ເປີດງານສັບປະດາວັດທະນະທຳ-ທ່ອງທ່ຽວຈີນ


...

03.06.2019 9:41     

   ສູນວັດທະນະທໍາຈີນ ປະຈໍາ ສປປ ລາວ ຮ່ວມກັບ ພະແນກວັດທະນະທໍາ ແລະ ທ່ອງທ່ຽວ ແຂວງເສສວນ ສປ ຈີນ ໄດ້ຈັດງານ "ສັບປະດາວັດທະນະທໍາ ແລະ ທ່ອງທ່ຽວຈີນ" ຂຶ້ນຢ່າງເປັນທາງການເມື່ອວັນທີ 31 ພຶດສະພາຜ່ານມາ, ທີ່ນະຄອນຫຼວງວຽງຈັນ; ໂດຍການເປັນກຽດເຂົ້າຮ່ວມຂອງທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ທ່ານ ຈ່ຽງ ຈ້າຍ ຕົ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ມີພາກ ສ່ວນກ່ຽວຂ້ອງເຂົ້າຮ່ວມ. ໃນພິທີ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ ໄດ້ກ່າວວ່າ: ງານສັບປະດາວັດທະນະທໍາຈີນ ແລະ ທ່ອງທ່ຽວຈີນ ຄັ້ງນີ້, ແມ່ນກິດຈະກໍາໜຶ່ງ ທີ່ເປັນການປະກອບສ່ວນເຂົ້າໃນການໂຄສະນາສົ່ງເສີມປີທ່ອງທ່ຽວລາວ-ຈີນ 2019 ໃຫ້ປະຊາຊົນສອງຊາດລາວ-ຈີນ ໄດ້ຮັບຮູ້ຊຶ່ງກັນ ແລະ ກັນຢ່າງກ້ວາງຂວາງຍິ່ງຂຶ້ນ, ໃນຕໍ່ໜ້ານີ້ ສອງປະເທດ ລາວ-ຈີນ ຍັງຈະໄດ້ຮ່ວມກັນ ສືບຕໍ່ຈັດຕັ້ງປະຕິບັດ ບັນດາກິດຈະກໍາ ທີ່ໄດ້ກໍານົດໄວ້ ຮອດທ້າຍປີ 2019 ເຊັ່ນ: ກອງປະຊຸມສໍາມະນາສົ່ງເສີມການທ່ອງທ່ຽວ, ແລກປ່ຽນສິລະປະ-ວັດທະນະທໍາ, ວາງສະແດງຮູບພາບ, ວາງສະແດງການທ່ອງທ່ຽວ ແລະ ອື່ນໆອີກ. ງານສັບປະດາວັດທະນະທໍາ ແລະ ທ່ອງທ່ຽວຈີນ ໄດ້ຈັດຂຶ້ນແຕ່ 30 ພຶດສະພາ ຫາ 2 ມິຖຸນາ 2019 ໂດຍມີຜູ້ຊ່ຽວຊານທາງດ້ານການທ່ອງທ່ຽວຈາກແຂວງເສສວນ ມາປາຖະກະຖາກ່ຽວ ກັບການພັດທະນາວັດທະນະທໍາ ແລະ ການທ່ອງທ່ຽວ ພ້ອມດຽວກັນນີ້ ຍັງມີນັກສິລະປະ ແຂວງເສສວນ ນໍາເອົາການສະແດງທີ່ທັນສະໄໝ ແລະ ການສະແດງຟ້ອນພື້ນເມືອງທີ່ມີສີສັນພິເສດມາສະແດງ ເຊັ່ນ: ຟ້ອນຮ່ວມສະໄໝ, ປ່ຽນໜ້າກາກຍິ້ມເສສວນ, ການສະແດງຊົງຊາກາປາກຍາວ ແລະ ອື່ນໆ. ສໍາລັບການສະແດງຟ້ອນ ຮ່ວມສະໄໝ ຫຼື "GEN" (ຮາກເຫງົ້າ) ໂດຍຄະນະສິລະປະ ການຟ້ອນຮ່ວມສະໄໝ ຊຶ່ງເປັນຜົນງານການປະດິດແຕ່ງຂອງຄະນະສິລະປະການຟ້ອນຮ່ວມສະໄໝຂອງໂຮງລະຄອນສິລະປະການຟ້ອນແຂວງເສສວນ ຮ່ວມກັບຜູ້ກໍາກັບຊາວອິດສະຣາແອນ ທີ່ໄດ້ແຮງບັນດານໃຈຈາກການຄົ້ນພົບຫຼັກຖານບູຮານຄະດີໃນແຂວງເສສວນ, ເປັນການຟ້ອນຮ່ວມສະໄໝທີ່ຕ່າງ ຈາກນິຍາມ ແຫ່ງຄວາມງາມ ແລະ ຮູບແບບການ ສະແດງແບບພື້ນເມືອງ, ເຮັດໃຫ້ຜູ້ຊົມຕື່ນຕາຕື່ນໃຈ. ພ້ອມດຽວກັນນີ້ ກໍຍັງມີກິດຈະກໍາຕ່າງໆທີ່ມີເນື້ອໃນຫຼາກຫຼາຍ ການສໍາຜັດກັບວັດທະນະທໍາ ແລະ ການວາງສະແດງຮູບ ພາບປະເທດຈີນທີ່ສວຍງາມ ແລະ ວາງສະແດງຮູບພາບ ທິວທັດແຂວງ ເສສວນ ໃນວັນທີ 1 ຫາ 2 ມິຖຸນານີ້ ເປັນ ໄລຍະສະເຫຼີມສະຫຼອງວັນ ເດັກນ້ອຍສາກົນ ຊຶ່ງກິດຈະກໍາງານສັບປະດາວັດທະນະທໍາ ແລະ ທ່ອງທ່ຽວຍັງສືບຕໍ່ຈັດຢູ່ ສູນການຄ້າວຽງຈັນເຊັນເຕີ້ປະ ກອບມີກິດຈະກໍາຫຼາຍຢ່າງເຊັ່ນ: ການສະແດງຟ້ອນຮ່ວມສະໄໝ; ການຕໍ່ເລໂກ້; ການເຮັດໜ້າກາກງິ້ວ DIY; ຮ້ານຖ່າຍຮູບສາມມິຕິ; ກາຕູນໝີແພນດ້າ ແລະ ແຈກຂອງລາງວັນທີ່ຫຼາກຫຼາຍພາຍໃນງານ. (ຂ່າວ-ພາບ: ຍຸພິນທອງ)