ໃຫ້ຄວາມສຳຄັນຕໍ່ສິດທິເດັກ ເພື່ອກາຍເປັນຜູ້ໃຫຍ່ຢ່າງມີຄຸນນະພາບ


...

03.06.2019 9:41     

   ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ) ຮ່ວມກັບອົງການ ຢູນີເຊັບ (UNICEF) ໄດ້ຈັດພິທີສະເຫຼີມສະຫຼອງຄົບຮອບ 30 ປີ ຂອງສົນທິສັນຍາວ່າດ້ວຍສິດທິເດັກ ແລະ ສະເຫຼີມສະຫຼອງວັນ ເດັກນ້ອຍສາກົນ 1 ມິຖຸນາ ຂຶ້ນໃນວັນທີ 31 ພຶດສະພາຜ່ານມາ ທີ່ສູນຝຶກອົບຮົມ ແລະ ຮ່ວມມືສາກົນ ໂດຍການເປັນກຽດເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກຳມາທິການ ແຫ່ງຊາດ ເພື່ອຄວາມກ້າວໜ້າ ຂອງແມ່ຍິງ ແລະ ແມ່-ເດັກ (ຄຊກມດ), ມີພາກສ່ວນກ່ຽວ ຂ້ອງເຂົ້າຮ່ວມ. ທ່ານ ນາງ ອິນລາວັນ ແກ້ວບຸນພັນ ປະທານສະຫະພັນແມ່ຍິງ ຮອງປະທານ ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ ໄດ້ກ່າວວ່າ: ການ ກະກຽມສະເຫຼີມສະຫຼອງວັນສົນທິສັນຍາສິດວ່າດ້ວຍທິ ເດັກ ຄົບຮອບ 30 ປີ ໃນປີນີ້ ຕິດພັນກັບການສະເຫຼີມສະຫຼອງວັນເດັກສາກົນ 1 ມິຖຸນາ 2019 ກໍເປັນໂອກາດທີ່ດີສຳ ລັບ ສປປ ລາວ ຮ່ວມກັບບັນ ດາປະຊາຊາດໃນທົ່ວໂລກໄດ້ເພີ່ມ ທະວີຄວາມເອົາໃຈໃສ່ ແລະ ໃຫ້ຄວາມສຳຄັນຕໍ່ສິດທິຂອງເດັກ ເພື່ອໃຫ້ເຂົາເຈົ້າມີ ໄວເດັກ ທີ່ ເຕັມໄປດ້ວຍຄວາມ ເປັນຢູ່ທີ່ດີ, ມີສ່ວນຮ່ວມ, ໄດ້ຮັບ ການປົກປ້ອງ, ໄດ້ຮັບການຊຸກ ຍູ້ສົ່ງເສີມໃຫ້ມີການພັດທະນາດ້ານຕ່າງໆຢ່າງເຕັມຄວາມສາ ມາດ ເພື່ອເຮັດໃຫ້ເດັກມີອະນາຄົດທີ່ແຈ່ມໃສ ແລະ ກາຍເປັນຜູ້ໃຫຍ່ທີ່ມີຄຸນນະພາບໃນມື້ໜ້າ, ສຳລັບ ສປປ ລາວ ພວກເຮົາ ກໍມີຫຼາຍຂະບວນການ ເພື່ອສະ ເຫຼີມສະຫຼອງວັນເດັກ 1 ມິຖຸນາ ແລະ ວັນສົນທິສັນຍາວ່າດ້ວຍສິດທິເດັກ ຄົບຮອບ 30 ປີ ໃນວັນທີ 20 ພະຈິກ 2019 ຢ່າງເປັນຂະບວນຟົດຟື້ນ ທັງຢູ່ຂັ້ນສູນກາງ ແລະ ທ້ອງຖິ່ນ. ໃນທົ່ວໂລກ, ໄວໜຸ່ມກໍາລັງເວົ້າເຖິງສິດຂອງເຂົາເຈົ້າໃນການສຶກສາ, ຮຽກຮ້ອງໃຫ້ຢຸດຕິການຈໍາແນກ, ການຕໍ່ສູ້ກັບຄວາມຮຸນແຮງໃນໂຮງຮຽນ, ການຮຽກຮ້ອງຕໍ່ການປ່ຽນແປງດິນຟ້າອາກາດ, ການໂຄສະນາເພື່ອການປະຕິຮູບດີຈີຕອນ ແລະ ການຮຽກຮ້ອງໃຫ້ຜູ້ນໍາໃນການປົກປ້ອງອະນາຄົດຂອງພວກເຂົາ. ເດັກກໍາລັງບອກພວກເຮົາຢ່າງຈະແຈ້ງ ແລະ ຊັດເຈນ, ມັນແມ່ນເວລາສໍາລັບເດັກທຸກໆຄົນທີ່ຈະໄດ້ຮັບສິດທັງໝົດຂອງເຂົາ. ນາງ ວິນັດດາ ປັນຍາວັດ ທະນະສິນ ອາຍຸ 15 ປີ ໄດ້ກ່າວວ່າ: «ນ້ອງເອງຕ້ອງການໃຫ້ເດັກທຸກໆຄົນໄດ້ເຂົ້າເຖິງການສຶກສາທີ່ມີຄຸນນະພາບ ແລະ ໄດ້ຮັບການສົ່ງເສີມສະໜັບສະໜູນໃນການຮຽນຮູ້. ທ້າວ ສະເຫຼີມໄຊ ສີວົງສາ ອາຍຸ 15 ປີ ໄດ້ກ່າວວ່າ: ສຳລັບນ້ອງ ຕ້ອງການເຫັນພະນັກງານແພດທີ່ມີຄຸນນະພາບ ແລະ ອຸ ປະກອນການແພດ ແລະ ມີເຕັກໂນໂລຊີທີ່ດີຢູ່ໃນໂຮງໝໍ ແລະ ພ້ອມກັນນັ້ນ ການຮັບປະກັນການເຂົ້າເຖິງການບໍລິການດ້ານສຸຂະພາບທີ່ມີຄຸນນະພາບສໍາລັບເດັກໃນຊົນນະບົດ ກໍແມ່ນສິ່ງສໍາຄັນທີ່ພວກເຂົາຕ້ອງການໂອກາດນີ້ໃຫ້ເທົ່າທຽມກັນໃນການເຕີບໂຕຢ່າງມີຄຸນນະພາບ. ໃນໂອກາດນີ້ ທ່ານ ສອນໄຊ ສີພັນດອນ ກໍໄດ້ໃຫ້ກຽດຂຶ້ນມອບຂອງຂັວນໃຫ້ນັກສຶກ ສາ ແລະ ຢອດຢາໃຫ້ແກ່ເດັກ ນ້ອຍທີ່ເຂົ້າຮ່ວມການສະເຫຼີມ ສະຫຼອງໃນຄັ້ງນີ້ອີກດ້ວຍ. (ພາບ-ຂ່າວ: ບຸນຕອມ)