ນັກ​ລົງ­ທຶນ​ຕ່າງ­ປະ­ເທດ ທຸ້ມ​ງົບ  4  ພັນ​ລ້ານ​ໂດ​ລາ ລົງ­ທຶນ ຢູ່​ແຂວງ​ຈຳ­ປາ​ສັກ

07.11.2019 9:29     

   ທ່ານ ບຸນ​ຖອງ ດີ​ວິ​ໄຊ ເຈົ້າແຂວງ​ຈຳປາ​ສັກ​ໄດ້​ຕ້ອນຮັບ​ຄະນະ​ຜູ້​ແທນ​ທະ ນາຄານ​ພັດ​ທະນາ​ອາຊີ​ຊຶ່ງ​ນຳ​ໂດຍ​ທ່ານ ຢາ​ຊູ​ຊິ ເນ​ກິ​ຊິ ຜູ້ອຳນວຍການ​ຫ້ອງການ​ທະນາຄານ​ພັດທະນາ​ອາຊີ​ປະ ຈຳ​ລາວ​ໃນ​ວັນ​ທີ 6 ພະ​ຈີກ​ນີ້, ທີ່​ຫ້ອງ​ວ່າການ​ປົກຄອງ​ແຂວງ​ຈຳປາ​ສັກ.

   ໃນ​ໂອກາດ​ດັ່ງກ່າວ​ ​ທ່ານ​ເຈົ້າແຂວງ​ໄດ້​ລາຍ​ງານ​ສະພາບ​ໂດຍ​ລວມ​ຂອງ​ການ​ພັດທະນາ ທົ່ວ​ແຂວງ​ຈຳປາ​ສັກ​ໃຫ້​ຮູ້​ວ່າ: ປັດຈຸບັນ​ແຂວງ​ຈຳປາ​ສັກ​ໄດ້​ຮັບ​ການ​ຊ່ວຍເຫຼືອ​ຈາກ​ທະນາຄານ ພັດທະນາ​ອາຊີ​ແມ່ນ​ໂຄງການ​ກໍ່ສ້າງ​ປ້ອງ​ກັນ​ຕາຝັ່ງ​ເຈື່ອນ​ແຄມ​ເຊ​ໂດນ, ປັບປຸງສະ ພາບ​ແວດ​ລ້ອມໃນ​ຕົວ​ເມືອງ​ ຊຶ່ງ​ກຳລັງ​ດຳເນີນ​ການ​ຢູ່, ນອກຈາກ​ນີ້​ກໍມີ​ໂຄງການ​ຊ່ວຍເຫຼືອ​ຂອງ​ ສ.ເກົາຫຼີ​ ເປັນ​ໂຄງການ​ປ້ອງ​ກັນ​ຕາຝັ່ງ​ເຈື່ອນ​ແຄມ​ຂອງ​ຍ້ອນ​ມີ​ການ​ຊ່ວຍເຫຼືອ​ຄື​ແນວ​ນັ້ນ​ແຂວງ​ພວກ​ເຮົາ​ຈຶ່ງ​ມີ​ຕ່າງ​ປະເທດ​ມາ​ລົງທຶນ​ຢູ່​ພາຍ​ໃນ​ແຂວງ​ຈຳນວນ 18 ປະເທດ, ໃນ​ນັ້ນ​ມີ 560 ກວ່າ​ໂຄງການ, ມີ​ຈຳນວນການ​ລົງທຶນ​ທັງ​ໝົດ 4.000 ລ້ານ​ກວ່າ​ໂດ​ລາ, ເຖິງ​ແມ່ນ​ວ່າ​ເສດຖະກິດ​ຂອງ​ ສປປ​ ລາວ ​ຈະ​ມີ​ຄວາມ ຫຍຸ້ງຍາກ​ທາງ​ດ້ານ​ການ​ເງິນ​ແຕ່​ທາງ​ແຂວງ​ຈຳປາ​ສັກ​ບໍ່​ມີ​ຄວາມ​ຫຍຸ້ງຍາກ​ພໍ​ປານໃດ, ເສດຖະກິດ ທົ່ວ​ແຂວງ​ມີ​ການ​ຂະຫຍາຍຕົວ 8,15% ແລະ ລາຍ​ຮັບ​ພົນລະເມືອງ​ມີ 3.500 ໂດ​ລາ​ຕໍ່​ຄົນ​ຕໍ່​ປີ, ນອກຈາກ​ນີ້​ຍັງ​ມີ​ບ້ານ​ທີ່​ມີ​ຄວາມທຸກ​ຍາກ​ຈຳນວນ 10 ບ້ານ​ເທົ່າ​ກັບ 1,5% ມີ​ຄອບຄົວ​ທີ່​ທຸກ​ຍາກ ຈຳນວນ 500 ຄອບຄົວ​ເທົ່າ​ກັບ 0,4%.

   ໃນ​ໂອກາດ​ດຽວ​ກັນ​ນີ້​ທ່ານ ຢາ​ຊູ​ຊິ ເນ​ກິ​ຊິ ກໍໄດ້​ຂອບໃຈ​ຕໍ່​ທ່ານ​ເຈົ້າແຂວງ​ຈຳປາ​ສັກ​ທີ່​ໄດ້ສະຫຼະ​ເວລາ​ຕ້ອນ​ຮັບ, ການ​ຊ່ວຍເຫຼືອ​ຂອງ​ທະນາຄານ​ພັດທະນາ​ອາຊີ​ແມ່ນ​ໄດ້​ເລີ່ມ​ມາ​ແຕ່​ປີ 1990 ໂດຍ​ເລີ່ມ​ຈາກ​ຊັ້ນ​ປະຖົມ, ມາ​ຮອດ​ປັດຈຸບັນ​ແມ່ນ​ຊັ້ນ​ມັດທະຍົມ ແລະ ມະຫາ​ວິ​ທະ​ຍາໄລ, ທະນາຄານ ພັດທະນາ​ອາຊີ​ແມ່ນ​ໄດ້​ລົງ​ເລິກ​ໃນ 3 ຂະແໜງການ​ຍ່ອຍ​ຄື : ມັດ​ທະຍົມ, ອາຊີວະ​ສຶກສາ ແລະ ການ​ສຶກສາ​ຊັ້ນ​ສູງ​ກໍຄື​ມະຫາວິທະຍາໄລ, ນອກຈາກ​ນີ້​ຍັງ​ໄດ້​ຊ່ວຍເຫຼືອ​ທາງ​ດ້ານ​ການ​ປັບປຸງ​ຫຼັກສູດ​ການ​ຮຽນ​-​ການ​ສອນ ພ້ອມ​ທັງ​ຍົກ​ລະດັບ​ທາງ​ດ້ານ​ບຸກ​ຄະລາ​ກອນ​ກໍຄື​ການ​ພັດທະນາ​ຊັບ​ພະຍາ​ກອນ​ມະນຸດ​ໃຫ້​ມີ​ຄຸນ​ນະ​ພາບ, ການ​ຊ່ວຍເຫຼືອ​ດັ່ງກ່າວ​ແມ່ນ​ເປັນ​ການ​ພັດທະນາ​ເສດ​ຖະ​ກິດ​-​ສັງຄົມ ​ເຮັດ​ໃຫ້​ປະເທດ​ຫຼຸດ​ພົ້ນ​ອອກ​ຈາກ​ສະພາບ​ດ້ອຍ​ພັດ​ທະ​ນາ.
(ຂ່າວ: ສຸກ​ສາຄອນ)