ຜູ້­ນຳ​ບັນ­ດາ​ປະ­ເທດ​ແມ່­ນ້ຳ​ຂອງ​-​ຍີ່­ປຸ່ນ ຮັບ­ຮອງ​ເອົາ​ເອ­ກະ­ສານ 2 ສະ­ບັບ ເພື່ອ​ການ​ຮ່ວມ​ມື​ໃນ­ຕໍ່­ໜ້າ

07.11.2019 8:55     

   ພະນະ​ທ່ານ ທອງ​ລຸນ ສີ​ສຸ​ ລິດ ນາຍົກລັດຖະມົນຕີ ແຫ່ງ ສປປ ລາວ ໄດ້​ນໍາ​ພາຄະນະ​ຜູ້​ແທນ ສປປ ລາວ ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ຍີ່ປຸ່ນ ຄັ້ງ​ທີ 11 ຈັດ​ຂຶ້ນ​ໃນ​ວັນ​ທີ 4 ພະຈິກ​ນີ້ ທີ່ບາງກອກ ປະເທດ​ໄທ ຊຶ່ງ​ມີ​ບັນດາ​ຜູ້ນຳຈາກ​ບັນດາ​ປະເທດ​ສະມາຊິກ​ແມ່​ນໍ້າ​ຂອງ​-​ຍີ່ປຸ່ນ: ກໍາ​ປູ​ເຈຍ, ສປປ ລາວ, ມຽນ​ມາ, ໄທ, ຫວຽດນາມ ແລະ ຍີ່ປຸ່ນ ເຂົ້າ​ຮ່ວມ.

   ກອງ​ປະຊຸມ​ໄດ້​ດຳເນີນ​ໄປ​ໂດຍ​ການ​ເປັນ​ປະທານ​ຮ່ວມລະຫວ່າງ ພະນະ​ທ່ານ ປຣະ​ຢຸດ ຈັນ​ໂອຊາ ນາຍົກ ລັດຖະມົນຕີ ແຫ່ງ ຣາ​ຊະ​ອານາຈັກ​ໄທ ແລະ ພະນະ​ທ່ານ ຊິນ​ໂຊ ອາ​ເບະ ນາຍົກລັດຖະມົນຕີ​ຍີ່​ປຸ່ນ. ກອງ​ປະຊຸມໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ ຂອງ​ກອງ​ປະຊຸມ​ລັດຖະມົນຕີ​ຕ່າງປະເທດ​ແມ່ນຳ້​ຂອງ​-​ຍີ່ປຸ່ນ ຄັ້ງ​ທີ 12 ແລະ ກອງ​ປະຊຸມ​ລັດຖະມົນຕີ​ເສດຖະກິດ​ແມ່ນຳ້​ຂອງ​-​ຍີ່ປຸ່ນ ຄັ້ງ​ທີ 11 ຊຶ່ງ​ໄດ້​ຈັດ​ຂຶ້ນ​ໃນ​ເດືອນສິງຫາ ແລະ ກັນຍາ 2019. ພ້ອມ​ທັງ ໄດ້​ທົບ​ທວນຄືນ​ຄວາມ​ຄືບ​ໜ້າ​ຂອງ​ການຈັດຕັ້ງ​ປະ ຕິບັດ​ວຽກ​ງານ​ຕ່າງໆ​ພາຍ​ໃຕ້​ຂອບ​ການ​ຮ່ວມ​ມືດັ່ງກ່າວ ໃນ​ໄລຍະ 1 ປີ ຜ່ານ​ມາ ໂດຍ​ສະເພາະ ພາຍ​ໃຕ້ 3 ເສົາຄຳ້​ຂອງຍຸດທະສາດ​ໂຕ ກຽວ 2018 ທີ່​ບັນດາ​ຜູ້ນຳ​ໄດ້​ຮັບ ຮອງ​ເອົາ​ໃນ​ກອງ​ປະຊຸມ​ສຸດ​ ຍອດ​ແມ່ນຳ້​ຂອງ​-​ຍີ່ປຸ່ນ ຄັ້ງ​ທີ 10. ທີ່ໂຕ​ກຽວ ໃນ​ປີ 2018. ໃນ​ປີ​ນີ້ ເພື່ອ​ເປັນ​ການ​ສືບຕໍ່​ຈັດ​ຕັ້ງຜັນ​ຂະຫຍາຍຍຸດທະສາດ​ໂຕ​ກຽວ 2018, ຍີ່​ປຸນ ໃນ​ນາມ​ເປັນຄູ່ຮ່ວມພັດທະນາຂອບ​ການ​ຮ່ວມ​ມື​ແມ່ນຳ້​ຂອງ​-​ຍີ່ປຸ່ນ ກໍໄດ້​ຮ່າງ​ເອກະສານ ຂໍ້ລິເລີ່ມ​ແມ່​ນຳ້​ຂອງ​-​ຍີ່ປຸ່ນ ສຳລັບ​ການ​ພັດທະນາ​ແບບ​ຍືນ​ຍົງ ເຖິງ​ປີ 2030 ເພື່ອ​ຄັດ​ຈ້ອນ​ເອົາ​ບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ຂອງ​ອົງການ​ສະຫະ​ປະຊາຊາດ (Sustainable Development Goals ຫຼື SDGs) ທີ່​ເປັນ​ບຸລິ​ມະ​ສິດ ແລະ ແທດເໝາະ​ກັບ​ການ​ພັດທະນາ​ແບບ​ຍືນ​ຍົງ ຂອງ​ບັນດາ​ປະເທດ​ແມ່​ນຳ້​ຂອງ ລວມ​ທັງ ສປປ ລາວ ເພື່ອ​ໃຫ້​ສອດຄ່ອງ​ກັບ​ຄວາມ​ຕ້ອງການ​ໃນ​ການ​ພັດທະນາ​ເສດ​ຖະ​ ກິດ​-​ສັງຄົມ ຂອງ​ບັນດາ​ປະເທດ​ແມ່​ນຳ້ຂອງ.

