ລມຕ ກະຊວງ ຖວທ ຕ້ອນຮັບຜູ້ແທນ ສປ ຈີນ


...

11.06.2019 9:33     

   ເພື່ອສືບຕໍ່ປະຕິບັດກິດ ຈະກຳສົ່ງເສີມປີທ່ອງທ່ຽວລາວ-ຈີນ 2019 ໃນວັນທີ 10 ມິຖຸນານີ້, ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ(ຖວທ), ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ຈ່າງຊິ້ວ (Zhang Xu) ຮອງລັດຖະມົນຕີກະຊວງວັດທະນະທຳ ແລະ ທ່ອງທ່ຽວແຫ່ງ ສປຈີນ ໃນໂອກາດທີ່ມາເຄື່ອນໄຫວ ນໍາພາຄະນະສິລະປະກັງຟູ,ໄທເກັກ,ເຊົ້າຫຼິນ ແຂວງເຫີໜານ ສປຈີນມາສະແດງ ໃນລະຫວ່າງວັນທີ 7-10 ມິຖຸນານີ້. ໃນໂອກາດນີ້, ທ່ານລັດຖະມົນຕີໄດ້ສະແດງຄວາມຍິນດີຕ້ອນ ຮັບ ແລະ ຕີລາຄາສູງທີ່ທ່ານຮອງລັດຖະມົນຕີ ຈ່າງຊິ້ວ ພ້ອມຄະນະເດີນທາງມາຢ້ຽມຢາມ ແລະ ນໍາພາຄະນະສິລະປະກັງຟູສປຈີນມາສະແດງໃຫ້ປະຊາຊົນລາວໄດ້ຮັບຊົມໃນຄໍ່າຄືນຂອງວັນທີ 9 ມິຖຸນາທີ່ຜ່ານມາ.ນີ້ແມ່ນກິດຈະກຳໜຶ່ງທີ່ໄດ້ປະກອບສ່ວນເຂົ້າໃນວຽກງານໂຄສະນາສົ່ງເສີມປີທ່ອງທ່ຽວລາວ-ຈີນ 2019 ໃຫ້ປະຊາຊົນສອງຊາດລາວ-ຈີນໄດ້ຮັບຮູ້ຊຶ່ງກັນ ແລະ ກັນຢ່າງກວ້າງຂວາງຍິ່ງຂຶ້ນ ພ້ອມເປັນການເຜີຍແຜ່ວັດທະນະທຳຂອງຈີນອີກດ້ວຍ.ໃນໂອກາດນີ້ທັງສອງຝ່າຍຍັງໄດ້ປຶກສາຫາລືກ່ຽວກັບການຈັດຕັ້ງປະຕິບັດບັນດາກິດຈະກຳທີ່ໄດ້ກຳນົດໄວ້ຈົນເຖິງທ້າຍປີ 2019 ນີ້. ທ່ານ ບໍ່ແສງຄຳ ວົງດາລາ ກໍໄດ້ອວຍພອນໃຫ້ສາຍພົວພັນຮ່ວມມືລາວ-ຈີນແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານຕາມທິດສີ່ດີ(ເພື່ອນທີ່ດີ, ສະຫາຍທີ່ດີ,ເພື່ອນບ້ານທີ່ດີ ແລະ ຄູ່ຮ່ວມມືທີ່ດີ) ແລະ ຄູ່ຮ່ວມສະຕາກຳສັງຄົມນິຍົມລາວ-ຈີນ, ຈີນ-ລາວ, ອວຍພອນໃຫ້ທ່ານຮອງລັດຖະມົນຕີພ້ອມດ້ວຍຄະນະຈົ່ງປະສົບຜົນສຳເລັດໃນການປະຕິບັດໜ້າທີ່ອັນມີກຽດ ໃນການເດີນທາງມາຢ້ຽມຢາມສປປລາວໃນຄັ້ງນີ້. ທ່ານ ຈ່າງຊິ້ວ ກໍໄດ້ສະແດງຄວາມຂອບໃຈຕໍ່ທ່ານ ບໍ່ແສງຄຳ ວົງດາລາ ທີ່ໃຫ້ການຕ້ອນຮັບຢ່າງອົບອຸ່ນ, ການຈັດຕັ້ງປະຕິບັດກິດຈະກຳປີທ່ອງທ່ຽວລາວ-ຈີນ 2019 ທີ່ສປປລາວ ແລະ ສະແດງຄວາມຍິນດີຈະສືບຕໍ່ໃນການຈັດຕັ້ງບັນດາກິດຈະກຳປີທ່ອງທ່ຽວລາວ-ຈີນ 2019 ໃຫ້ມີຜົນສຳເລັດຕາມລະດັບຄາດໝາຍ. (ຂ່າວ-ພາບ: ພູວັນ)