ເຈດີບີ ມອບລົດໂຕໂຍຕ້າ ປຣາໂດ ໃຫ້ລູກຄ້າ ປະຈຳປີທີ 4


...

08.07.2019 10:23     

   ທະນາຄານຮ່ວມພັດທະ ນາ ໄດ້ຈັດພິທີມອບລາງວັນທີ 1 ຊຶ່ງເປັນລົດ ໂຕໂຍຕ້າ ປຣາໂດ ໃຫ້ລູກຄ້າທີ່ໂຊກດີຈາກການຈັບສະຫຼາກຊີງໂຊກ ບັນຊີເງິນຝາກປະຈໍາ ປີທີ 4 ຂຶ້ນໃນວັນທີ 4 ກໍລະກົດຜ່ານມາ ທີ່ຫ້ອງການສໍານັກງານໃຫຍ່ທະນາຄານດັ່ງກ່າວ, ໃຫ້ກຽດມອບໂດຍທ່ານ ບຸນສະຫວ່າງ ພິລາໄຊພິທັກ ຜູ້ອໍານວຍການໃຫຍ່ທະນາຄານຮ່ວມພັດທະນາ ແລະ ຍັງມີຜູ້ບໍລິຫານລະດັບສູງ, ພະນັກງານວິຊາການທີ່ກ່ຽວຂ້ອງ ກໍໄດ້ເຂົ້າຮ່ວມເປັນສັກຂີພິຍານ. ຜູ້ໂຊກດີ ທີ່ໄດ້ຮັບລາງວັນ ລົດໂຕໂຍຕ້າ ປຣາໂດ ໃນປີນີ້ ແມ່ນ ທ່ານ ສົມທາດ ບຸນທະພັນ, ບ້ານ ນາບວມ ເມືອງທ່າແຂກ ແຂວງຄໍາມ່ວນ. ກໍແມ່ນຄົນໜຶ່ງ ທີ່ເປັນລູກຄ້າເງິນຝາກປະຈໍາ ໃນໂຄງການ ຝາກເງິນມີກໍານົດ 4 ປີ. ເພື່ອເປັນການຄືນກໍາໄລແກ່ລູກຄ້າ ທີ່ຝາກເງິນໃນໂຄງການຝາກປະຈໍາ 4 ປີ ນໍາທະນາຄານຮ່ວມພັດທະນາ ໂດຍການມອບລົດ ໂຕໂຍຕ້າ ປຣາໂດ ໜຶ່ງຄັນ ໃຫ້ຜູ້ໂຊກດີ. ທະນາຄານຮ່ວມພັດທະ ນາ ຍັງຈະສືບຕໍ່ມອບລົດໃຫຍ່ ໂຕໂຍຕ້າ ແລນກຸຍເຊີ ແລະ ລົດເລັກຊັດ ໃຫ້ແກ່ລູກຄ້າທີ່ຝາກປະຈໍາ ໃນປີຕໍ່ໄປອີກລວມມູນຄ່າຫຼາຍກວ່າ 9 ຕື້ກີບ. ປັດຈຸບັນ ທະນາຄານຮ່ວມພັດທະນາມີໜ່ວຍບໍລິການ ທີ່ເປີດບໍລິການທັງໝົດ 60 ໜ່ວຍບໍລິການ. ອອກຜະລິດຕະພັນໃໝ່ເພື່ອສະ ໜອງລູກຄ້າ ໃຫ້ໄດ້ຊົມໃຊ້ຜະລິດຕະພັນ ຢ່າງຫຼວງຫຼາຍ ແລະ ໄດ້ຮັບຄວາມປະທັບໃຈ. ເຊັ່ນວ່າ: ເງິນກູ້ເພື່ອພະນັກງານ, ເງິນກູ້ເພື່ອການສຶກສາ ພາຍໃນ ແລະ ຕ່າງປະເທດ, ເຮັດທຸລະກໍາການເງິນຜ່ານມືຖື ( Mobile Banking ) ຫຼື ເວົ້າຫຍໍ້ວ່າ: JDB Yes ແລະ Yes pay ( QR Code ) ອອກຜະລິດຕະພັນໃໝ່ ທາງດ້ານ Digital Banking ໃຫ້ຫຼາກຫຼາຍ, ເຮັດໃຫ້ທຸກກຸ່ມຄົນ ສາມາດເຂົ້າເຖິງແຫຼ່ງທຶນທີ່ໝັ້ນຄົງ ດ້ວຍຄວາມສະດວກສະບາຍ, ຊຶ່ງທະນາຄານຮ່ວມພັດທະນາ ມີແຫຼ່ງທຶນພຽງພໍທີ່ຈະສະໜອງໃຫ້ລູກຄ້າ ເພື່ອສະໜັບສະໜູນ ທຸລະກິດຂອງລູກຄ້າ ໃຫ້ມີຄວາມເຕີບໃຫຍ່ ຂະຫຍາຍຕົວ, ພ້ອມກັນນັ້ນ ກໍເປັນການປະກອບສ່ວນ ແກ້ໄຂຊີວິດການເປັນຢູ່ຂອງພະນັກງານ-ລັດຖະກອນ ເຮັດໃຫ້ຊີວິດການເປັນຢູ່ດີຂຶ້ນ ໂດຍການຕອບສະໜອງສິນເຊື່ອພະນັກງານ ໂດຍບໍ່ມີຫຼັກຊັບຄໍ້າປະກັນໃຫ້ແກ່ພະນັກງານ-ລັດຖະກອນ ທີ່ເບີກຈ່າຍເງິນເດືອນຜ່ານທະນາຄານ. ໃນປີ 2019 ທະນາຄານຮ່ວມພັດທະນາ ກໍຄົບຮອບ 30 ປີ ທະນາຄານຮ່ວມພັດ ທະນາ ໄດ້ບັນລຸຜົນສໍາເລັດຫຼາຍຢ່າງ ໃນການບໍລິການທາງດ້ານການເງິນ ໃຫ້ກັບປະຊາຊົນບັນດາເຜົ່າ, ປັດຈຸບັນ ລູກຄ້າມີຄວາມເຊື່ອໝັ້ນ ແລະ ໄວ້ວາງໃຈ ໃຫ້ຄວາມສະໜັບສະໜູນ ທະນາຄານ JDB ຕະຫຼອດມາ ຊຶ່ງທັງໝົດນີ້ກໍຍ້ອນການຊີ້ນຳ ນຳພາ ຢ່າງໃກ້ຊິດຈາກ ພັກ-ລັດຖະບານ ກໍຄືຂັ້ນເທິງ ໂດຍສະເພາະກໍ່ແມ່ນທະນາຄານແຫ່ງ ສປປລາວ ເຮັດໃຫ້ເປັນທະນາຄານ ທີ່ທັນສະໄໝ. ຕາມຍຸກ 4.0 ເຮັດໃຫ້ທະນາຄານ JDB ໄດ້ນໍາໃຊ້ ເຕັກໂນໂລຊີທີ່ທັນສະໄໝ ເຂົ້າໃນການບໍລິການໃຫ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ເພື່ອເຮັດໃຫ້ສັງຄົມ ຫຼຸດຜ່ອນການນໍາໃຊ້ເງິນສົດ "Cash less Society "ເທື່ອລະກ້າວ ໂດຍໄປຕາມຄໍາຂວັນຂອງທະນາຄານຮ່ວມພັດທະນາ "ເຕີບໃຫຍ່ໄປພ້ອມກັນ". (ພາບ ແລະ ຂ່າວ: ຄໍາຕົ້ນ ວໍລະຈັກ)