   ສປປ ລາວ ໄດ້​ສະແດງ​ຄວາມ​ຂອບໃຈ​ຕໍ່ ຍີ່ປຸ່ນ ທີ່​ໄດ້​ໃຫ້ການ​ຊ່ວຍເຫຼືອສະໜັບ ສະໜູນຕໍ່ບັນດາ​ໂຄງການ ການ​ເຊື່ອມ​ຈອດ​ພື້ນຖານໂຄງ​ລ່າງ ແລະ ໂຄງ​ບົນເຊັ່ນ: ການ​ພັດທະນາ​ພື້ນຖານ​ໂຄງ​ລ່າງທີ່​ມີ​ຄຸນ​ນະ​ພາບ, ການ​ພັດທະນາ​ຊັບພະຍາກອນ​ມະນຸດ ແລະ ການ​ຊ່ວຍເຫຼືອ​ດ້ານ​ເຕັກນິກ ຊຶ່ງ​ບັນດາ​ໂຄງການ​ເຫຼົ່າ​ນີ້ ບໍ່​ພຽງ​ແຕ່​ປະກອບສ່ວນ​ອັນ​ສໍາ​ຄັນ ໃຫ້​ແກ່​ການ​ພັດທະນາ​ເສດ​ຖະ​ກິດ​-​ສັງຄົມ ພາຍ​ໃນປະເທດ​ເທົ່າ​ນັ້ນ ແຕ່​ຍັງ​ເປັນ​ການ​ສ້າງ​ພື້ນຖານ​ໂຄງ​ລ່າງໃຫ້​ແກ່​ການ​ເຊື່ອມ​ຈອດ ແລະ ການ​ເຊື່ອມໂຍງ ​ເສດຖະກິດ ຂອງ​ພາກ​ພື້ນ​ແມ່​ນຳ້ຂອງ ແລະ ລະຫວ່າງ ພາກ​ພື້ນ​ແມ່​ນຳ້​ຂອງ ກັບ​ບັນດາ​ປະ ເທດ​ນອກ​ພາກ​ພື້ນ ແລະ ປະ ກອບສ່ວນ​ອັນ​ສຳຄັນ ເຂົ້າ​ໃນ​ການຈັດຕັ້ງ​ປະຕິບັດ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ເຖິງ​ປີ 2030 ອີກ​ດ້ວຍ.

   ກອງ​ປະຊຸມ​ສຸດ​ຍອດ​ແມ່ນ້ຳ​ຂອງ​-​ຍີ່ປຸ່ນ ຄັ້ງ​ທີ 11 ບັນດາ​ຜູ້ນຳປະເທດແມ່ນ້ຳ​ຂອງ​-​ຍີ່ປຸ່ນ ໄດ້ຮັບຮອງ​ເອົາ ເອກະສານ​ສຳຄັນ ຈຳນວນ 2 ສະບັບ ຄື: ຖະແຫຼງການ​ຮ່ວມ​ກອງ​ປະຊຸມ​ສຸດ​ຍອດ​ແມ່​ນໍ້າ​ຂອງ​-​ຍີ່ປຸ່ນ ຄັ້ງ​ທີ 11 ແລະ ຂໍ້​ລິ​ເລີ່ມ​ແມ່​ນໍ້າ​ຂອງ​-​ຍີ່ປຸ່ນ ສຳລັບ​ການ​ພັດທະນາ​ແບບ​ຍືນ​ຍົງ​ເຖິງ​ປີ 2030 ເພື່ອ​ເປັນ​ບ່ອນ​ອີງ​ໃນ​ການຈັດຕັ້ງ​ປະຕິບັດ​ວຽກ​ງານ​ຕ່າງໆ ພາຍ​ໃຕ້​ຂອບ​ການ​ຮ່ວມ​ມື​ແມ່ນ້ຳ​ຂອງ​-​ຍີ່ປຸ່ນ ໃນ​ອະນາ​ຄົດ.
(ຂ່າວ​-​ພາບ: ກະຊວງ​ການ​ຕ່າງປະເທດ)