​ໃຫ້​ໄດ້​ລົງ​ນາມ​ສັນຍາ​ອາ​ເຊັບ ໃນ​ປີ 2020 ທີ່ ສສ.ຫວຽດນາມ ຊຶ່ງ​ສັນຍາ​ອາ​ເຊັບ ແມ່ນ ອາ​ຊຽ​ນ-​ເປັນ​ແກນ​ກາງ​ໃນ​ການ​ສ້າງ​ເຂດ​ການ​ຄ້າ​ເສລີ​ທີ່​ໃຫຍ່​ທີ່​ສຸດ​ໃນ​ໂລກ​ທີ່​ມີ​ຄວາມ​ທັນ​ສະໄໝ, ຮອບດ້ານ, ມີ​ຄຸນ​ນະ​ພາບ​ສູງ ແລະ ມີ​ຜົນ​ປະໂຫຍດ​ຮ່ວມ​ກັນ​ທາງ​ດ້ານ​ເສດຖະກິດ​ຈາກ​ການ​ສ້າງ​ຕ່ອງ​ໂສ້​ມູນ​ຄ່າ​ການ​ສະໜອງ​ຂອງ​ພາກ​ພື້ນ ແລະ ສາກົນ​ຜ່ານ​ການ​ຄ້າ ແລະ ການ​ລົງທຶນ​ພາຍ​ໃນ​ພາກ​ພື້ນ​ອາ​ເຊັບ.

   ຄຽງ​ຄູ່​ກັບ​ການ​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ອາ​ຊຽນ​ຄັ້ງ​ທີ 35 ແລະ ກອງ​ປະຊຸມ​ສຸດ​ຍອດ​ກັບ​ບັນດາ​ຄູ່​ເຈລະຈາ​ອາ​ຊຽນ, ນາຍົກລັດຖະມົນຕີ ຍັງ​ໄດ້​ເຂົ້້າ​ຮ່ວມ​ພິທີ​ປິດກອງ​ປະຊຸມ​ສຸດ​ຍອດ​ອາ​ຊຽນ​ຄັ້ງ​ທີ 35 ແລະ ພິທີ​ມອບ​-​ຮັບ​ການ​ເປັນ​ປະທານ​ອາ​ຊຽນ 2020 ຂອງ ສສ ຫວຽດນາມ; ເຂົ້້າ​ຮ່ວມ​ອາ​ຫານ​ເຊົ້້າ​ແບບ​ເຮັດ​ວຽກ 3 ນາຍົກ: ລາວ​-​ຫວຽດນາມ​-ກໍາ​ປູ​ເຈຍ ແລະ ພົບ​ປະ 2 ຝ່າຍ​ກັບ ສປ ຈີນ ແລະ ສ. ຣັດ​ເຊຍ.
(ຂ່າວ​-​ພາບ: ກະຊວງ​ການ​ຕ່າງປະເທດ)