ທູດຈີນ ພົບປະກັບສື່ມວນຊົນ ແລະ ອົງການຈັດຕັ້ງວັດທະນະທຳ


...

15.05.2019 10:38     

   ທ່ານ ຈ່ຽງຈ້າຍຕຸ່ງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ໄດ້ພົບປະກັບຜູ້ຮັບຜິດຊອບຂອງບັນດາສື່ມວນຊົນ ແລະ ອົງການຈັດຕັ້ງວັດທະນະທຳ ລາວ-ຈີນ ໂດຍສະເພາະແມ່ນວິທະຍຸສາກົນແຫ່ງປະເທດຈີນ ປະຈຳລາວ, ຂ່າວສານຊິນຮວາ ປະຈຳລາວ, ໜັງສືພິມປະຊາຊົນ ເມື່ອບໍ່ດົນມານີ້ ທີ່ສູນວັດທະນະທຳ ສປ ຈີນ ປະຈຳ ສປປ ລາວ.
ທ່ານ ຈ່ຽງຈ້າຍຕຸ່ງ ໄດ້ກ່າວວ່າ: ການເຊື່ອມຄວາມສຳພັນໄມຕີເປັນໜຶ່ງ ໃນບັນດາຫົວຂໍ້ທີ່ສຳຄັນ ໃນການຮ່ວມກັນສ້າງ "ໜຶ່ງແລວ ໜຶ່ງເສັ້ນທາງ", ຂະນະທີ່ການເພີ່ມທະວີການແລກປ່ຽນທາງດ້ານວັດທະນະທຳເປັນຊ່ອງທາງທີ່ສຳຄັນ ໃນການບັນລຸການເຊື່ອມຄວາມສຳພັນໄມຕີດັ່ງກ່າວ.
ທ່ານ ຈ່ຽງຈ້າຍຕຸ່ງ ກ່າວຕື່ມວ່າ: ການແລກປ່ຽນຮ່ວມມືທາງດ້ານວັດທະນະທຳກໍເປັນຈຸດເດັ່ນໃນການພົວພັນລະຫວ່າງສອງປະເທດຈີນ-ລາວ ໂດຍເຫັນໄດ້ຈາກທັງສອງຝ່າຍໄດ້ລົງນາມໃນແຜນການຈັດຕັ້ງປະຕິບັດການຮ່ວມມືທາງດ້ານວັດທະນະທຳ ແລະ ທ່ອງທ່ຽວ ໃນໄລຍະ 2019-2021 ໂດຍພາຍໃຕ້ການເປັນສັກຂີພິຍານຂອງການນຳສູງສຸດຂອງສອງພັກ, ສອງລັດ. ປະທານປະເທດທັງສອງຕ່າງກໍໄດ້ສົ່ງສານຊົມເຊີຍມາຍັງປີທ່ອງທ່ຽວລາວ-ຈີນ, ຈາກນັ້ນ ກໍມີກຸ່ມນັກທ່ອງທ່ຽວຈີນ 1.000 ຄົນເຂົ້າມາທ່ຽວລາວ.
ສປປ ລາວ ເປັນປະເທດທີ່ໄດ້ຮັບທຶນການສຶກສາຫຼາຍກວ່າໝູ່ໃນບັນດາປະເທດອາຊຽນ ຊຶ່ງປັດຈຸບັນມີນັກສຶກສາລາວຫຼາຍກວ່າ 14.000 ຄົນພວມສຶກສາຢູ່ທີ່ ສປ ຈີນ; ສື່ມວນຊົນຈີນຫຼາຍສື່ໄດ້ເປີດສາຂາ ຫຼື ມີສຳນັກງານປະຈຳຢູ່ ສປປ ລາວ ເພື່ອໂຄສະນາເຜີຍແຜ່ຜົນການຮ່ວມມືລະຫວ່າງສອງປະເທດຢ່າງຕັ້ງ ໜ້າ. ຢູ່ໃນແຜນແມ່ບົດ ວ່າດ້ວຍການສ້າງຄູ່ຮ່ວມຊາ ຕາກຳ ລາວ-ຈີນ ລະຫວ່າງພັກປະຊາຊົນປະຕິວັດລາວ ແລະພັກກອມມູນິດຈີນ ກໍໄດ້ ຢຶດໝັ້ນການເພີ່ມທະວີຄວາມເຂົ້າໃຈ ແລະ ໄປມາຫາສູ່ກັນ ລະຫວ່າງປະຊາຊົນສອງປະ ເທດ ເປັນເນື້ອໃນສຳຄັນ ຊຶ່ງໄດ້ ກຳນົດ 7 ທິດທາງເພື່ອເພີ່ມທະ ວີການແລກປ່ຽນທາງດ້ານວັດ ທະນະທຳຊຶ່ງກັນ ແລະ ກັນ.
