3 ປະ­ເທດ ສືບ­ຕໍ່​ຮ່ວມ​ມື​ດ້ານ​ການ​ຄ້າ​-​ການ​ລົງ­ທຶນການ­ທ່ອງ­ທ່ຽວ

 

07.11.2019 8:54     

   ກອງ​ປະຊຸມ ດ້ານ​ການ​ຄ້າ​-​ການ​ລົງທຶນ, ການທ່ອງທ່ຽວ, ແຮງ​ງານ ແລະ​ ປະ​ຊາ​ສໍາ​ພັນ 3 ແຂວງ 3 ປະເທດ; ແຂວງສະ ຫວັນ​ນະ​ເຂດ (ສປປ ລາວ), ແຂວງ​ມຸກດາ​ຫານ (ຣາ​ຊະ ອານາຈັກ​ໄທ) ແລະ ແຂວງ ກວາງ​ຈິ (ສສ ຫວຽດນາມ) ໄດ້​ຈັດ​ຂຶ້ນ​ໃນ​ລະຫວ່າງ​ວັນທີ 31 ຕຸ​ລາ-1 ພະຈິກຜ່ານ​ມາ ທີ່​ແຂວງ​ສະຫວັນ​ນະ​ເຂດ ໂດຍ​ພາຍ​ໃຕ້​ການເປັນປະທານ​ຮ່ວມ​ຂອງ ທ່ານ ຄໍາ​ພູນ ຕຸ​ໄພທູນ ຮອງ​ເຈົ້າແຂວງໆສະຫວັນນະເຂດ, ທ່ານ ຫ​ງວຽນ ດຶກ ຈິ່ງ ປະທານ​ຄະນະ​ກຳມະການປະຊາຊົນ​ແຂວງກວາງ​ຈິ, ທ່ານ ສຸ​ວິດ ຈັນ​ຫະວອນ ຮອງ​ເຈົ້າ​ແຂວງ​ມຸກ ດາຫານ, ມີ​ຄະນະ​ຜູ້​ແທນ​ຈາກ 3 ແຂວງ 3 ປະເທດ​ເຂົ້າ​ຮ່ວມ.

   ກອງ​ປະຊຸມ​ໄດ້ສະຫຼຸບຜົນ ສໍາ​ເລັດ ​ໃນ​ການຈັດຕັ້ງ​ປະຕິ ບັດຕາມ​ຂໍ້​ຕົກລົງ​ການ​ຮ່ວມມື​ ດ້ານການ​ຄ້າ​-​ການ​ລົງທຶນ, ການທ່ອງທ່ຽວ, ແຮງ​ງານ ແລະ ປະ​ຊາ​ສໍາ​ພັນ ໃນ​ປີ​ທີ່ຜ່ານມາ ໂດຍ​ມີ​ການ​ປຶກສາ​ຫາລື ແລະ ເຫັນ​ດີ​ເປັນ​ເອກະ​ພາບ​ຕໍ່​ກັບ​ເນື້ອ​ໃນການ​ຮ່ວມ​ມື​ຕາມ​ບົດ​ບັນທຶກກອງ​ປະຊຸມ​ການ​ຮ່ວມ​ມື​ດ້ານການ​ຄ້າ​-​ການ​ລົງທຶນ, ການທ່ອງທ່ຽວ, ແຮງ​ງານ ແລະ ປະ​ຊາ​ສໍາ​ພັນ 3 ແຂວງ 3 ປະເທດ (ສະຫວັນ​ນະ​ເຂດ-​ມຸກດາຫານ-ກວາງ​ຈິ), ໃນ​ປີ 2016 ຊຶ່ງ​ທັງ 3 ແຂວງໄດ້ສ້າງ​ກິດ​ຈະ​ກໍາ​ຫຼາຍ​ຮູບ​ແບບ ເພື່ອ​ອໍານວຍ​ຄວາມ​ສະດວກ ແລະ​ ຊຸກຍູ້ໃຫ້​ເກີດ​ການ​ຮ່ວມ​ມືດ້ານ​ການ​ຄ້າ-​ການ​ລົງທຶນ, ການທ່ອງທ່ຽວ, ແຮງ​ງານ ແລະ​ ປະ​ຊາ​ສໍາ​ພັນ 3 ແຂວງ 3 ປະ​ເທດ.

