ທ່ານ ບຸນທອງ ຈິດມະນີ ເຄື່ອນໄຫວຢ້ຽມຢາມ ແລະ ເຮັດວຽກທີ່ເມືອງວຽງໄຊ


...

13.08.2019 8:42     

   ວັນທີ 11 ສິງຫາຜ່ານມາ ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ປະທານອົງການກວດກາລັດຖະບານ ແລະ ຫົວໜ້າອົງ ການຕ້ານການສໍ້ລາດບັງຫຼວງຂັ້ນສູນກາງ ພ້ອມຄະນະຢ້ຽມ ຢາມ ແລະ ເຮັດວຽກຢູ່ເມືອງວຽງໄຊ ແຂວງຫົວພັນ ໂດຍໄດ້ຮັບການຕ້ອນຮັບຈາກ ທ່ານ ວັນໄຊ ແພງຊຸມມາ ເລຂາພັກແຂວງ ເຈົ້າແຂວງຫົວພັນ ມີຄະນະພັກ, ຄະນະນຳຂອງເມືອງ, ບັນດາຫ້ອງການອ້ອມຂ້າງແຂວງ, ພະນັກງານ, ທະຫານ, ຕໍາຫຼວດ ພ້ອມດ້ວຍປະຊາຊົນໃຫ້ການຕ້ອນຮັບຢ່າງສົມກຽດ.
    ໂອກາດການລົງຢ້ຽມຢາມ ແລະ ເຮັດວຽກໃນຄັ້ງນີ້ ທ່ານຮອງນາຍົກລັດຖະມົນຕີໄດ້ຮັບຟັງການ ລາຍງານການກະກຽມກອງປະຊຸມໃຫຍ່ 3 ຂັ້ນໂດຍສັງເຂບ ຈາກທ່ານ ພອນສຸກ ອິນທະວົງ ເລຂາພັກເມືອງ, ເຈົ້າເມືອງວຽງໄຊ. ຈາກນັ້ນ, ກໍໄດ້ຮັບຟັງການລາຍງານສະ ພາບຜົນກະທົບຈາກພາຍຸໝູນວິພາ ທີ່ເກີດຂຶ້ນຢູ່ເມືອງວຽງໄຊ ໃນລະຫວ່າງວັນທີ 2-5 ສິງຫາ 2019 ຊຶ່ງມີ 29 ບ້ານໄດ້ຮັບຜົນກະທົບຈາກພາຍຸດັ່ງກ່າວໄດ້ສ້າງຜົນເສຍຫາຍອັນໜັກໜ່ວງຕໍ່ປະຊາຊົນຊາວເມືອງວຽງໄຊ ໂດຍສະເພາະບັນດາບ້ານທີ່ຢູ່ຂອບເຂດຊາຍແດນ ເມືອງ ກວັນເຊິນ ແຂວງແທັງຮວ່າ ສສ ຫວຽດນາມ ຢູ່ຕາມລ້ອງນຳ້ງາ, ນຳ້ພູນ, ນຳ້ສິມ ແລະ ນຳ້ໂສຍ ສໍາລັບບ້ານທີ່ໄດ້ຮັບຜົນກະທົບຮ້າຍແຮງກວ່າໝູ່ແມ່ນບ້ານຫີນດໍາ, ບ້ານນາຮາມ, ບ້ານຄໍານາງ ຊຶ່ງມີດິນເຈື່ອນໄຫຼລົງມາທັບເຮືອນປະຊາຊົນຢູ່ບ້ານຫີນດໍາ 2 ຫຼັງ, ບ້ານຄໍານາງ 2 ຫຼັງ ແລະ ບ້ານນາຮາມ 1 ຫຼັງເຮັດໃຫ້ມີຜູ້ສູນຫາຍຈຳນວນ 7 ຄົນ, ບາດເຈັບ 5 ຄົນ ແລະ ເສຍຊີວິດ 1 ຄົນ; ເສັ້ນທາງເປ່ເພ 4 ເສັ້ນຄື: ເສັ້ນທາງພູນໃໝ່-ຄໍານາງ, ເສັ້ນທາງ ກ້າງໂຄ້ງ-ບ້ານບໍ, ເສັ້ນທາງກອງ 11-ຫ້ວຍຕຸງ ແລະ ເສັ້ນທາງດ່ານສາກົນນຳ້ໂສຍ-ບ້ານໂສຍ; ຄອງເໝືອງເປ່ເພ 33 ເສັ້ນ; ຝາຍເປ່ເພ 12 ແຫ່ງ; ເນື້ອທີ່ນາຖືກນຳ້ຖ້ວມ, ນຳ້ເຊາະເຈື່ອນເສຍຫາຍ ປະມານ 98 ເຮັກຕາ; ເນື້ອທີ່ໄຮ່ເຂົ້າເສຍຫາຍ 2 ເຮັກຕາ, ສັດໃຫຍ່ ງົວ-ຄວາຍ 18 ໂຕ, ຫົວປັ່ນໄຟນຳ້ຢອດ ເສຍຫາຍ 80 ເຄື່ອງ. ນອກນີ້, ກໍຍັງມີປະເພດສັດລ້ຽງຂອງປະຊາຊົນເສຍຫາຍຈໍານວນຫຼວງຫຼາຍ ຄາດຄະເນຄວາມເສຍຫາຍໃນເບື້ອງຕົ້ນຈາກໄພພິບັດໃນຄັ້ງນີ້ທົ່ວເມືອງວຽງໄຊທັງໝົດປະມານ 13 ຕື້ກວ່າກີບ. ຕໍ່ກັບສະພາບການດັ່ງກ່າວ ພາຍຫຼັງ ທີ່ໄດ້ຮັບແຈ້ງຂ່າວ ຈາກກອງ ຮ້ອຍທະຫານຊາຍແດນ 215 ວ່າເກີດມີພາຍຸຂັ້ນຮ້າຍແຮງຢູ່ເຂດນຳ້ງາ ແລະ ມີດິນເຈື່ອນທັບຄົນ ທາງຄະນະປະຈໍາພັກເມືອງກໍໄດ້ຮີບຮ້ອນຈັດກໍາລັງເຂົ້າຊ່ວຍເຫຼືອທັນທີ ໂດຍການສົມທົບກັບກອງທະຫານ ແລະ ປະຊາຊົນຊອກຄົ້ນຜູ້ສູນຫາຍ ແຕ່ກໍບໍ່ທັນພົບຮ່ອງຮອຍຂອງຜູ້ສູນຫາຍ ຈຶ່ງໄດ້ເຮັດໜັງສືສະເໜີຫາການນໍາເມືອງກວັນເຊິນ ສສ ຫວຽດນາມ ໃຫ້ຊ່ວຍຄົ້ນຫາຜູ້ສູນຫາຍ ທີ່ອາດຖືກກະເເສນຳ້ພັດໄຫຼລົງໄປຮອດເຂດເມືອງກວັນເຊິນ ສສ ຫວຽດນາມ.