ນີ້ໄດ້ສ່ອງແສງໃຫ້ເຫັນເຖິງສອງຝ່າຍໄດ້ໃຫ້ຄວາມສຳ ຄັນຢ່າງຍິ່ງຕໍ່ການຊຸກຍູ້ການເຊື່ອມຄວາມສຳພັນໄມ້ຕີ. ສະ ນັ້ນ, ພວກເຮົາຕ້ອງໂຄສະນາເຜີຍແຜ່ ແລະ ຈັດຕັ້ງປະຕິບັດທິດທາງທີ່ສຳຄັນດັ່ງກ່າວໃຫ້ເຂົ້າສູ່ລວງເລິກ ເພື່ອສ້າງໂສມໜ້າໃໝ່ໃຫ້ກັບການແລກປ່ຽນ-ຮ່ວມມືທາງດ້ານວັດທະນະທຳລະຫວ່າງສອງປະເທດ. ຜູ້ຮັບຜິດຊອບຂອງບັນດາສື່ມວນຊົນ ແລະ ອົງການຈັດຕັ້ງວັດທະນະທຳຈີນ ມີຄວາມເຫັນເປັນເອກະພາບກັນວ່າ: ຈະໄດ້ຈັດຕັ້ງປະຕິບັດເນື້ອໃນທີ່ສຳຄັນ ທີ່ກຳນົດໄວ້ໃນ ແຜນແມ່ບົດ ຢ່າງຕັ້ງໜ້າ, ສົ່ງເສີມການແລກປ່ຽນທາງດ້ານວັດທະນະທຳລະຫວ່າງສອງປະເທດ, ຈັດກິດຈະກຳຕ່າງໆ ໃນປີທ່ອງທ່ຽວລາວ-ຈີນ ເພື່ອຊຸກຍູ້ຂະແໜງການວັດທະນະທຳໃຫ້ໄດ້ຮັບການພັດທະນາ; ເພີ່ມທະວີການແລກປ່ຽນລະຫວ່າງບັນດາມະ ຫາວິທະຍາໄລ ແລະ ສະຖາບັນການສຶກສາຕ່າງໆ ເພື່ອເສີມຂະຫຍາຍພາລະບົດບາດໃນການສ້າງຄູສອນພາສາ; ລົງເລິກການຮ່ວມມືທາງດ້ານສື່ມວນຊົນ ເປີດກວ້າງການຮ່ວມມືທາງດ້ານຂ່າວສານ, ສື່ສິ່ງພິມ, ຮູບເງົາ ແລະ ອື່ນໆ. ນອກນີ້ ຍັງຈະຕອບສະໜອງບັນຫາທີ່ເປັນປະເດັນທີ່ປະຊາຊົນລາວສົນໃຈ ເພື່ອເປັນແຮງຍູ້ສຳຄັນໃຫ້ແກ່ການພົວພັນລະຫວ່າງສອງປະເທດ.
ຜູ້ຮັບຜິດຊອບສະຖາບັນຂົງຈື ມະຫາວິທະຍາໄລແຫ່ງຊາດ, ໜັງສືພິມປະຊາຊົນ, ຂ່າວສານປະເທດລາວ ແລະ ສື່ອື່ນໆ ມີຄວາມເຫັນເປັນເອກະພາບກັນວ່າ: ການລົງນາມໃນແຜນແມ່ບົດໄດ້ສ່ອງແສງໃຫ້ເຫັນເຖິງຄວາມມຸ່ງໝັ້ນທີ່ພັກ ແລະລັດຖະບານຈີນຢຶດໝັ້ນຕໍ່ຫຼັກການທີ່ປະເທດຕ່າງໆປະ ຕິບັດຕໍ່ກັນຢ່າງສະເໝີພາບ ແລະເຄົາລົບຊຶ່ງກັນ ແລະ ກັນ, ຊ່ວຍປັບປຸງຊີວິດການເປັນຢູ່ຂອງປະຊາຊົນລາວຢ່າງຈິງໃຈ ຊຶ່ງເປັນກຳລັງໃຈໃຫ້ກັບວົງການຕ່າງໆໃນສັງຄົມລາວ. ບັນດາສື່ມວນຊົນ ແລະ ອົງການຈັດຕັ້ງວັດທະນະທຳລາວ ຈະຈັດຕັ້ງປະຕິບັດໂຄງການຕ່າງໆໄປຄຽງຄູ່ກັບຝ່າຍຈີນ, ຮ່ວມກັນສ້າງ "ໜຶ່ງແລວ ໜຶ່ງເສັ້ນທາງ" ກໍຄືບັນລຸການເຊື່ອມຄວາມສຳພັນໄມຕີລະຫວ່າງສອງປະເທດ ເພື່ອປະກອບສ່ວນເຂົ້າໃນການສ້າງຄູ່ຮ່ວມຊາຕາກຳ ລາວ-ຈີນຢ່າງຕັ້ງໜ້າ.
(ຂ່າວ: CRI)