   ກອງ​ປະຊຸມ​ຄັ້ງ​ນີ້​ໄດ້​ເປັນ ເອກະ​ພາບ​ສືບຕໍ່​ຮ່ວມ​ມື​ ໃນ​ແຕ່​ລະ​ດ້ານ​ດັ່ງນີ້: ດ້ານ​ການ​ຄ້າ-ການ​ລົງທຶນ, ກອງ​ປະຊຸມ​ສະໜັບສະໜູນ​ໃຫ້​ມີ​ການ​ປະ ສານ​ງານ ແລະ ແລກປ່ຽນ​ຂໍ້​ມູນ​ຂ່າວສານ​ທາງ​ດ້ານ​ການ​ຄ້າ​-​ການລົງທຶນ, ນິຕິ​ກຳ​ການ​ຄ້າ​-​ການ​ລົງທຶນ ທີ່​ມີ​ການ​ປັບປຸງ ແລະ ບັນຫາ​ອຸປະສັກ​ຂອງ​ຜູ້​ປະກອບ​ການ ໃນ​ການ​ດຳເນີນ ທຸລະ​ກິດ​ຮ່ວມ​ກັນ ເພື່ອ​ແກ້​ໄຂ ໃຫ້​ທັນ​ສະຖານະ​ການ ພ້ອມ​ທັງ ແກ້​ໄຂ ແລະ ຊຸກຍູ້​ໃຫ້ການ​ຄ້າເຂົ້າ​ສູ່​ລະບົບ ໂດຍ​ການ​ສົ່ງເສີມທຸລະ​ກິດ​ຂອງ​ແຕ່​ລະ​ຝ່າຍ​ເຂົ້າລົງທຶນ​ໃນ 3 ແຂວງ 3 ປະເທດ, ສົ່ງເສີມ​ການ​ຮ່ວມ​ມື​ໃຫ້​ມີ​ການຝຶກ​ອົບຮົມ​ສ້າງ​ຄວາມ​ເຂັ້ມແຂງ​ໃຫ້​ແກ່​ພາກ​ທຸລະ​ກິດ SMEs ໃນ​ດ້ານ​ການ​ຄຸ້ມ​ຄອງ ບໍລິຫານ, ຍົກ​ສູງ​ຜະລິດ​ຕະ​ພັນ ແລະ ການ​ເຂົ້າ​ເຖິງ​ແຫຼ່ງ​ທຶນ.
ທັງ 3 ຝ່າຍ​ເຫັນ​ດີ​ສະໜັບສະໜູນ​ໃຫ້​ຜູ້​ປະກອບ​ການ​ໄດ້​ເຂົ້າຮ່ວມ​ກິດຈະກຳ​ທາງ​ດ້ານ​ການຄ້າ​ເປັນຕົ້ນ ວາງສະແດງ​ສິນຄ້າ, ການ​ຈັບ​ຄູ່​ທຸລະ​ກິດ​ຢ່າງ​ຕໍ່​ເນື່ອງ ແລະ​ສ້າງ​ເງື່ອນໄຂ​ອຳນວຍ​ຄວາມ​ສະດວກ ໃຫ້​ກັບ​ຜູ້ປະກອບ​ການ​ໃນ​ການ​ເຂົ້າ​ຮ່ວມກິດຈະກຳ, ນັບ​ທັງ​ຈັດການ​ກອງ​ປະຊຸມ​ຂອງ​ຄະນະ​ຜູ້​ແທນ​ທັງ 3 ຝ່າຍ ເພື່ອ​ສົ່ງເສີມ​ໃຫ້​ມີ​ການ​ຄ້າ​-​ການ​ລົງທຶນ​ຮ່ວມ​ກັນ ນັບ​ມື້​ນັບ​ຫຼາຍ​ຂຶ້ນ.

