ຈະມີຫຼາຍກິດຈະກຳ ສະຫຼອງວັນສ້າງຕັ້ງ ສະຫະພັນແມ່ຍິງລາວ


...

11.07.2019 9:34     

   ເນື່ອງໃນໂອກາດສະ ເຫຼີມສະຫຼອງວັນສ້າງຕັ້ງອົງ ການຈັດຕັ້ງສະຫະພັນແມ່ຍິງລາວ ຄົບຮອບ 64 ປີ (20 ກໍ ລະກົດ 1955 -20 ກໍລະກົດ 2019) ທີ່ຈະໝູນວຽນມາບັນຈົບຄົບຮອບອີກວາລະໜຶ່ງ, ສູນກາງສະຫະພັນແມ່ຍິງລາວຈະຈັດໃຫ້ມີຫຼາກຫຼາຍກິດຈະກຳເພື່ອຕ້ອນຮັບວັນສຳຄັນດັ່ງກ່າວ ທີ່ຈະມາເຖິງໃນມໍ່ໆນີ້. ທ່ານ ນາງ ສິລິກິດ ບຸບຜາ ຮອງປະທານສູນກາງສະຫະ ພັນແມ່ຍິງລາວ (ສຍລ) ໄດ້ຖະແຫຼ່ງຂ່າວ ກ່ຽວກັບການກະກຽມສະເຫຼີມສະຫຼອງວັນສຳຄັນດັ່ງກ່າວຕໍ່ສື່ມວນຊົນ ເມື່ອວັນທີ 9 ກໍລະກົດ ທີ່ ສຍລ ຊຶ່ງມີເນື້ອໃນວ່າ: ວັນທີ 20 ກໍລະກົດ ຂອງທຸກໆປີ ສູນກາງສະຫະພັນແມ່ຍິງລາວ, ສະມາຊິກສະຫະພັນແມ່ຍິງ ແລະ ແມ່ຍິງລາວບັນດາເຜົ່າໃນທົ່ວປະເທດ ໄດ້ພ້ອມໃຈກັນສ້າງຂະບວນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຊຶ່ງເປັນອົງການຈັດຕັ້ງໜຶ່ງໃນລະບົບການເມືອງ ຂອງລະບອບປະຊາທິປະໄຕປະ ຊາຊົນທີ່ພັກໃຫ້ກຳເນີດ, ຝຶກຝົນຫຼໍ່ຫຼອມ ແລະ ຊຸກຍູ້ສົ່ງເສີມເພື່ອໃຫ້ແມ່ຍິງໄດ້ເຮັດໜ້າທີ່ໃນການເປັນຕົວແທນແຫ່ງສິດ ຜົນປະໂຫຍດອັນຊອບທຳຂອງແມ່ຍິງ-ເດັກນ້ອຍ ຕິດພັນກັບການສຶກສາອົບຮົມເຕົ້າໂຮມຄວາມສາມັກຄີ ແລະ ເສີມຂະຫຍາຍສິດເປັນເຈົ້າຂອງແມ່ຍິງລາວປະກອບສ່ວນເຂົ້າໃນພາລະກິດປະຕິວັດ ກໍຄືພາລະກິດພັດທະນາແມ່ຍິງ, ເອົາໃຈໃສ່ປະຕິບັດສິດສະເໝີ ພາບຍິງ-ຊາຍ ແລະ ປົກປັກຮັກສາມູນເຊື້ອທີ່ເປັນເອກະລັກຂອງແມ່ຍິງໃນໄລຍະໄໝ່. ທ່ານໃຫ້ຮູ້ຕື່ມວ່າ: ສຳ ລັບກິດຈະກຳທີ່ຈະຈັດຕັ້ງປະ ຕິບັດປະກອບມີ: ສຳລັບແຂວງ, ກະຊວງ-ອົງການແມ່ນໃຫ້ຈັດຕັ້ງປາຖະກະຖາ, ສຳມະນາ, ຢ້ຽມຢາມຫໍພິພິທະພັນ, ອານຸສອນສະຖານ, ຫໍມູນເຊື້ອຕ່າງໆ, ໂຄສະນາປະຫວັດມູນເຊື້ອ, ຜົນງານ, ການເຕີບໃຫຍ່ຂະຫຍາຍຕົວຂອງສະຫະພັນແມ່ຍິງລາວ ແລະ ການສ້າງຂະບວນການສິລະປະວັນນະຄະດີ, ກິລາ, ການວາງສະແດງຜະລິດຕະ ພັນກະສິກຳ-ຫັດຖະກຳ ແລະ ຮູບການອື່ນໆທີ່ເໝາະສົມຕິດພັນກັບຂະບວນການລວມ ຂອງພັກ, ຂອງຊາດໂດຍຜ່ານ ພາຫະນະສື່ມວນຊົນໃຫ້ ກວ້າງຂວາງ ແລະ ເຂົ້າເຖິງທຸກກຸ່ມເປົ້າໝາຍໂດຍອີງຕາມສະພາບຕົວຈິງຂອງແຕ່ລະຂະແໜງ, ທ້ອງຖິ່ນ,ໃຫ້ຮັບປະກັນດ້ານເນື້ອໃນ, ປະຢັດ, ມີບັນຍາກາດດີ ແລະ ມີຄວາມເປັນລະບຽບຮຽບຮ້ອຍ, ສຳລັບສູນກາງສະຫະພັນແມ່ຍິງລາວ ໃນຕອນເຊົ້າຂອງວັນທີ 11 ກໍລະກົດ 2019 ຈະໄດ້ຮ່ວມກັບອົງການກາແດງຈັດກິດຈະກຳບໍລິຈາກເລືອດຢູ່ສູນການຄ້າວຽງຈັນເຊັນເຕີເລີ່ມແຕ່ເວລາ 8 ໂມງ 30 ນາທີ ຫາ 16 ໂມງ 30ນາທີ,ວັນທີ 17 ກໍລະກົດ ຈັດພິທີວາງກະຕ່າດອກໄມ້ທີ່ອານຸສາວະລີນັກຮົບນິລະນາມ, ຮ່ວມກັບສະຫະພັນແມ່ຍິງກະ ຊວງປ້ອງກັນຄວາມສະຫງົບຈັດການແຂ່ງຂັນຍິງປືນທີ່ສະ ໜາມຍິງປືນ 24 ເມສາ, ຕອນເຊົ້າວັນທີ 19 ກໍລະກົດ ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 64 ປີ ເພື່ອຫວນຄືນມູນເຊື້ອ ແລະ ຜົນສຳເລັດຕ່າງໆຂອງແມ່ຍິງລາວທີ່ສູນອົບຮົມແມ່ຍິງລາວ. ດັ່ງນັ້ນ,ໃນໄລຍະສະເຫຼີມສະຫຼອງວັນດັ່ງກ່າວ ສູນກາງສະຫະພັນແມ່ຍິງລາວຂໍເຊີນຊວນທຸກພາກສ່ວນນຳພາສະມາຊິກສະຫະພັນແມ່ຍິງລາວ-ແມ່ຍິງລາວບັນດາເຜົ່າເອົາໃຈໃສ່ສຶກສາອົບຮົມລູກຫຼານໂດຍການເຂົ້າຢ້ຽມຊົມຫໍມູນເຊື້ອແມ່ຍິງລາວທີ່ສູນອົບຮົມແມ່ຍິງລາວ ແລະ ຫ້ອງສິນສາຍໄໝຢູ່ບ້ານຊຽງຍືນ ຊຶ່ງໄດ້ໃຫ້ເຂົ້າຢ້ຽມຊົມໃນໂມງລັດຖະການ ແລະ ຮຽກຮ້ອງອົງການຈັດຕັ້ງທາງພາກລັດ, ເອກະຊົນ ແລະອົງການຈັດຕັ້ງສາກົນຈົ່ງສືບຕໍ່ໃຫ້ການຮ່ວມມື, ສະໜັບສະໜູນ ແລະ ເຂົ້າຮ່ວມໃນຂະບວນການສະ ເຫຼີມສະຫຼອງວັນສ້າງຕັ້ງສະ ຫະພັນແມ່ຍິງລາວ ຄົບຮອບ 64 ປີ ຄັ້ງນີ້ໃຫ້ບັນລຸຜົນສຳເລັດຢ່າງຈົບງາມ. (ຂ່າວ:ສຳນານ)