    ໂອກາດດຽວກັນນີ້, ທ່ານຮອງນາຍົກລັດຖະມົນຕີ ກໍໄດ້ຮັບຟັງການລາຍງານສະພາບການຟື້ນຟູຊີວິດການເປັນຢູ່ຂອງປະຊາຊົນຈາກທ່ານເຈົ້າ ເມືອງວຽງໄຊ ແລະ ວິທີການແກ້ໄຂຜົນກະທົບຈາກໄພພິບັດນຳ້ຖ້ວມ ພ້ອມທັງໃຫ້ກຽດໂອ້ລົມ ແລະ ເນັ້ນໜັກໃຫ້ອໍານາດການປົກຄອງເມືອງວຽງໄຊ ກໍຄືແຂວງຫົວພັນ ໃຫ້ເອົາໃຈໃສ່ສືບຕໍ່ຄົ້ນຫາຜູ້ສູນຫາຍຈາກໄພພິບັດທາງທໍາມະຊາດໂດຍການສົມທົບກັບກໍາລັງຫວຽດນາມຊອກຄົ້ນຫາທີ່ຄາດຄະເນວ່າອາດຖືກກະແສນຳ້ພັດໄຫຼລົງໄປຮອດເຂດເມືອງກວັນເຊິນ ສສ ຫວຽດນາມ; ເອົາໃຈໃສ່ກວດກາຄືນ ໃນຄວາມເສຍຫາຍຂອງແຕ່ລະຄອບຄົວທີ່ໄດ້ຮັບຜົນກະທົບ ແລະ ສິ່ງຂອງສາທາລະນະເປັນຕົ້ນ: ໂຮງຮຽນ, ສຸກສາລາ, ຫ້ອງການຕ່າງໆ ລວມທັງພື້ນຖານໂຄງລ່າງ ໃຫ້ຄິດໄລ່ມູນຄ່າຄວາມເສຍຫາຍຢ່າງລະອຽດ; ໃນການຟື້ນຟູບ້ານເຮືອນແມ່ນໃຫ້ພາກັນຄົ້ນຄວ້າຢ່າງລະອຽດວ່າຄວນໄປໃນທິດທາງໃດ ເພື່ອຫາທາງແກ້ໄຂຊ່ວຍປະຊາຊົນ ພ້ອມທັງໃຫ້ການຊ່ວຍເຫຼືອທາງດ້ານແຮງງານ, ວັດຖຸປັດໃຈ, ເຄື່ອງອຸປະໂພກ-ບໍລິໂພກ, ແຫຼ່ງທໍາການຜະລິດກະສິກໍາ-ປູກ-ຝັງ ລ້ຽງສັດຂອງປະຊາຊົນ ແລະ ເອົາໃຈໃສ່ເປັນພິເສດໃນການຟື້ນຟູສະພາບຈິດໃຈຂອງພໍ່ແມ່ປະຊາຊົນ; ຮີບຮ້ອນປັງປຸງໂຮງຮຽນໃຫ້ນັກຮຽນກ່ອນທີ່ຈະເປີດເທີມຮຽນ, ສ້າງສຸກສາລາ, ສ້ອມແປງເສັ້ນທາງ ແລະ ທີ່ພັກອາໄສຂອງພໍ່ແມ່ປະຊາຊົນ ໂດຍເລີ່ມຈາກສິ່ງທີ່ມີຄວາມຈໍາເປັນ; ດ້ານສຸຂະພາບຂອງພໍ່ແມ່ປະຊາຊົນ ຕ້ອງໄດ້ຮັບການເບິ່ງແຍງເປັນພິເສດເພາະອາດຕິດພະຍາດທີ່ມານຳນໍ້າຖ້ວມ ແລະ ເພື່ອເປັນການບັນເທົາທຸກແກ່ຜູ້ປະສົບໄພທ່ານຮອງນາຍົກລັດຖະມົນຕີກໍ່ໄດ້ມອບເງິນສົດ ຈໍານວນ 100.000.000 ກີບ ພ້ອມດ້ວຍເຄື່ອງອຸປະໂພກ-ບໍລິໂພກ ມູນຄ່າ 20 ລ້ານກີບ ໃຫ້ແກ່ອໍານາດການປົກຄອງເມືອງວຽງໄຊ ເພື່ອນໍາໄປມອບຕໍ່ໃຫ້ກັບພໍ່ແມ່ປະຊາຊົນຕ່ືມອີກ. ໂອກາດດັ່ງກ່າວ, ທ່ານຮອງນາຍົກລັດຖະມົນຕີພ້ອມດ້ວຍຄະນະ ໄດ້ລົງພົບປະຢ້ຽມຢາມ ພໍ່ແມ່ປະຊາຊົນທີ່ຖືກຜົນກະທົບຈາກໄພນໍ້າຖ້ວມ ແລະ ລົງກວດກາເບິ່ງຄວາມເສຍຫາຍໃນເບື້ອງຕົ້ນ ຕື່ມອີກ. (ພາບ-ຂ່າວ: ນ. ມີນາ ດວງພະຈັນ)