ຫາລືແກ້ໄຂຄົນຕ່າງປະເທດທີ່ເຄື່ອນໄຫວ ບໍ່ຖືກຕ້ອງຕາມກົດໝາຍຂອງ ສປປ ລາວ


08.07.2019 10:22     

   ພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ໄດ້ຈັດກອງປະຊຸມ ເພື່ອແກ້້ໄຂຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມກົດໝາຍຂອງ ສປປ ລາວ ຢູ່ນະ ຄອນຫຼວງວຽງຈັນ ຂຶ້ນເມື່ອວັນທີ 5 ກໍລະກົດ ຜ່ານມານີ້ ທີ່ພະແນກດັ່ງກ່າວ ໂດຍການເປັນປະທານຂອງ ທ່ານ ສີຫຸນ ສິດທິລືໄຊ ຮອງເຈົ້າຄອງ ນະຄອນຫຼວງວຽງຈັນ, ມີຜູ້ຕາງໜ້າພາກສ່ວນທີ່ກ່ຽວຂ້ອງ ແລະ ບັນດາຫົວ ໜ້າຫ້ອງການແຮງງານ ແລະ ສະຫວັດດີການສັງຄົມ 9 ເມືອງເຂົ້າຮ່ວມ. ກອງປະຊຸມຄັ້ງນີ້, ເພື່ອປຶກສາຫາລືສືບຕໍ່ການແກ້ໄຂຄົນຕ່າງປະເທດທີ່ມາເຄື່ອນໄຫວບໍ່ຖືກຕ້ອງຕາມລະບຽບ ກົດ ໝາຍຂອງ ສປປ ລາວ ຢູ່ນະຄອນຫຼວງວຽງຈັນໂດຍມອບໃຫ້ຂະແໜງແຮງງານ, ກອງບັນຊາການ ປກສ ແລະ ຂະແໜງອຸດສາຫະກຳ ແລະ ການຄ້າ ເປັນຜູ້ຮັບຜິດຊອບ ແລະ ແກ້ໄຂຕາມລະບຽບກົດໝາຍຂອງແຕ່ລະພາກສ່ວນຄື: ໃຫ້ຂະແໜງປ້ອງກັນຄວາມສະຫງົບເປັນເຈົ້າການຮັບຜິດ ຊອບຄົນຕ່າງປະເທດທີ່ໄດ້ຮັບການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວຊຶ່ງເປັນບຸກຄົນ, ນິຕິບຸຄົນທີ່ເຄື່ອນໄຫວລະເມີດກົດໝາຍເຊັ່ນ: ຫາບ, ຫິ້ວ, ຍູ້ລໍ້, ບັນທຸກໃສ່ຍານພາຫະນະ ເພື່ອຂາຍສິ່ງຂອງຕາມສະຖານທີ່ຕ່າງໆ.ບໍ່ເປັນຜູ້ອອກແຮງງານ, ຕັ້ງຮ້ານເກມ, ຮ້ານບັນເທີງ ເພື່ອບໍລິການແບບບໍ່ໄດ້ຮັບອະນຸ ຍາດ, ຂາຍອາຫານ, ຜັກ, ໝາກໄມ້, ເຄື່ອງຍ່ອຍ, ອອກເງິນມື້, ຂາຍເຄື່ອງດາວ, ການເປີດຄີລ ນິກບຸກຄົນ, ນິຕິບຸກຄົນທີ່ນຳໃຊ້ແຮງງານຕ່າງປະເທດເຮັດວຽກນຳຕົນເອງ ໂດຍບໍ່ໄດ້ຮັບອະນຸຍາດ ແລະ ອື່ນໆ, ຂະແໜງແຮງງານ ແລະ ສະຫວັດດີການສັງຄົມ ເປັນເຈົ້າການຮັບຜິດ ຊອບຄົນຕ່າງປະເທດທີ່ໄດ້ຮັບການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວວຽກຊົ່ວຄາວ ຊຶ່ງເປັນບຸກຄົນຜູ້ອອກ ແຮງງານຕ່າງປະເທດທັງໝົດທີ່ຍັງເຮັດວຽກແບບບໍ່ຖືກຕ້ອງຕາມກົດໝາຍເຊັ່ນ: ເຮັດວຽກນຳຫົວໜ້າໜ່ວຍແຮງງານໂຄງ ການເຂດເສດຖະກິດພິເສດຫ້າງຮ້ານຕ່າງໆ ແລະ ບຸກຄົນ, ນິຕິບຸກຄົນທີ່ນຳໃຊ້ແຮງງານຕ່າງປະເທດເຮັດວຽກນຳຕົນໂດຍບໍ່ໄດ້ຮັບອະນຸຍາດ ແລະ ຂະແໜງອຸດສາຫະກຳ ແລະ ການຄ້າເປັນເຈົ້າການຮັບຜິດຊອບແກ້ໄຂຄົນຕ່າງປະເທດທີ່ໄດ້ຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວຊຶ່ງເປັນບຸກຄົນຜູ້ທີ່ລົງທຶນເພື່ອຄ້າຂາຍສ້ອມແປງ, ດຳເນີນທຸລະກິດ, ການບໍລິການຮ້ານອາຫານ, ເຮືອນພັກ,ໂຮງແຮມ ແລະ ການລົງທຶນ ປະເພດອື່ນໆທີ່ຂັດກັບກົດໝາຍ ແລະ ລະບຽບການຂອງຂະແໜງຕົນ ໂດຍສະເພາະແມ່ນບັນຊີປະເພດທຸລະກິດທີ່ສະຫງວນໄວ້ໃນພົນລະເມືອງລາວສະບັບປັບປຸງ 02-2015 ຂອງກະຊວງອຸດ ສາຫະກຳ ແລະ ການຄ້າ. ກອງປະຊຸມຄັ້ງນີ້ ບັນດາຜູ້ເຂົ້າຮ່ວມຍັງໄດ້ຮັບຟັງການປະກອບຄຳຄິດຄຳເຫັນຂອງຂະແໜງການທີ່ກ່ຽວຂ້ອງ ແລະ ຮ່ວມກັນປຶກສາຫາລື ແລກປ່ຽນຄວາມຄິດຄວາມເຫັນຊຶ່ງກັນ ແລະ ກັນ ແນໃສ່ເພື່ອກ້າວໄປໃນການຈັດຕັ້ງປະຕິບັດໃຫ້ບັນລຸໝາກຜົນທີ່ກຳນົດໄວ້. (ຂ່າວ: ສຳນານ)