ການນຳພັກ-ລັດ ຮ່ວມປູກຕົ້ນໄມ້ ທີ່ສວນພຶກສາສາດ


...

03.06.2019 9:42     

   ເນື່ອງໃນໂອກາດວັນປູກຕົ້ນໄມ້ແຫ່ງຊາດ 1 ມິຖຸນາ, ວັນສິ່ງແວດລ້ອມແຫ່ງຊາດ ແລະ ສາກົນ 5 ມິຖຸນາ, ການນຳພັກ - ລັດໄດ້ຮ່ວມກັນປູກຕົ້ນໄມ້ທີ່ສວນພຶກສາສາດ ເພື່ອເພີ່ມການປົກຫຸ້ມຂອງປ່າໄມ້ກາຍເປັນສະຖານທີ່ເພື່ອການຄົ້ນຄວ້າທາງດ້ານວິທະຍາສາດ ແລະ ການສຶກສາຮຽນຮູ້ ໃຫ້ແກ່ນັກສຶກສາໃນອະນາຄົດ. ພິທີດັ່ງກ່າວ ໄດ້ຈັດຂຶ້ນໃນວັນທີ 1 ມິຖຸນາຜ່ານມາ ທີ່ສວນພຶກສາສາດ ເມືອງໄຊທານີ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງທ່ານ ພັນຄຳ ວິພາວັນ ຮອງປະທານປະເທດ, ມີບັນດາລັດຖະມົນຕີ - ຮອງລັດຖະມົນຕີ, ບັນດາແຂກພາຍໃນ ແລະ ຕ່າງປະເທດ; ພໍ່ແມ່ປະຊາຊົນ ພ້ອມດ້ວຍຫຼານນ້ອຍເຍົາວະຊົນ ເຂົ້າຮ່ວມຢ່າງຫຼວງຫຼາຍ. ສວນພຶກສາສາດ ຫ້ວຍຍາງ - ບ້ານດົງໝາກຄາຍ ເມືອງໄຊທານີ ນະຄອນຫຼວງວຽງຈັນ ມີເນື້ອທີ່ທັງໝົດ 268 ເຮັກຕາ ຊຶ່ງພັກ ແລະ ລັດຖະບານເຫັນວ່າຈະຕ້ອງໄດ້ຟື້ນຟູ ແລະ ປູກໄມ້ຊະນິດຕ່າງໆ ເພື່ອເຮັດໃຫ້ໂຄງປະກອບດ້ານຊະນິດພັນໄມ້ ມີຄວາມຫຼາກຫຼາຍຍິ່ງໆຂຶ້ນ ກາຍເປັນສະຖານທີ່ເພື່ອການຄົ້ນຄວ້າທາງດ້ານວິທະຍາສາດ ແລະ ການສຶກສາຮໍ່າຮຽນ ໃຫ້ແກ່ນັກສຶກສາໃນອະນາຄົດ ແລະ ທັງເປັນການປັບປຸງຄຸນນະພາບອາກາດ, ຫຼຸດຜ່ອນມົນລະພິດໃນອາກາດ ແລະ ຕ້ານພາວະໂລກຮ້ອນໄປໃນຕົວ. ທ່ານ ລຽນ ທີແກ້ວ ລັດ ຖະມົນຕີກະຊວງກະສິກຳ ແລະ ປ່າໄມ້ (ກປ) ກ່າວວ່າ: ຈຸດ ປະສົງພິທີປູກຕົ້ນໄມ້ຮ່ວມກັນໃນຄັ້ງນີ້ ແມ່ນເພື່ອສົ່ງເສີມການປູກໄມ້ ແລະ ຟື້ນຟູປ່າ ຕາມທິດທາງນະໂຍບາຍຂອງພັກ ແລະ ເປົ້າໝາຍຍຸດທະສາດປ່າໄມ້ຂອງລັດຖະບານ ຊຶ່ງໄດ້ວາງຄາດໝາຍເພີ່ມເນື້ອທີ່ປົກຫຸ້ມຂອງປ່າໄມ້ ໃຫ້ໄດ້ 70% ເຖິງປີ 2020, ພ້ອມທັງປູກຈິດສໍານຶກໃຫ້ນ້ອງນ້ອຍເຍົາວະຊົນ ຮູ້ຈັກຄຸນຄ່າ, ຮູ້ຈັກຮັກປ່າໄມ້ ແລະ ຊັບພະຍາກອນປ່າໄມ້. ສຳລັບການປູກໄມ້ໃນສວນພຶກສາສາດ ກໍເພື່ອຟື້ນຟູປ່າ ຊຶ່ງກະຊວງ ກປ ໄດ້ຮັບການແບ່ງປັນ ແລະ ມອບໝາຍໃຫ້ປູກຕົ້ນໄມ້ ໃນເນື້ອທີ່ 136 ເຮັກຕາ ຈາກເນື້ອທີ່ທັງໝົດ 268 ເຮັກຕາ ໃຫ້ສຳເລັດໃນໄລຍະເວລາ 2 ປີ ໂດຍການສະໜອງງົບປະມານຈາກກອງທຶນປົກປັກຮັກສາສິ່ງແວດລ້ອມ. ສຳລັບປີ 2019 ນີ້, ກະ ຊວງ ກປ ມີແຜນການປູກ 50 ເຮັກຕາ, ແຕ່ໃນນີ້ ປູກຮ່ວມກັນໃນເນື້ອທີ່ 5 ເຮັກຕາ ຈຳນວນ 4.166 ຕົ້ນ ມີຊະນິດພັນໄມ້ພື້ນເມືອງລາວ ເປັນຕົ້ນ ໄມ້ຂະຍຸງ, ໄມ້ດູ່ເລືອດ, ໄມ້ດູ່ລາຍ, ໄມ້ແຕ້ຂ່າ, ໄມ້ປະດົງ, ໄມ້ຍາງ ແລະ ໄມ້ແຄນ. ທ່ານລັດຖະມົນຕີ ຍັງກ່າວອີກວ່າ: ເພື່ອຮັບປະກັນເຮັດໃຫ້ການປູກຕົ້ນໄມ້ມີປະສິດທິຜົນສູງ, ທັງເປັນການເລັ່ງຄວາມໄວໃນການຟື້ນຟູສວນພຶກສາສາດ, ຕົ້ນໄມ້ທີ່ນຳມາປູກໃນນີ້ ມີຂະໜາດລວງສູງ 2 ແມັດຂຶ້ນໄປ ແລະ ພາຍຫຼັງການປູກແລ້ວ ຈະໄດ້ເຮັດສັນຍາມອບເໝົາ ໃຫ້ມີບຸກຄົນຮັບຜິດຊອບໃນການບົວລະບັດຮັກສາ ຈົນກວ່າຕົ້ນໄມ້ດັ່ງກ່າວລອດຕາຍ ແລະ ຈະເລີນເຕີບໂຕຂຶ້ນ. ທ່ານ ນາງ ບຸນຄຳ ວໍລະຈິດ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ກ່າວວ່າ: ປ່າໄມ້ ແມ່ນຊັບ ພະຍາກອນທີ່ສໍາຄັນຕໍ່ການດຳລົງຊີວິດຂອງຄົນເຮົາ ແລະ ການພັດທະນາເສດຖະກິດ - ສັງຄົມ, ປ່າໄມ້ຊ່ວຍເຮັດໃຫ້ອາກາດຊຸ່ມຊື່ນ, ຮັກສາແຫຼ່ງນໍ້າ, ຮັກສາຄຸນນະພາບຂອງດິນ ແລະ ເປັນບ່ອນພັກຜ່ອນສໍາລັບມະນຸດ ແລະ ທີ່ຢູ່ອາໄສຂອງສັດ. ນອກຈາກນັ້ນ, ປ່າໄມ້ຍັງມີບົດບາດສໍາຄັນໃນການປ້ອງກັນໄພພິບັດທໍາມະຊາດຕ່າງໆ. ກຊສ ໄດ້ກຳນົດວິໄສທັດຄື: "ປະເທດລາວ ສີຂຽວ ສະອາດ ງາມຕາ ມີຄວາມອຸດົມສົມບູນ ທາງດ້ານຊັບພະຍາກອນທໍາມະຊາດ ບົນພື້ນຖານການເຕີບໂຕເສດຖະກິດສີຂຽວ ເພື່ອບັນລຸການພັດທະນາແບບຍືນຍົງ ແລະ ກ້າວເປັນປະເທດອຸດສາຫະກໍາທັນສະໄໝ ຮັບປະກັນຄວາມສາມາດໃນການກຽມພ້ອມຮັບມື ກັບການປ່ຽນແປງດິນຟ້າອາກາດ ແລະ ໄພພິບັດທາງທໍາມະຊາດ. ກິດຈະກຳປູກຕົ້ນໄມ້ໃນຄັ້ງນີ້ ກໍແມ່ນກິດຈະກໍາໜຶ່ງ ຂອງການສະເຫຼີມສະຫຼອງວັນສິ່ງແວດລ້ອມແຫ່ງຊາດ ຄົບຮອບ 20 ປີ ກໍຄື ວັນສິ່ງແວດລ້ອມໂລກ ຄົບຮອບ 47 ປີເພື່ອເປັນການໂຄສະນາເຜີຍແຜ່, ການປູກຈິດສຳນຶກ ໃຫ້ມວນຊົນ ໃນການປົກປັກຮັກສາສິ່ງແວດລ້ອມ. (ຂ່າວ + ພາບ: ສຸກສະຫວັນ)