   ສຳລັບ​ການ​ຮ່ວມ​ມື​ດ້ານ​ການທ່ອງທ່ຽວ: 3 ຝ່າຍ​ເຫັນ​ດີ​ສະໜັບສະໜູນ ໃຫ້​ໜ່ວຍ​ງານ​ທີ່​ກ່ຽວຂ້ອງ​ສົ່ງ ເສີມ​ການທ່ອງທ່ຽວ​ເຊື່ອມ​ຕໍ່ລາວ​-​ໄທ​-​ຫວຽດນາມ ໂດຍ​ສະເພາະ​ໃນ​ດ້ານ​ກິລາ, ວັດທະນະທຳ ແລະ ຮີດຄອງ​ປະເພນີ​ຜ່ານ ການ​ແລກປ່ຽນ, ເຜີຍແຜ່​ຂໍ້​ມູນ ການທ່ອງທ່ຽວທີ່ມີທ່າແຮງ ແລະ ສ້າງ​ກິດຈະກຳ​ການ​ສຳ ຫຼວດ​ທ່າແຮງ​ການທ່ອງທ່ຽວ ພ້ອມ​ທັງ​ສ້າງ​ກິດຈະກຳ​ໃຫ້​ມີ ຫຼາຍ​ຮູບ​ແບບ​ຮ່ວມ​ກັນ, ສະໜັບ​ໜູນ​ຊ່ວຍເຫຼືອ​ຝຶກ​ອົບຮົມ​ດ້ານ​ການ​ບໍລິຫານ -ການ​ບໍລິການ ແລະ ການ​ຕະຫຼາດ​ໃນ​ຂະແໜງການ​ທ່ອງ ທ່ຽວ​ໃຫ້​ແຂວງ​ສະຫວັນ​ນະ​ເຂດ​-​ແຂວງ​ມຸກດາ​ຫານ. ທັງ 3 ຝ່າຍ ເຫັນ​ດີ​ສົ່ງເສີມ​ຜູ້​ປະກອບ ການ​ດ້ານ​ການທ່ອງທ່ຽວ ມີ​ການ​ຈັບ​ຄູ່​ທຸລະ​ກິດ​ໃຫ້​ຖືກ ຕ້ອງ​ຕາມ​ລະບຽບ​ກົດໝາຍ​ບົນ ພື້ນຖານ​ຕ່າງ​ຝ່າຍ​ຕ່າງ​ໄດ້​ຮັບ ຜົນ​ປະໂຫຍດ​ຮ່ວມ​ກັນ.

   ການ​ຮ່ວມ​ມື​ດ້ານ​ແຮງ ງານ: ການ​ປ້ອງ​ກັນ ແລະ ແກ້​ໄຂ​ແຮງ​ງານ ເຄື່ອນ​ຍ້າຍ​ແບບ​ຜິດ​ກົດໝາຍ ຂອງ 3 ແຂວງ 3 ປະເທດ, ຄຸ້ມ​ຄອງ ແລະ ນຳ​ໃຊ້​ແຮງ​ງານ​ຕ່າງປະເທດ​ຕະຫຼອດ​ຮອດ​ສິດ ຜົນ​ປະໂຫຍດ ດ້ວຍ​ສະ​ຫວັດດີການ​ຕ່າງໆ ທີ່​ກຳນົດ​ໄວ້ໃນ​ກົດໝາຍ​ຂອງ​ແຕ່​ລະ​ປະເທດ, ປ້ອງ​ກັນ ແລະ ແກ້​ໄຂ​ບັນຫາ​ການ​ຄ້າ​ມະນຸດ ພ້ອມ​ທັງ​ການ​ຊ່ວຍເຫຼືອ​ຜູ້​ທີ່​ຖືກ​ເຄາະ​ຮ້າຍ, ສົ່ງເສີມ, ສິ່ງ​ອຳນວຍ​ຄວາມສະດວກ ແລະ ການ​ຮ່ວມ​ມື​ດ້ານການ​ພັດທະນາ​ສີມື​ແຮງ​ງານ.
ໃນ​ຂະນະ​ທີ່​ດ້ານ​ປະຊາ ສຳພັນ, 3 ຝ່າຍ​ເຫັນດີໃຫ້​ໜ່ວຍ​ງານ​ດ້ານ​ປະຊາສຳພັນ ແລະ​ສື່​ມວນ​ຊົນທັງ 3 ປະເທດ ແລກປ່ຽນ ​ແລະ ເຜີຍແຜ່ຂໍ້​ ມູນ ໂດຍ​ສະເພາະ​ດ້ານ​ການ ທ່ອງທ່ຽວ,ວັດທະນະທຳ, ການ​ຄ້າ​-​ການ​ລົງທຶນ, ແຮງ​ງານ ແລະ ການ​ພັດທະນາ ເສດຖະກິດ ແລະ ເຂດ​ອຸດສາຫະກຳ ຢູ່​ໃນ 3 ປະເທດ ເພື່ອ​ສົ່ງເສີມ​ຄວາມ​ເຂົ້າໃຈ​ຊຶ່ງ​ກັນ ແລະ ກັນ ນອກຈາກ​ນີ້​ກໍຍັງ​ມີ​ການ​ຮ່ວມມື​ດ້ານ​ອື່ນໆ​ນຳ​ອີກ.

   ຈາກ​ນັ້ນ, ຄະນະ​ນຳ​ທັງ 3 ຝ່າຍ ໄດ້​ຮ່ວມ​ກັນ​ລົງ​ນາມ​ບົດ​ບັນທຶກ ເພື່ອ​ຮ່ວມ​ມື​ກັນ​ໃນ​ຕໍ່​ໜ້າ.
(ຂ່າວ: ແຂວງ​ສະ​ຫວັ​ນ ນະ​ເຂດ)